ރޮނާލްޑޯ އެނބުރި ފޯމަށް، އުޒްބެކިސްތާނު އަތުން ޕޯޗްގަލްއަށް ބޮޑު މޮޅެއް

ވަރލްޑްކަޕް ފުޓްބޯޅަ މުބާރާތުގެ ގްރޫޕް ކޭގައި ރޭ ޕޯޗްގަލް އާއި އުޒްބެކިސްތާން ބައްދަލުކުރިމެޗް ތަފާތުބޮޑު ނަތީޖާއަކުން ޕޯޗްގަލް ކާމިޔާބުކޮށްފައެވެ.

މިމެޗް ޕޯޗްގަލް ކާމިޔާބުކުރީ 5-0 ގެ ނަތީޖާއަކުންނެވެ. މިމެޗް ފެށުނުއިރުވެސް އެންމެންގެ ނަޒަރުގޮސް ހުއްޓުނީ ކްރިސްޓިއާނޯ ރޮނާލްޑޯއަށެވެ. ކުރީ މެޗާ ހިލާފަށް ރޭގެ މެޗްގައި ރޮނާލްޑޯ އަދި ޕޯޗްގަލްގެ ޓީމުގެ ފަރާތުން ފެނިގެންދިޔައީ މާބޮޑަށްވެސް ރޭވުންތެރިކަމާއެކު ގުޅިގެން ކުޅުނުތަނެވެ. ނަތީޖާއަކަށް ވެގެންދިޔައީ ރޮނާލްޑޯގެ އިތުރުން ޕޯޗްގަލަށްވެސް ގިނަ ގޯލްތަކެއް ޖެހުމެވެ.

މިމެޗްގައި ރޮނާލްޑޯ ވަނީ ދެ ލަނޑު ޖަހައި އޭނާއަށް ލަނޑު ނުޖެހޭކަމަށް ދައްކަމުންގެންދާ ވާހަކަތަކަށް ރައްދު ދީފައެވެ. ރޮނާލްޑޯ ފުރަތަމަ ލަނޑު ފެނިގެންގޮސްފައިވަނީ، ހަވަނަ މިނެޓް ތެރޭގައެވެ. ރޮނާލްޑޯ ލަނޑެއް ޖެހިތާ 11 މިނެޓްފަހުން މެންޑެޒް ވަނީ އިތުރު ލަނޑެއް ޖަހައި 17 ވަނަ މިނެޓް ތެރޭގައި މެޗްގެ ނަތީޖާ 2-0 ބަދަލުކޮށްފައެވެ.

މެޗްގެ 29 ވަނަ މިނެޓް ތެރޭގައި އުޒްބެކިސްތާނުން ލަނޑެއް ޖެހިނަމަވެސް ވީއާރު ބެލުމަށްފަހު ރެފްރީ ނިންމީ އެއީ ލަނޑެއް ނޫންކަމަށެވެ. ފުރަތަމަ ހާފް ނިމުމުގެ ކުރިން ރޮނާލްޑޯ އިތުރު ލަނޑެއް ޖަހައި ޕޯޗްގަލްގެ ލިޑް ވަނީ 3-0 ފުޅާކޮށްދީފައެވެ. ޕޯޗްގަލްގެ ހަތަރުވަނަ ލަނޑަކީ އުޒްބެކިސްތާން ކުޅުންތެރިއެއްގެ އަތުން ބައިކޮޅަށްވަތް ލަނޑެކެވެ. މެޗްގައި ޕޯޗްގަލްގެ ފަސްވަނަ ލަނޑު ޖަހައިދިނީ ބަދަލުކުޅުންތެރިއެއްގެ ގޮތުގައި ކުޅެން ނިކުތް ރަފައެލް ލެއާއޯ އެވެ.