ރޯދަމަހުގެ ފަހުން މަޖިލިސް އިންތިހާބު ބޭއްވުމާއި ބެހޭ ބިލު ފާސްކުރެވޭނެ: ފަލާހް
ކުރިއަށް އޮތް ރަމަޟާން މަހުގެ ފަހުން ރައްޔިތުންގެ މަޖިލީހުގެ އިންތިހާބު ބޭއްވުމާއި ބެހޭ ބިލު ފާސްކުރެވޭނެ ކަމަށް މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް ވިދާޅުވެއްޖެއެވެ.
މިމަހުގެ 3 ވަނަ ދުވަހު އެމްޑީޕީން ބޭއްވުމަށް ހަމަޖެހިފައިވާ މަޖިލީހުގެ ޕްރައިމަރީ އާއި ބެހޭގޮތުން މައުލޫމާތު ދިނުމަށް އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފަލާހް ވިދާޅުވީ އެންމެ ފަހުން ބޭއްވި ރައްޔިތުންގެ މަޖިލީހުގައި އެބިލާއި ގުޅޭ ފުރަތަމަ ކިޔުން އިއްވާފައިވާ ކަމަށާއި މިއަދު އޭގެ ބަހުސަށް ދާ ގޮތަށް އޮތް ނަމަވެސް ދިމާވި ކަމަކާއި ހުރެ އެ ޖަލްސާ ވަނީ ކެންސަލް ވެފައި ކަމަށެވެ. މަސައްކަތް ކުރައްވާނީ ވީ އެންމެ އަވަހަށް އެކަން ކުރެއްވުން ކަމަށާއި މަޖިލީހުން ފާސް ކުރިަސް އޭތި ގެޒެޓް ކުރައްވަނީ އެހެން ފަރާތަކުން ކަމަށް ވާތީ ރޯދައިގެ ފަހުން މަޖިލިސް އިންތިހާބު ބޭވޭނެ ކަމުގެ ޔަގީން ކަމެއް އަދި ރައްޔިތުނަށް ދެވެން ނެތް ކަމަށް ވެސް ފަލާހް ވިދާޅުވިއެވެ.
ފަލާހް ވިދާޅުވީ އެމްޑީޕީ އާއި ޑިމޮކްރެޓްސް އެކުގައި މަޖިލީސް ތެރޭގައި މަސައްކަތް ކޮށްފިނަމަ މި ބިލު ފާސްކުރެވޭނެ ކަމަށެވެ.
"ރައްޔިތުންގެ މަޖިލީހުން އޭތި ފާސްކުރެވިދާނެ. އޭތި ގެޒެޓް ކުރައްވަނީ އެހެން ބޭފުޅެއް އިނގޭތޯ. އެހެންވީމަ އެކަން ކުރައްވާނީ ކޮން ގޮތަކަށް ތޯ، އެ ގެޒެޓް ކުރައްވާނަންތޯ ނޫނީ ނޫންތޯ އެއީ އެބޭފުޅެއްގެ އަތް މަތީ އޮތްކަމެއް."
ފަލާހް ވިދާޅުވިއެވެ.
މަޖިލީހުން ބިލު ފާސްކުރުމަށް ފަހު ގެޒެޓް ނުކޮށްފިނަމަ، އޭތި އަނބުރާ މަޖިލީހަށް އަންނާނެ ކަމަށާއި އަނެއްކާވެސް މަޖިލީހުގެ އަޣުލަބިއްޔަތުން ބިލް ފާސްވުމުން އެ ބިލު ތަސްދީގު ވާނެ ކަމަށާއި އެ ގޮތަށް ދިމާވިޔަސް ބިލު ފާސްވާނެ ކަމަށް ގަބޫލުފުޅު ކުރައްވާކަމަށް ފަލާހް ވިދާޅުވިއެވެ.
މީގެ އިތުރުންވެސް ފަލާހް ވިދާޅުވީ ރޯދަ މަހު އިންތިހާބު ބޭއްވުމަކީ ފަސޭހަ ކަމެއް ނޫންކަން އެންމެންނަށް ވެސް އެނގޭ ކަމަށާއި، ރާއްޖޭގައި މިވީހާތަނުގައި އެއްވެސް އިނތިހާބެއް ރޯދަ މަހެއްގެ ތެރޭގައި ބާއްވާފައި ނުވާ ކަމަށެވެ. އިންތިހާބް ބޭއްވުމަށް ކަނޑައަޅާފައިވަނީ ބަންދު ނޫން ދުވަހެއްގައި ކަން ފާހަގަ ކުރައްވާ ފަލާހް ވަނީ މި ކަމުގައި ރައްޔިތުނަށް ވަރަށް ބައިވަރު ތަކުލީފުތަކެއް ހުންނާނެ ކަން ފާހަގަ ކުރައްވާފައެވެ.
އެމްޑީޕީން މިފަދައިން ބުނެފައިވާއިރު، އިލެކްޝަންސް ކޮމިޝަން (އީސީ) ގެ ނައބު ރައީސް އިސްމާއީލް ހަބީބް ވަނީ ރޯދައިގެ ފަހުން އިންތިހާބު ބާއްވާނަމަ އިންތިހާބު ބޭއްވުމަށް މިހާރު ހަމަޖެހިފައިވާ ބަޖެޓަށް ވުރެ އިތުރަށް ބަޖެޓް ބޭނުންވާނެކަމަށް ވިދާޅުވެފައެވެ. މީގެ އިތުރުންވެސް ހަބީބު ވިދާޅުވީ އިންތިހާބުތަކާއި ބެހޭ ޢާންމު ގާނޫނަށް ގެނެވޭ ބަދަލަކުން، އިންތިހާބުގެ ތާރީޚަށް ބަދަލެއް ގެނައުމަށް ލާޒިމް ވެއްޖެ ހިނދެއްގައި، އެގޮތަށް އީސީން ޢަމަލުކުރާނެ ކަމަށާއި ނަމަވެސް އެގޮތަށް މަޖިލިހުން ނިންމަވާ ނަމަ ރިއާޔަތްކުރަން ޖެހޭ ގިނަ ކަންތައްތަކެއް އެބަހުރި ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
