ސަޢޫދީގެ ފޮތްތަކުގައި އިސްރާއީލް ސިފަކޮށްފައިވާ ގޮތަށް ބަދަލުތަކެއް ގެނެސްފި: ރިޕޯޓް

ސަޢޫދީ ޢަރަބިއްޔާގެ މަންހަޖުން ޤުދުސްއާ ގުޅޭ ބައެއް ޢިބާރާތްތައް އުނިކޮށް އިސްރާއީލް ސިފަކުރަމުންދާ ގޮތަށް ބަދަލުތަކެއް ގެނެސްފައިވާ ކަމަށް ރިޕޯޓްތައް ބުނެފިއެވެ.

އިސްތިއުމާރީ އިސްރާއީލުގައި ޤާއިމުވެފައި އޮތް ދިރާސާ ޖަމާޢަތެއް ކަމުގައިވާ އިމްޕެކްޓް-އެސްއީ އިން ނެރުނު ރިޕޯޓެއްގައި ބުނެފައިވާ ގޮތުން، ސަޢޫދީ ޢަރަބިއްޔާގެ ސްކޫލް ފޮތްތަކުން "މުސްލިމުން ދުވަހަކުވެސް ޤުދުސް ދޫކޮށެއް ނުލާނެ" މި ޢިބާރާތް ވަނީ އުނިކޮށްފައެވެ. އަދި އެކަމަށް ތަޢުރީފުކޮށް އެ ޤައުމުގެ ތަޢުލީމީ މަންހަޖު ބައްޓަންކުރާ ގޮތް އިތުރަށް ބަދަލުކުރުމަށް އެ ރިޕޯޓްގައި ވަނީ ގޮވާލާފާއެވެ.

ޖުލައި މަހުގެ ފަހުކޮޅު އާންމުކުރި މި ރިޕޯޓުގައި އެ ޖަމާޢަތުން ބުނެފައިވަނީ އެ ޢިބާރާތުގެ ސަބަބުން ޤުދުސްގައި މުސްލިމުންގެ ބާރު ނުވަތަ އެ ތަނުގައި މުސްލިމުން ތިބުން ނުރައްކަލެއްގެ ތެރޭގައި އޮތް ކަމަށް ދޭހަވާ ކަމަށެވެ. އެ ރިޕޯޓުގައި އިތުރަށް ފާހަގަކޮށްފައިވާ ގޮތުގައި އެ ޖަމާޢަތުން ބަޔާންކުރާ "ޔަހޫދީންނާ ދެކޮޅު" ހުރިހާ ވާހަކައެއް ވެސް މަންހަޖުން އުނިކޮށްފައިވެއެވެ.

މީގެ އިތުރުން ކީރިތި ޤުރުއާނުގެ ބައެއް އާޔަތްތަކާއި ނަބިއްޔާ ﷺ ގެ ޙަދީޘްފުޅުތަކެއް ފޮތްތަކުން ނެގި ކަމަށް ބުނެ އެ ޖަމާޢަތުން އެއީ "ރަނގަޅު ކުރިއެރުމެއް" ގެ ގޮތުގައި ސިފަކޮށްފައިވެއެވެ. ހަމައެހެންމެ ކުފުރާއި ފާފައާ ގުޅޭ ޤުރުއާނުގެ އާޔަތްތައް މަދުކޮށްލާފައިވާ ކަން ވެސް ފާހަގަކޮށްފައިވެއެވެ.

ޗާޓުތަކާއި ބަސްމަގާ ގުޅޭ ގޮތުން ބެލިއިރު ކުރިން ސަޢޫދީ ފޮތްތަކުގެ ޗާޓުތަކުން "އިސްރާއީލު" ނެތި މުޅި ސަރަޙައްދު ފަލަސްޠީނުގެ ގޮތުގައި ދައްކާފައި ހުރެމެ 2024-25 ގެ ފޮތްތަކުގައި ފަލަސްޠީނުގެ ލޭބަލް ނެގި ކަމަށް ބުނެފައިވެއެވެ. ގުރޭޑް 11 ގެ ތާރީޚު ފޮތެއްގައި "ޒަޔަނިސްޓް ދުޝްމަނު" ގެ ބަދަލުގައި "އިސްތިޢުމާރީ އިސްރާއީލު" ބޭނުންކޮށްފައި ވާ ކަމަށް ރިޕޯޓުގައި ބުނެފައިވެއެވެ.

އަދި ސަޢޫދީ ފޮތެއްގައި ޒަޔަނިސްޓުން "މަކަރުވެރި އަދި ހީލަތްތެރި" ބައެއްގެ ގޮތުގައި ސިފަކޮށްފައި ވާތީ ވެސް އެ ޖަމާޢަތުން އިޢުތިރާޟްކޮށްފައިވެއެވެ.

އިމްޕެކްޓް-އެސްއީ އުފެދިފައިވަނީ އިސްތިއުމާރީ އިސްރާއީލުގެ ދައުލަތާއި ޒަޔަނިސްޓް މުއައްސަސާތަކާ ގާތް ގުޅުން އޮންނަ ފަރާތްތައް އިސްވެ ތިބެ ކަމަށް ރިޕޯޓުތައް ބުނެއެވެ. މެދުއިރުމަތީގެ ޤައުމުތަކުގެ ފޮތްތައް ބަދަލުކުރުމަށް ބާރު އަޅައި ސަރަޙައްދީ ތާރީޚު އިސްރާއީލުގެ ނަޒަރަކުން ޕްރޮމޯޓުކުރާ މި ޖަމާޢަތުން ފަލަސްޠީނާއި ޢަރަބި ފޮތްތަކުން އިސްރާއީލު ބަލައިގަތުން ލާޒިމުކުރާ އިރު އެ ޖަމާޢަތުންނާއި އެ ޖަމާޢަތް އުފެއްދި ފަރާތްތަކުން ފަލަސްޠީނުގެ ދައުލަތް ބަލައިގެންފައެއް ނުވެއެވެ. ވޮޝިންޓަންގެ ޑިޕްލޮމެޓިކް ބާރާ ވެސް ގުޅިގެން ޔަހޫދީންނާ ދެކޮޅު ހަރަކާތްތައް ބެލުމަށް ކަނޑައެޅި ޚާއްޞަ މަންދޫބު އެމްބެސެޑަރު ރެބައި ޔެހޫދާ ކެޕްލައުންގެ މަސައްކަތް މެދުވެރިކޮށް މި ކެމްޕޭނަށް އެމެރިކާއިން އެއްބާރުލުން ދެމުންދެއެވެ.

މި ހުރިހާ ކަމެއް ހިނގަމުންދާއިރު އިސްތިއުމާރީ އިސްރާއީލުގެ ސިޔާސީ ވެރީން މަސްޖިދުލް އަޤްޞާ ތަޅާލައި އެ ތަނުގައި ޔަހޫދީ ފައްޅިއެއް ބިނާކުރުމަށް ގޮވާލަމުންދެއެވެ. ހޯމަ ދުވަހު ރަސްމީކޮށް ފުރަތަމަ ފަހަރަށް ޔަހޫދީން މަސްޖިދުލް އަޤްޞާ ތެރޭގައި ޔަހޫދީ ނަމާދު ކުރުމުގެ ހުއްދަދީފައިވެއެވެ.