މިއަދު މިއޮތީ ތަފާތު ވައްތަރެއްގެ މެގްނަމް ޕުޑިން އެއްްގެ ރެސިޕީ

މެގްނަމްޕުޑިން އަކީ ވަރަށް ގިނަ މީހުންނަށް ކަމުދާ މީރު އެއްޗަކަށްވާއިރު، ހުކުރު ދުވަހާއި އެކިއެކި ހަފްލާ ތަކުގައި ކާލަންވެސް މީހުން އެ ތައްޔާރުކޮށް އުޅެއެވެ. މިއަދު ވޮއިސްގެ ބަދިގެއިން މި ގެނެސްދެނީ ޕާނުން ތަފާތު ގޮތަކަށް މެގްނަމް ޕުޑިން ތައްޔާރު ކުރާނެ ގޮތުގެ ރެސިޕީއެވެ.

މެގްނަމް ޕުޑިންއަށް ބޭނުންވާ ތަކެތި

1 ފުލްކްރީމް މިލްކް ޕެކެޓް (ބޮޑު)

1 ދަޅު ގެރިކިރު

3 ބިސް

10ގ އަންސޯލްޓެޑް ބަޓާ

2 މޭޒުމަތީ ސަމުސާކޯން ފްލާ

12 ޕާން (ޓޯސްޓް ކޮށްފައި)

1 ސައި ސަމުސާ ވެނީލާ އެސެންސް

ހަކުރު ސިރަޕް

5 މޭޒުމަތީ ސަމުސާ ހަކުރު

10ގ އަންސޯލްޓެޑް ބަޓާ

ޓޮޕިންގްސް

1 ނެސްލޭ ކްރީމް ދަޅު

1 ޖޯޑު މެލްޑެޓް ޗޮކޮލެޓް

2 މޭޒުމަތީ ސަމުސާ ގެރިކިރު

ތައްޔާރުކުރާނެ ގޮތް

1) މެގްނަމްޕުޑިން ތައްޔާރު ކުރުމަށް، ޕާން ނޫން ދެން ހުރި ހުރިހާ ތަކެތި މިކްސްސަރަށް އަޅައިގެން ރަނގަޅަށް މިކްސް ކޮށްލާށެވެ. ފުލްކްރީމް މިލްކު ޕެކެޓްގެ އަޅާނީ އެއްބަޔެެވެ.

2) ދެން ބާކީ ކިރާއި މިކްސް ކުރި އެއްޗެހި ތެއްޔަކަށް އަޅައި މެދު ގިނީގައި ރަނގަޅަށް ހަލުވަމުން އޮލަވަންދެން ކައްކާލާށެވެ.

3) ދެން ހަކުރު މެލްޓް ކޮށްލުމަށްފަހު ބަޓަރު އަޅައިގެން ހަކުރު ސިރަޕް ތައްޔާރުކޮށްލާށެވެ.

4) އެއަށްފަހު، ޓެރޭގައި ގާތްގަނޑަކަށް 6 ޕާންފޮތި އަތުރާލުމަށްފަހު އޭގެ މައްޗަށް ހަކުރު ސިރަޕް އަޅާލުމަށްފަހު މަތީގައި ޕުޑިން ލެޔާއެއް ހަދާލާށެވެ. އަނެއްކާވެސް މިގޮތަށް އަނެއް ލެޔާ ހަދާލުމަށްފަހު 2 ގަޑިއިރު ވަންދެން ފިނި ކޮށްލާށެވެ.

5) ދެން ޓޮޕިންގްސް ހެދުމަށް ބޭނުންވާ ހުރިހާ ތަކެތި ހެންޑް މިކްސްސަރަކުން މިކްސް ކޮށްލުމަށްފަހު ފިނިކުރި ޕުޑިންގ ގެ މަތީގައި އަތުރާލާށެވެ.

ރަނގަޅަށް ފިނި ކޮށްލައިގެން ކާލަން މިއީ ވަރަށް މީރު ފޮނި އެއްޗެކެވެ.