20 އަހަރުން ދަށުގެ އޭޝިއަން ޖޫނިއާ ޗެމްޕިއަންޝިޕްގައި ވާދަކުރާ ދިވެހި ޓީމު އިއުލާނުކޮށްފި

އަންނަ މަހު ޔުނައިޓެޑް އަރަބް އެމިރޭޓްސް (ޔޫއޭއީ)ގައި ބާއްވާ 21 ވަނަ އޭޝިއަން ޖޫނިއާ ޗެމްޕިއަންޝިޕްގައި ވާދަކުރާ ރާއްޖޭގެ ގައުމީ ޓީމު އިއުލާނުކޮށްފި އެވެ.

ދުބާއީގައި އޭޕްރިލް މަހުގެ 24-27 އަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި ވާދަކުރާ ރާއްޖޭގެ ޓީމުގައި ހިމަނާފައިވަނީ ދެ އަންހެން އެތްލީޓުންނާއި ދެ ފިރިހެން އެތްލީޓުންނެވެ.

އޭގެ ތެރޭގައި ހިމެނޭ އަންހެން ދެ އެތުލީޓުންނަކީ، ޒީކް އަޝްރަފް ރަޝީދު އާއި ހައްވާ މުޒްނާ ފާއިޒު އެވެ. ފިރިހެން ދެ އެތުލީޓުންނަކީ، ހުސެއިން ޒީކް ސުއާދު އާއި އިބްރާހިމް ނާހިލް ނިޒާރު (ނާނު) އެވެ.

މީގެތެރެއިން ހުސެއިން ޒީކު އަދި ނާހިލް ނިޒާރު ވަނީ މިއަހަރު ބޭއްވުނު މައިލޯ އެސޯސިއޭޝަން ޗެމްޕިއަންޝިޕްގައި ދިވެހި ސިފައިންގެ ކުލަބާއެކު އެމުބާރާތުގެ ޗެންޕިއަންކަން ހޯދާފައެވެ. މުބާރާތުގައި ނާނު ވާދަކުރި ތިން އިވެންޓުގެ ތެރެއިން ލޯންގް ޖަމްޕުން ދެވަނަ ހޯދި އިރު، 100 މީޓަރާއި 200 މީޓަރު ދުވުމުން ތިންވަނަ ހޯދުމުގެ އިތުރުން 100 މީޓަރާއި 400 މީޓަރު ރިލޭ އިވެންޓުން އެއްވަނަ ހޯދި ދިވެހި ސިފައިން ކުލަބުގެ ރިލޭ ޓީމުގައި ހިމެނިފައެވެ.

ހުސެއިން ޒީކު ވަނީ 400 މީޓަރު ދުވުމުން އެއްވަނަ ހޯދުމުގެ އިތުރުން 100 މީޓަރާއި 400 މީޓަރުގެ ރިލޭ އިވެންޓުން އެއްވަނަ ހޯދި ދިވެހި ސިފައިން ކުލަބުގެ ރިލޭ ޓީމުގައި ހިމެނިފައެވެ.

މީގެ އިތުރުން ހައްވާ މުޒްނާ ފާއިޒު އެސޯސިއޭޝަން ޗެމްޕިއަންޝިޕްގެ 200 މީޓަރާއި 400 މީޓަރު ދުވުމުން އިވެންޓުން އެއްވަނަ ހޯދުމުގެ އިތުރުން 100 މީޓަރާއި 400 މީޓަރުގެ އަންހެން ރިލޭ އިވެންޓުން އެއްވަނަ ހޯދި ޓީމުގައި ހިމެނިފައެވެ. އަދި ޒީކް އަޝްރަފް ރަޝީދު ވަނީ 800 މީޓަރާއި 1500 މީޓަރު ދުވުމުން ދެވަނަ ހޯދާފައެވެ.

މީގެ ތެެރެއިން ބައެއް އެތުލީޓުންނަކީ ބައިނަލްއަގުވާމީ ބޮޑެތި މުބާރާތްތަކުގައި ވެސް ރާއްޖެ ތަމްސީލްކޮށްފައިވާ އެތުލީޓުންނެވެ. އެ ގޮތުން، ވޭތުވެދިޔަ ދެ އަހަރު ތެރޭގައި ބޭއްވި ބައެއް މަލްޓި ސްޕޯޓްސް ގޭމްސްތަކުގައި މި އެތުލީޓުން ވަނީ ވާދަކޮށްފަ އެވެ.