ޓޫރިސްޓުން އަންނަ އަދަދު މިދުވަސްކޮޅު ދަށްވިނަމަވެސް، މިދިޔަ އަހަރަށްވުރެ ރަނގަޅު

ރާއްޖެއަށް ޒިޔާރަތްކުރާ ޓޫރިސްޓުން އަންނަ އަދަދު މިދުވަސްކޮޅު ދަށްވިނަމަވެސް، މިދިޔަ އަހަރަށްވުރެ ރަނގަޅުކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު،މިހާރު ކޮންމެ ދުވަހަކު ރާއްޖެއަށް ޒިޔާރަތްކުރާ ފަތުރުވެރިންގެ ނިސްބަތް އުޅެނީ 4 ހާހާއި 3 ހާހާދެމެދުގެ އަގުތަކެއްގައެވެ.

މި ދުވަސްވަރަކީ ރާއްޖޭގެ ޓޫރިޒަމްގެ އެންމެ ދަށްދުވަސްވަރުގެ ގޮތުގައި ފާހަގަކުރާ ދުވަސްކޮޅެވެ. ރާއްޖެއަށް ޒިޔާރަތްކުރާ ފަތުރުވެރިންގެ މިމަހުގެ ތެރޭގައި ދަށްވިނަމަވެސް މިދިޔަ އަހަރަށްވުރެ މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރެވެ.

އަހަރުގެ މިހާތަނަށް ރާއްޖެއަށް 915,853 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 8 އިންސައްތައިގެ އިތުރުވުމެކެވެ. މިދިޔަ އަހަރު މެއިމަހުގެ 19 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ، 846,978 ފަތުރުވެރިންނެވެ.

އަހަރުގެ މިހާތަނަށް ރާއްޖެއަށް އެންމެގިނައިން ފަތުރުވެރިން ޒިޔާރަތްކޮށްފައިވަނީ، ޗައިނާއިންނެވެ. އެއީ 105,923 ފަތުރުވެރިންނެވެ. ދެވަނައަށް އެންމެގިނަ މީހުން ޒިޔާރަތްކުރީ ރަޝިއާއިންނެވެ. އެއީ 98,854 ފަތުރުވެރިންނެވެ.

މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، ޓޫރިޒަމް މިނިސްޓްރީގެ އަމާޒަކީ މިއަހަރު ނިމުމުގެ ކުރިން އެއަދަދު 2.2 މިލިއަނަށް އިތުރުކުރުމެވެ. މިއަހަރުގެ މިހާތަނަށް ރާއްޖެއަށް 915,853 ފަތުރުވެރިން ޒިޔާރަތްކުރިއިރު، އެއް މިލިއަން ހަމަވާން ދެން ބޭނުންވަނީ، 68،875 މީހުންނެވެ.