”ސިލޯނާއެކު ދިވެހީން“ ޓެލެތޯންއަށް 12 މިލިއަނަށްވުރެ ގިނަ ފައިސާ؛ ހާމަކޮށްދިނީ ދިވެހިންގެ ދީލަތިކަން
ލިޔުންތެރިޔާ
ޚަދީޖާ އަރުފާ
ސްރީލަންކާއަށް ކުރިމަތިވި ތޫފާނުގެ ސަބަބުން އެ ގައުމަށް ކުރިމަތިވެފައިވާ ގެއްލުންތަކުން އަރައިގަތުމަށް އެހީތެރިކަން ފޯރުކޮށްދިނުމަށް ޕީއެސްއެމްއިން އިސްނަގައި މީޑިއާތަކާ ގުޅިގެން ފެށި ”ސިލޯނާއެކު ދިވެހީން“ ޓެލެތޯނަށް 12 މިލިއަނަށްވުރެ ގިނަ ރުފިޔާގެ އެހީ ލިބިއްޖެއެވެ.
އެގޮތުން، ޕީއެސްއެމްއާއި ރާއްޖޭގެ 37 މީޑިއާއަކުން ބައިވެރިވެގެން އާދިއްތަ ދުވަހުގެ ހެނދުނު 9:00 އިން އިއްޔެ 2:00 އަށް ކުރިއަށް ގެންދެވުނު މި ޓެލެތޯން އަށް 11،553،291.10 ދިވެހި ރުފިޔާ ވަނީ ލިބިފައެވެ. އަދި ޑޮލަރުން 51،088.31 ލިބިފައިވާއިރު 20 ޔޫރޯވެސް ލިބިފައިވެއެވެ.
ތެލެތޯން އިންތިޒާމްކުރި ސްޓިއަރިން ކޮމިޓީން ބުނެފައިވަނީ، ޓެލެތޯނަށް ގިނަ އަދަދެއްގެ ޢާންމު ރައްޔިތުންނާއި ސަރުކާރުގެ ވުޒާރާތަކާއި އިދާރާތަކާއި ކުންފުނިތަކާއި ކުލަބު ޖަމިއްޔާތަކާއި އޮފީސްތަކުގެ އިތުރުން މީޑިއާތަކުން ވަނީ ފައިސާގެ އެހީތެރިކަން ފޯރުކޮށްދީފައިކަމަށެވެ.
ތެލެތޯން ކުރިއަށްދިޔައިރު މާލެ ސަރަހައްދުގެ އެކި ދިމާލުގައި ފަންޑްފޮށިތައް ބެހެއްޓުނުއިރު، އެކައުންޓަށް ފައިސާ ޖަމާކުރަން ބޭނުންވާ މީހުންނަށް ފަސޭހަކަމާއެކު އެ އިންތިޒާމްތައްވެސް ވަނީ ހަމަޖައްސައިދީފައެވެ. ތެލެތޯނަށް ކުރިއަށްގެންގޮސްފައިވަނީ މިނިވަން އޮޑިޓްފާމެއް ކަމަށްވާ ކްރޯ މޯލްޑިވްސްގެ ބައިވެރިވުމާއެކުގައެވެ.
ސިލޯނާއެކު ދިވެހިން ތެލެތޯނަށް އެންމެގިނައިން ފައިސާ ހަދިޔާކޮށްފައިވަނީ ދިވެހި ފުލުހުންގެ މުއައްސަސާއިންނެވެ. ފުލުހުންގެ ފަރާތުން 2.4 މިލިއަން ރުފިޔާ ހަދިޔާކުރިއިރު، އިންޓަރނޭޝަނަލް އެއިޑް ކެމްޕެއިން ފަދަ ޖަމާއަތްތަކުންވެސް މިލިއަނުން ފައިސާ ހަދިޔާކޮށްފައެވެ.
ސްރީލަންކާއަށް އެހީވުމުގެ ގޮތުން ކުރިއަށްގެންދިޔަ މި ތެލެތޯނަށް ސްރީލަންކާ ސަރުކާރުގެ ފަރާތުން ވަނީ ތައުރީފްކޮށް ދިވެހިންނަށް ޝުކުރު އަދާކޮށްފައެވެ. އަދި ،ލަންކާއަށް އެހީވުމަށް އެންމެ އަވަހަށް އިސްނަގައި އަމަލީގޮތުން މަސައްކަތް ފެށި ބަޔަކީ ދިވެހިންކަން ފާހަގަކޮށް އެގައުމުގެ ރައްޔިތުން އަންނަނީ ދިވެހިންގެ ދީލަތިކަމާ، ދިވެހިންގެ ފަރާތުން ލިބުނު އެހީއަށް ވަރަށް ބޮޑަށް ތަޢުރީފް ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
