ކުލަގަދަ ހަރަކާތްތަކާއެކު "ރާބަދި ޗެލެންޖު 2026" މުބާރާތް ފަށައިފި

ކުލަގަދަ ހަރަކާތްތަކާއެކު މިއަހަރުގެ ރާބަދި ޗެލެންޖު ރަސްމީކޮށް ފަށައިފިއެވެ.

ރާބަދި ޗެލެންޖު 2026 މުބާރާތް ފަށާފައިވަނީ އެކަމަށްޓަކައި ބޭއްވި ހަފްލާއެއްގައެވެ. ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ މެދުގައި ބާއްވާ މި ފޯރިގަދަ މުބާރާޔތް ފެށުމުގެ ހަފްލާ ޝަރަފްވެރިކޮށްދެއްވީ، ކުޅިވަރާބެހޭ ވަޒީރު ޢަބްދުﷲ ރާފިޢުއެވެ. މި ރަސްމިއްޔާތުގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަޙްމަދު ޒާހިރު އާއި ދައުލަތުގެ ބައެއް އިސްވެރިންނާއި މުބާރާތުގެ ގިނަ އަދަދެއްގެ ސަޕޯޓަރުން ބައިވެރިވިއެވެ.

މުބާރާތް އިންތިޒާމްކުރާ ފަރާތުން ބުނީ މިފަހަރުގެ ރާބަދި ޗެލެންޖުގައި އެކި ރިސޯޓްތަކުން 16 ޓީމް ބައިވެރިވާ ކަމަށާއި، މިއީ މި މުބާރާތުގައި މިހާ ގިނަ އަދަދަކަށް ޓީމްތައް ބައިވެރިވި ފުރަތަމަ ފަހަރު ކަމަށެވެ.

މިފަދަ މުބާރާތެއް ބޭއްވުމުގެ މަގުސަދަކީ ރާއްޖޭގެ ޓޫރިޒަމް އެންމެ ބޮޑަށް ފެތުރިފައި އޮތް ރ. އަތޮޅުގެ ރިސޯޓުތަކުގައި މަސައްކަތްކުރާ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫހު އާލާކުރުމެވެ. މީގެ އިތުރުން ރިސޯޓްތަކުގެ މުއައްޒަފުންގެ ހުރި ހުނަރު ދައްކާލުމާއި އެ ކުޅުންތެރިންނަށް އިތުރު ފުރުސަތުތައް ފަހިކޮށްދިނުމެވެ.

މި މުބާރާތަށް ރިސޯޓްތަކުގެ އިސްވެރިންނާއި މެނޭޖްމަންޓްގެ ފަރާތުން ބޮޑު އެއްބާރުލުމެއް ލިބެމުންދާއިރު، މުބާރާތުގެ ފޯރި މިފަހަރު ވަރަށް ގަދަވާނޭކަމަށް ރާބަދި ޓީމުން ބުނެއެވެ.

ރާބަދި ޗެލެންޖުގެ މެޗްތައް ރޭ ފެށިގެންދިޔައިރު މުބާރާތުގެ ފައިނަލް މެޗް ކުޅުމަށް ތާވަލްކޮށްފައިވަނީ، މިހިނގާ އޭޕްރިލްމަހުގެ ފަހުކޮޅެވެ.