މިދިޔަ މަހު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާ އާއި ރަޝިޔާއިން

މިދިޔަ ސެޕްޓެމްބަރު މަހު ދިވެހިރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާ އާއި ރަޝިޔާއިން ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ ތަފާސްހިސާބުތަކުން ހާމަވެއްޖެއެވެ.

މިދިޔަ އަހަރުގެ ސެޕްޓެމްބަރު މަހު 151،114 ފަތުރުވެރިން ރާއްޖެ އައިސްފައިވާއިރު މިއީ އެއިރާ ބަލައި 0.2 އިންސައްތައިގެ ދަށްވުމެކެވެ. ސެޕްޓެމްބަރު މަހު ދުވާލެއްގެ މައްޗަށް އެވެރެޖްކޮށް 5،872 ފަތުރުވެރިން ރާއްޖެ އައިސްފައިވާއިރު އެ މަހުގެ 26 ވަނަ ދުވަހު އެކަނި 6،284 ފަތުރުވެރިން ޒިޔާރަތްކޮށް މަހުގެ އެންމެ ގިނަ ފަތުރުވެރިން އައި ދުވަހަކަށް އެ ދުވަސް ވެފައިވެއެވެ.

މި އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް ޖުމްލަ 1،603،021 ފަތުރުވެރިން ރާއްޖެ ޒިޔާރަތްކޮށްފައިވެއެވެ. ނިމިދިޔަ އަހަރުގެ މި މުއްދަތާ އަޅާބަލާއިރު މިއީ 3.4 އިންސައްތައިގެ ދަށްވުމެކެވެ. އެންމެ ގިނައިން ފަތުރުވެރިން އައީ ޗައިނާއިން ކަމަށްވާއިރު އެ ޤައުމުން 300،977 ފަތުރުވެރިން އައިސްފައިވެއެވެ. ދެވަނައިގައި ރަޝިޔާ އޮތީ 229،236 ފަތުރުވެރިންނާ އެކުގައެވެ. ތިންވަނައިގައި 119،968 ފަތުރުވެރިންނާ އެކު އިނގިރޭސިވިލާތް އޮތްއިރު ޖަރުމަނުވިލާތުން 99،062 ފަތުރުވެރިން އަދި އިޓަލީވިލާތުން 98،039 ފަތުރުވެރިން ޒިޔާރަތްކޮށްފައިވެއެވެ.

މީގެ އިތުރުން 1،158،404 ފަތުރުވެރިން ޗުއްޓީ ހޭދަކުރީ ރިސޯޓުތަކުގައެވެ. ގެސްޓްހައުސްތަކުގައި 345،220 ފަތުރުވެރިން ތިބިއިރު ހޮޓާތަކުގައި 36،106 ފަތުރުވެރިން އަދި ސަފާރީ އުޅަނދުތަކުގައި 29،679 ފަތުރުވެރިން ޗުއްޓީ ހޭދަކޮށްފައިވެއެވެ.

ވައިގެ މަގުން 1،587،438 ފަތުރުވެރިން ރާއްޖެ އެތެރެވެފައިވާއިރު މީގެ ތެރެއިން ގާތްގަނޑަކަށް ހުރިހާ ފަތުރުވެރިންހެން އައީ ވެލާނާ އިންޓަރނޭޝަނަލް އެއާޕޯޓް މެދުވެރިކޮށެވެ.

އެ ގޮތުން، ގަން އިންޓަރނޭޝަނަލް އެއާޕޯޓުން 5،606 ފަތުރުވެރިންނާއި މާފަރު އިންޓަރނޭޝަނަލް އެއާޕޯޓުން 5،032 ފަތުރުވެރިންނާއި ހަނިމާދޫ އިންޓަރނޭޝަނަލް އެއާޕޯޓުން 3،331 ފަތުރުވެރިންނާއި މާމިގިލީ އެއާޕޯޓުން 2،971 ފަތުރުވެރިން އަދި ދާލު އެއާޕޯޓުން 1،284 ފަތުރުވެރިން އެތެރެވެފައިވެއެވެ.

ކުރިއަށް އޮތް ޕީކް ސީޒަނާ ދިމާކޮށް ފަތުރުވެރިންގެ އަދަދު އިތުރުވެގެންދާނެ ކަމަށް ސަރުކާރާއި ދާއިރާގެ ހިއްސާދާރުން ފާހަގަކުރެއެވެ.