އަދީބު ވިދާޅުވެ ދެއްވީ ރާއްޖޭގެ ޑްރަގްގެ ހާލަތު؛ މިހާރު ބޭނުންކުރަނީ ދެ ބާވަތް އެއްކޮށް، ވަރަށް ނުރައްކާ

ރާއްޖޭގައި އޮތް އިޖްތިމާއީ އެންމެ ބޮޑު މައްސަލަ އަކީ މަސްތުވާތަކެތީގެ މައްސަލަ އެވެ. އެ ވަބާގައި ޖެހޭ މީހުންގެ އަދަދު އަދިވެސް ދަނީ އިތުރުވަމުންނެވެ. ހާއްސަކޮށް ޒުވާނުންނެވެ. ކަންބޮޑުވާން ޖެހޭ ފަދަ ދަރަޖައަކަށް އެ ވަބާ ވަނީ ފެތުރިފަ އެވެ.

މަސްތުވާތަކެތީގެ މައްސަލައަށް ދާއިމީ ހައްލެއް ހޯދާ ދިނުމަކީ ކޮންމެ ސަަރުކާރެއްގެވެސް ވައުދެކެވެ. ނަަމަވެސް މިހާތަނަށް އެކަމުގައި އެކަށީގެންވާ ކާމިޔާބެއް ހޯދިފައެއް ނުވެ އެވެ. ރާއްޖޭގައި މިހާރު އޮތީ މަސްތުވާތަކެތީގެ ވަރަށް ނުރައްކާތެރި ޓްރެންޑެއް އުފެދިފަ އެވެ.

އެ ހާލަތު ވަރަށް ތަފްސީލުކޮށް ޖާނީގެ ގްލޯބަލް ރިކަވަރީ ކޯޗު އަލީ އަދީބު ވަނީ ވިދާޅުވެ ދެއްވާފަ އެވެ. ޖާނީ އަކީ މަސްތުވާތަކެތީގެ ވަބާގައި ޖެހިފައިވާ މީހުން އެކަމުން ދުރުކުރުމަށް އެހީވެދޭ ޖަމިއްޔާ އެކެވެ. އެފަދަ މީހުންގެ ބެލެނިވެރީންނާއި އާއިލާތަކަށް ބޭނުންވާ އެހީތެރިކަމާއި ސަޕޯޓްވެސް ދެ އެވެ.

އަދީބު ވިދާޅުވި ގޮތުގައި ރާއްޖޭގައި މެތައެންފެޓަމައިން (މެތު) ފެތުރިފައިވަނީ ކަންބޮޑުވާން ޖެހޭ ދަރަޖައަކަށެވެ. އެ ބާވަތުގެ ޑްރަގް, ރާއްޖޭގެ ހުރިހާ ހިސާބަކުން ވެސް މިހާރު ލިބެ އެވެ. އެ ބޭނުންކުރާ މީހުން ހުރިހާ ސަރަހައްދެއްގައި އެބަ ތިއްބެވެ.

އެއަށްވުރެ ނުރައްކާތެރި ކަމެއްގެ ގޮތުގައި އަދީބު ފާހަގަ ކުރެއްވީ ގިނަ މީހުން މިހާރު ޑްރަގް ނަގާ ގޮތެވެ. އަދީބު ވިދާޅުވި ގޮތުގައި ގިނަ މީހުން މިހާރު މަސްތުވަނީ ދެ ބާވަތެއް އެއްކޮށްގެންނެވެ.

"އޯޕިއޮއިޑްސްއާ މެތު ބޭނުންކުރާ މީހުން މިހާރު މި ފެންނަނީ. ދެ [ބާވަތެއްގެ] މަސްތުވާއެއްޗެއް. މި ދެ ވައްތަރެއްގެ މަސްތުވާއެއްޗެހިވީމަ މިކަމުން ހަގީގަތުގައި އެބަ ފަރުވާ ދިނުމުގައިވެސް އިތުރު އުނދަގޫތަކެއް ދިމާވޭ. އަދި ޑިޓޮކްސްފައި ކުރުމުގައިވެސް އުނދަގޫތަކެއް އެބަ ދިމާވޭ އަސްލު," އަދީބު ވިދާޅުވި އެވެ.

މި ފަހުން ޑްރަގް މައްސަލަތަކުގައި އަތުލައިގަންނަ ގިނަ މީހުން ދެ ބާާވަތަށް ބައެއް ފަހަރު ތިން ބާވަތަށްވެސް ޕޮޒިޓިވް ވެ އެވެ. މާނައަކީ އެއް ފަހަރާ އެކި ބާވަތްތަކުގެ މަސްތުވާތަކެތި ބޭނުން ކޮށްފައިވުމެވެ. ނުވަތަ އެކި ބާވަތްތައް އެއްކޮށްގެން ބޭނުންކުރުމެވެ.

އިއްޔެ ވިލިމާލެއިން ހައްޔަރުކުރި މީހުންގެ ތެރެއިން ހަތަރު މީހުން ވެސް އެއް ބާވަތަށް ވުރެ ގިނަ ބާވަތުގެ މަސްތުވާތަކެއްޗަށް ވަނީ ޕޮޒިޓިވްވެފަ އެވެ. ބައެއް މީހުން ތިން ބާވަތަށް ޕޮޒިޓިވް އެވެ. އެގޮތުން އެމްއޭޕީ އާއި ސީއޭޓީ އަދި ޓީއެޗްސީއަށް ޕޮޒިޓިވްވެފައިވާކަން ކޯޓް އަމުރުގައިވެ އެވެ.

މުޖްތަމައުން އެކަންބޮޑުވުމެއް ނުފެނޭ, އިދާރާތައް ހިމޭނުން

އަދީބު ވިދާޅުވި ގޮތުގައި ރާއްޖޭގައި މެތު ފަދަ ނުރައްކާތެރި މަސްތުވާތަކެތީގެ ބާވަތެއް މިހާ ބޮޑަށް ފެތުރެމުންދާއިރު އެކަމުގެ ކަންބޮޑުވުމެއް މުޖްތަމައުގައި ނެތެވެ. ހާއްސަކޮށް ކަމާގުޅޭ އިދާރާތަކުން އެކަމާއި ގުޅިގެން ކަންބޮޑުވެގެން ކަމެއްް ކުރާތީއެއް ނުފެނެ އެވެ.

ޖާނީން އިސްވެ އެކަން ނެޝަނަލް ޑްރަގް އެޖެންސީ (އެންޑީއޭ)ގެ ސަމާލު ކަަމަށް ވެސް ވަނީ ގެނެސްފަ އެވެ. ނަމަވެސް މެތާ އިދިކޮޅަށް އެކަށީގެންވާ އެއްވެސް މިންވަރަށް މަަސައްކަތެއް ނުކުރެވެ އެވެ.

އަދީބު ވަނީ އަލަށް އެ ވަބާގެ ތެރެއަށް ވަންނަ ކުދީންވެސް ދެ ބާވަތުގެ މަސްތުވާތަކެތި ހޯދައިގެން އެކުގައި ބޭނުން ކުރަމުންދާކަން ފާހަގަކޮށްފަ އެވެ. އެއީ މުޅި މުޖްތަމައުއަށް ބޮޑު ނުރައްކަލެއް ކަމުގައި ވިދާޅުވި އެވެ.

އެކަންކަން ހައްލުކުރަން ސަރުކާރުތަކުން ހަރުދަނާ އަދި ރަނގަޅު ސިޔާސަތެއް ނުގެންގުޅޭ ކަމީ ކަންބޮޑުވާން ޖެހޭ ކަމެއް ކަމަށްވެސް ވިދާޅުވި އެވެ.

ދެ ބާވަތް އެކުގައި ބޭނުންކުރުން; ބޮޑެތި ގެއްލުންތަކެއް

މެތައެންފެޓަމައިން އާއި އޯޕިއޮއިޑްސް އެއްކޮށް ބޭނުންކުރުމުން ހަށިގަނޑަށް ނުރައްކާތެރި އަދި ލަފާކުރަން ދަތި ބަދަލުތަކެއް އާދެ އެވެ. ސަބަބަކީ މެތަކީ ސިޓްމިއުލަންޓަކަށްވުމެވެ. އެއީ ސިކުނޑި އާއި ލޭ ހިނގުން އަވަސްކުރާ ޑްރަގެކެވެ. އޯޕިއޮއިޑްސް އަކީ ސިކުނޑީގެ ހިނގުން ދަށްކޮށް ނޭވާލުމުގެ ނިޒާމު ލަސްކޮށްލާ ޑްރަގެކެވެ.

މި ދެ ޑްރަގް އެކުގައި ބޭނުންކުރުމުން ކުރު މުއްދަތެއްގެ ތެރޭގައި ފެންނަ ނޭދެވޭ އަސަރުތަކުގެ ތެރޭގައި ހިތުގެ ހިނގުމަށް ނޭދެވޭ ބާރުބޮޑުވުމާއި ޝައްކުބަލީގެ އާދަޔާ ހިލާފު ހިޔާލުތައް އުފެދުމާއި ބޮޑުތަނުން ހަށިގަނޑުން ފެންމަދުވުމުން ހިމެނެ އެވެ. އަދި ދިގު މުއްދަތަކަށް މި ތަކެތި އެއްކޮށް ބޭނުންކުރުމުން މަސްތުވާތަކެއްޗަށް އިންތިހާއަށް ދެވި ހިފާ ސިކުނޑީގެ ނާރުތަކަށް ދާއިމީ ގެއްލުން ލިބި, ވިސްނުމުގެ ބާރު ދެރަވެ, ބޮޑެތި ނަފްސާނީ ބަލިތައް ތަހަންމަލު ކުރަން ޖެހެ އެވެ.

މީގެ އިތުރުން ސްޓްރޯކް ޖެހުމާއި ހިތް ހުއްޓުމުގެ ފުރުސަތު އިތުރުވެ އަދި ލޭގެ ޒަރިއްޔާއިން ވާސިލުވާ ނުރައްކާތެރި ގައިންގަޔަށް އަރާ ބަަލިތައް ޖެހުމުގެ ރިސްކު ވަރަށް ބޮޑަށް މަތިވެގެންދެ އެވެ.