ޓެކާސް ރިސޯޓް ކަޕް 2024: ހާޑް ރޮކް ހޮޓެލް މޯލްޑިވްސް ބަލިކޮށް ޖޯލި މޯލްޑިވްސް ޗެންޕިއަންކަން ހޯދައިފި

ޓެކާސް ރިސޯޓް ފުޓްސަލް ކަޕް 2024ގެ ފައިނަލުގައި ހާޑް ރޮކް ހޮޓެލް މޯލްޑިވްސް ބަލިކޮށް ޖޯލި މޯލްޑިވްސް މުބާރާތުގެ ޗެންޕިއަންކަން ހޯދައިފި އެވެ.

ހޮނިހިރު ދުވަހު ކުރުނބާ މޯލްޑީވްސްގައި ކުޅުނު ފޯރިގަދަ ފައިނަލް ޖޯލި މޯލްޑިވްސް އިން ކާމިޔާބުކުރީ ވާދަވެރި ކުޅުމަކަށްފަހު 4-1 ގެ ނަތީޖާއަކުންނެވެ. އަދި ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޖޯލި މޯލްޑިވްސްގެ މުހައްމަދު ޖުމާން އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ ޖޯލި މޯލްޑިވްސްގެ މުސްލިމް މުހައްމަދާއި ކީޕަރު އިބްރާހިމް ނަދީމް އާދަމްގެ އިތުރުން ހާޑްރޮކްގެ ތަޝްމީން އާއި މުހައްމަދު ޝުހެއިލް އަދި އޮބްލޫ ސިލެކްޓް ސަންގެލިގެ އަބްދުﷲ ޒަމީން އެވެ.

އެންމެ މޮޅު ޒުވާން ކުޅުންތެރިއަކަށް ހޮވުނީ ސަންގެލީގެ ކީޕަރު އަރުޝަމް މޫސާ ނައީމް އެވެ. އެންމެ މޮޅު ކީޕަރަކަށް ޖޯލި މޯލްޑިވްސްގެ ނަދީމް ހޮވުނު އިރު، ފެއާޕްލޭ ޓީމަކީ ބަގްލިއޯނީ މޯލްޑިވްސް އެވެ. އަދި އެބްމެ މޮޅު ކޯޗަކަށް ހޮވުނީ ޖޯލި މޯލްޑިވްސްގެ އަބްދުﷲ ހަނީފް (ބެންޖޯ) އެވެ.

މީގެ އިތުރުން މިއަހަރުގެ މުބާރާތުގެ އެންމެ މޮޅު ކުޅުންތެރިޔާގެ މަގާމާއި އެންމެ ގިނަ ލަނޑު ޖެހި ކުޅުންތެރިއާގެ މަގާމު ހޯދީ ޖޯލި މޯލްޑިވްސްގެ މުހައްމަދު ޖުމާން އެވެ. އޭނާ ވަނީ މިމުބާރާތުގެ އެޓީމަށް 12 ލަނޑު ކާމިޔާބުކޮށްދީފައެވެ. އަދި މުބާރާތުގެ އެންމެ މޮޅު ޕްލޭމޭކާ އެވޯޑް ހޯދީ ހާޑް ރޮކްގެ މުހައްމަދު ތަޝްމީން އެވެ. އޭނާ ވަނީ އެޓީމަށް ނުވަ ލަނޑު އެސިސްޓްކޮށްދީފައެވެ.

މިއަހަރުގެ ޓެކާސް ރިސޯޓް ކަޕް ފުޓްސަލް މުބާރާތުގައި ޖުމްލަ 38 ރިސޯޓަކުން ވާދަކުރިއިރު، މުބާރާތް ކުރިއަށް ގެންގޮސްފައިވަނީ ހަތް ޒޯނަކަށް ބަހާލައިގެންނެވެ.