ދެވަނަ މެޗުން ވެސް މޮޅުވެ ޓެންޓް ސްޕޯޓްސް ކުލަބުން ކުއާޓާގެ ފުރުސަތު ބޮޑުކޮށްފި

އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގެ ގުރޫޕް ބީގައި އަންގާރަދުވަހުގެ ހަވީރު 5-1 ގެ ނަތީޖާއަކުން ދަ ގްރާންޑޭ އަތުން މޮޅުވެ ޓެންޓް ސްޕޯޓްސް ކުލަބުން ގުރޫޕްގެ އެއްވަނައަށް ކުރިއަށް ޖެހިލައިފިއެވެ.

ކުޅެވުނު މެޗުގައި ދަ ގްރާންޑޭ ސްޕޯޓް ކްލަބާއި ވާދަކޮށް 5-1 ގެ ނަތީޖާއަކުން މޮޅުވެ ޓެންޓް ސްޕޯޓްސް ކުލަބުން ގުރޫޕްގެ އެއްވަނައަށް ކުރިއަށް ޖެހިލައިފި އެވެ.

މުބާރާތުގައި ދަ ގްރާންޑޭގެ ފުރަތަަމަ މެޗު ނިއުރޭޑިއަންޓް ސްޕޯޓްސް ކުލަބާއި ދެކޮޅަށް މިދިޔަ ޑިސެމްބަރު މަހުގެ 31 ވަނަ ދުވަހު ކުޅެން ޝެޑިއުލްކޮށްފައި އޮތް މެޗު ވިއްސާރަ ވުމުގެ ސަބަބުން ވަނީ މިމަހުގެ 19 ވަނަ ދުވަހަށް ރީޝެޑިއުލް ކުރެވިފައެވެ. އަދި ޓެންޓް ސްޕޯޓްސް ކުލަބުން މުބާރާތުގައި ކުޅުނު ފުރަތަަމަ މެޗުގައި އެޓީމުން ވަނީ 1-0 ގެ ނަތީޖާއަކުން ބީޖީ ސްޕޯޓްސް ކުލަބު ބަލިކޮށްފައެވެ.

މެޗުގެ ފުރަތަަމަ ހާފުގައި ޓެންޓް ސްޕޯޓްސް ކުލަބުން ދެލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު މެޗުގެ 11 ވަނަ މިނެޓުގައި ކާމިޔާބުކޮށްދިނީ އަހުމަދު ފިރާޝް އެވެ. އަދި އެޓީމުގެ ދެވަނަ ލަނޑު ފުރަތަމަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ ޗަލާނާ ޗަމީރާ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޓެންޓް ސްޕޯޓްސް ކުލަބު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޓެންޓް ސްޕޯޓްސް ކުލަބުން އިތުރު ތިން ލަނޑު ކާމިޔާބުކުރިއިރު، މިމެޗުގައި އެޓީމުން ކާމިޔާބުކުރި ތިންވަނަ ލަނޑާއި ހަތަރުވަނަ ލަނޑު ކާމިޔާބުކޮށްދިނީ 62 ވަނަ މިނެޓާއި 70 ވަނަ މިނެޓުގައި އެޓީމުގެ ހަސަން ނިމާލް އެވެ.

ނަމަވެސް ޖެހިގެން އައި މިނެޓުގައި ދަ ގްރާންޑޭ އިން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ މުޝްރިފް މޫސާ އެވެ.

މިމެޗުގައި ޓެންޓް ސްޕޯޓްސް ކުލަބުން ކާމިޔާބުކުރި ފަސްވަނަ ލަނޑު ދެވަނަ ހާފުގެ 81 ވަނަ މިނެޓުގައި ކާމިޔާބުކޮށްދިނީ އެޓީމުގެ އާދަމް އާޒިމް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން ޓެންޓް ސްޕޯޓްސް ކުލަބު ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން މޮޅުވެ 6 ޕޮއިންޓާއެކު ގުރޫޕް ބީގެ އެއްވަނައިގައި މިވަގުތު އޮތީ ޓެންޓް ސްޕޯޓްސް ކުލަބެވެ. މިގުރޫޕްގައި ޓެންޓް ސްޕޯޓްސް ކުލަބާއި ދަ ގްރާންޑޭ ގެ އިތުރުން ދެން ހިމެނެނީ ކުލަބް ޓީނޭޖް، ބީޖީ ސްޕޯޓްސް ކުލަބު އަދި ނިއުރޭޑިއަންޓް ސްޕޯޓްސް ކުލަބެވެ.