ޕެންޝަން އޮފީހުގެ ބޯޑު މެންބަރުންގެ އަދަދު އިތުރުކޮށް ގަވާއިދަށް ބަދަލު ގެނެސްފި

މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑު މެންބަރުންގެ އަދަދު ނުވަޔަކަށް އިތުރުކޮށް، އެ އޮފީހުގެ ހިންގާ ގަވާއިދަށް އިސްލާހު ގެނެސްފިއެވެ.

ޕެންޝަނާ ބެހޭ ގާނޫނާ އެއްގޮތަށް އެ އޮފީހުގެ މަސައްކަތްތައް ބަލަހައްޓަމުން ގެންދަނީ އެގްޒެކެޓިވް ބޯޑަކުން ކަމަށްވާއިރު، ކުރިން އަމަލުކުރަމުން އައި ގަވާއިދުގައި ބަޔާންކޮށްފައިވާ ގޮތުން ބޯޑުގައި ތިއްބަވަނީ ޖުމްލަ އަށް މެންބަރުންނެވެ.

ނަމަވެސް، އަލަށް ގެނައި ބަދަލާއެކު މިހާރު އެ ބޯޑުގައި ނޮން-އެގްޒެކެޓިވް ނުވަ މެންބަރުން ތިއްބަވާނެއެވެ.

އަލަށް ގެނެވުނު އިސްލާހުގެ ދަށުން ބޯޑު އެކުލެވިގެންވާ ގޮތަކީ:

- ބޯޑުގެ ޗެއާޕާސަން

- ދައުލަތުގެ މާލިއްޔަތާ ބެހޭ ވުޒާރާގެ ސިވިލް ސާވިސްގެ އިސް އޮފިޝަލެއް

- އިޖުތިމާއީ ރައްކާތެރިކަމާ ބެހޭ ވުޒާރާގެ ސިވިލް ސާވިސްގެ އިސް އޮފިޝަލެއް

- ވަޒީފާއާ ބެހޭ ކަންކަން ބަލަހައްޓާ ވުޒާރާގެ ސިވިލް ސާވިސްގެ އިސް އޮފިޝަލެއް

- ޕްރައިވެޓް ސެކްޓާ (އަމިއްލަ ދާއިރާ) ތަމްސީލުކުރާ ފަސް މެންބަރުން

މީގެ އިތުރުން، ޕެންޝަން އޮފީހުގެ ގަވަނަންސް ކޯޑަށް ގެނައި އިސްލާހާއެކު، ޕެންޝަން އޮފީހުގެ ދުވަހުން ދުވަހަށް ކުރާ ހިންގުމުގެ މަސައްކަތް ބަލަހައްޓާނީ، ސީއީއޯއެވެ. އަދި، އެ އޮފީހުގެ ސިޔާސަތުތަކާއި ނިންމުންތައް ތަންފީޒުކުރާނީ، ސީއީއޯގެ އިރުޝާދާއި ބެލުމުގެ ދަށުން މެނޭޖުމަންޓުންނެވެ.

ޕެންޝަނާ ބެހޭ ގާނޫނުގެ 8 ވަނަ މާއްދާގެ (ހ) ގައިވާ ގޮތުގެ މަތިން މި ބަދަލު ގެނެސްފައިވާއިރު، މީގެ މައިގަނޑު ބޭނުމަކީ ޕެންޝަން އޮފީހުގެ ހިންގުން އިތުރަށް ހަރުދަނާކޮށް، އަމިއްލަ ދާއިރާގެ ބައިވެރިވުން އިތުރުކުރުމެވެ. މީގެ ކުރިން އަމިއްލަ ދާއިރާ ތަމްސީލުކުރާ މެންބަރުންގެ އަދަދަކީ ހަތަރެކެވެ. ނަމަވެސް މި ބަދަލާއެކު އެ އަދަދު މިހާރު ވަނީ ފަހަކަށް އިތުރުކުރެވިފައެވެ.