ނުހެދި އޮތް 161 ރަށާއި ފަޅު؛ އުސޫލެއް ހަދައިފި، ރަށްތަކާއި ފަޅުތައް ނަގަނީ

ޓޫރިޒަމަށް ތަރައްގީކުރުމަށް ދޫކޮށްފައިވާ ރަށްތަކާއި ފަޅުތަކުގެ ތެރެއިން 161 މަޝްރޫއެއް ނުނިމި އެބައޮތް ކަމަށާ ކަނޑައެޅިފައިވާ ތާރީހަށް ނުނިމި ދިގުލައިގެންގޮސްފައިވާ ތަންތަނުގެ އެއްބަސްވުންތައް ބާތިލުކުރެވޭނެ ގޮތްތަކެއް ކަނޑައަޅާ އަމަލު ކުރަން ތައްޔާރުވެފައިވާ ކަމަށް ޓުއަރިޒަމް މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު އަމީން މިހެން ވިދާޅުވީ މިރޭ އޮތް "އަހާ" ފޯރަމްގައި ވާހަކަފުޅު ދައްކަވަމުންނެވެ. ޓޫރިޒަމަށް ތަރައްގީކުރުމަށް ދޫކޮށްފައިވާ ރަށްތަކާއި ފަޅުތައް ނުނިމި ދިގުލައިގެން ދިއުމަކީ ރައްޔިތުންގެ ވަރަށް ބޮޑު ކަންބޮޑުވުމެކެވެ.

އެކަންބޮޑުވުން ހިއްސާކުރުމުން މިނިސްޓަރު ވިދާޅުވީ ނުހެދި އޮތް 161 ރަށާއި ފަޅެއް އެބަ އޮތް ކަމަށެވެ. އޭގެ ތެރެއިން ބައެއް ތަންތަނަކީ މީގެ 25 ނުވަތަ 20 އަހަރުވެފައިވާ ތަންތަން ކަމަށާ ބައެއް ތަންތަން ނުހެދި 10 އަހަރާއި 12 އަހަރުވެފައިވާ ކަމަށެވެ.

އެތަންތަން ނުނިމުނު ނަމަވެސް މިހާތަނަށް އެކަމާއި ގުޅިގެން އެކަށީގެންވާ ފިޔަވަޅެއް އެޅިފައިނެތް ކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ މިއީ އެގޮތަށް ދޫކޮށްލެވެން އޮތް ކަމެއް ނޫން ކަމަށާ މިފަދަ ކޮންމެ ފަޅަކާއި ރަށަކީ ރައްޔިތުންގެ ހައްގުތައް އޮތް ތަންތަން ކަމަށެވެ.

މި ރަށްރަށާއި ފަޅުތައް ދޫކުރަނީ ވަކި މުއްދަތެއްގައި ހުޅުވަން ލާޒިމުކޮށްކަން ފާހަގަކޮށް މިނިސްޓަރު ވިދާޅުވީ މަޝްރޫއު ނުނިމި ބައެއް ބިންތަކުން 600 މިލިއަނެއްހާ ޑޮލަރު ދައްކަން ޖެހިފައި އެބައޮތް ކަމަށެވެ. މިއީ ހައްލުވާން ޖެހޭ ކަންކަން ކަމަށް ރައީސް ޑރ. މުހައްމަދު މުޢިއްޒު ގަބޫލުފުޅު ކުރައްވާ ފިޔަވަޅުތަކއް އެޅުމަށް ނިންމަވާފައިވާ ކަމަށް މިނިސްޓަރު ވިދާޅުވި އެވެ.

އެގޮތުން ސީޕީ ރެގިއުލޭޝަން ހަތަރު ކެޓަގަރީއަކަށް ބަހާފައި ބާތިލުކުރެވޭނެ ގޮތްތަކެއް ކަނޑައަޅާ އެކަމުގެ އުސޫލު ގެޒެޓްކޮށްފައިވާ ކަމަށް މިނިސްޓަރު ވިދާޅުވި އެވެ. އަދި ކުރިއަށް އޮތް ހަފްތާތެރޭ އަމަލީ ގޮތުން ފިޔަވަޅު އަޅާނެ ކަމަށް ވިދާޅުވި އެވެ.

"އަޅުގަނޑު ޤަބޫލުކުރާ ގޮތުގައި ރައްޔިތުންގެ ޙައްޤުގައި ރައީސް ނިންމެވި ވަރަށް މުހިންމު ނިންމުމެއް މިއީ. އެއީ މި ރަށްރަށަކީ ރައްޔިތުންގެ ތަންތަން," މިނިސްޓަރު އަމީން ވިދާޅުވި އެވެ.