ފުރަތަަމަ މެޗުގައި ކޯކޯ ބަލިކޮށް ރަށްގުޑުވާ އިން މުބާރާތުގެ ފެށުން ރަނގަޅުކޮށްފި

ރ.އަތޮޅު ކިނޮޅަސްގައި ހުކުރުދުވަހުގެ ރޭ ފެށި "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ފުރަތަަމަ މެޗުގައި އެންމެ ފަހުގެ ޗެމްޕިއަން ރަށްގުޑުވާ އާއި ކޯކޯ ވާދަކުރި މެޗު 3-2 ސެޓް ކާމިޔާބުކޮށް ރަށްގުޑުވާ އިން މުބާރާތުގެ ފެށުން ރަނގަޅުކޮށްފި އެވެ.

ކުލަގަދަ ރަސްމިއްޔާތަކާއެކު މިރޭ ފެށުނު މި މުބާރަތުގެ ފުރަތަަމަ މެޗު ޝަރަފުވެރިކޮށްދެއްވީ ދިގަލި މޯލްޑިވްސްގެ ޓްރާންސްޕޯޓް މެނޭޖަރ އިލްހާމް އެވެ.

މިރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިސެޓް 23-25 އިން ކާމިޔާބުކުރީ ކޯކޯ އެވެ. ނަމަވެސް ޖެހިގެން އައި ދެ ސެޓުގައި ރަށްގުޑުވާ އިން ވަނީ މޮޅަށް ކުޅެ ފަސޭހަކަމާއި އެކު 25-14 އަދި 25-13 އިން މި ދެސެޓް ވެސް ކާމިޔާބުކޮށްފައެވެ.

ނަމަވެސް މެޗުގެ ހަތަރުވަނަ ސެޓުގައި ކޯކޯ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިސެޓް އެޓީމުން ކާމިޔާބުކުރީ ފަސޭހަކަމާއި އެކު 14-25 އިންނެވެ. މިއާއެކު މެޗުގެ ނަތީޖާ ނެރުމަށްޓަކައި ކުޅެވުނު ފަސްވަނަ ސެޓް ވާދަވެރި ކުޅުމަކަށްފަހު 16-14 އިން ކާމިޔާބުކުރީ ރަށްގުޑުވާ އިންނެވެ.

މިއާއެކު މެޗުގެ ކުޅުން ނިމިގެންދިޔައީ 3-2 ސެޓުން ރަށްގުޑުވާ ކުރީގައި އޮވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ރަށްގުޑުވާ ޓީމުގެ މުހައްމަދު ޒިޔާދު އެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލްގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށެވެ.

މިއަހަރުގެ މުބާރާތުގައި އެންމެ ފަހުގެ ޗެމްޕިއަން ރަށްގުޑުވާގެ އިތުރުން ދެން ބައިވެރިވެފައި ވަނީ ކޯކޯ، ބޭރިއަންސް އަދި ހޭވައްލަ އެވެ. އަދި މިއަހަރުގެ މުބާރާތުގެ މެއިން ސްޕޮންސަރަކީ ކަސާރީ މޯލްޑިވްސް ޕްރައިވެޓް ލިމިޓެޑެވެ. އަދި މިމުބާރަތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.