(ކާވާ)، ބީޗް ވޮލީބޯލް ޗެލެންޖު ކަޕުގެ ރަންމެޑަލް ދިވެހި ޓީމު ދިފާއުކޮށްފި

ކާވާ، ބީޗް ވޮލީބޯލް ޗެލެންޖު ކަޕު 2024ގެ ފައިނަލުގައި ނޭޕާލުގެ އެއް ވަނަ ޕެއާ މަން ބަހާދުރު އާއި ދިލް ބަހާދުރުގެ ޕެއާ ބަލިކޮށް، ރާއްޖޭގެ އިސްމާއިލް ސާޖިދު އާއި އާދަމް ނަސީމް ގެ ޕެއާ އިން ސަރަހައްދުގެ ބީޗްވޮލީގެ ރަން މެޑަލް ދިފާއުކޮށްފި އެވެ.

މިއަދު މެންދުރު ފަހު ކުޅުނު ފައިނަލް މެޗުގައި، އެޑަމް އާއި ކުޑަކާއްޓެގެ ޕެއާ މޮޅުވީ، 21-19، 21-17 އިންނެވެ. ކޮންމެ ސެޓެއްގައި ވެސް ނޭޕާލުގެ މަން އާއި ދިލްގެ ޕެއާ އިން ކޮންމެ ވެސް ވަރެއްގެ ޗެލެންޖެއް ދެވޭތޯ މަސައްކަތްކުރި އެެވެ. އެ ގޮތުން ފުރަތަމަ ސެޓުގެ މެދަކާހަމައިން ވަރަށް ހަމަހަމަކޮށް ވެސް ދިޔަ އެވެ. އެހެން ނަމަވެސް، އެޑަމް އާއި ކުޑަކާއްޓެގެ ޕެއާ ވަނީ ތަޖުރިބާ އާއި ހުނަރުގެ ބޭނުންކޮށް މެޗުތަކުން މޮޅުވެފަ އެވެ.

އެޑަމް އާއި ކުޑަކާއްޓެ މި ފަހަރުގެ މުބާރާތް ކާމިޔާބުކޮށްފައި މި ވަނީ ވެސް، ކުޅުނު ހުރިހާ މެޗަކުން މޮޅުވެގެންނެވެ. އެ ގޮތުން، ގްރޫޕް ސްޓޭޖުގައި ކުޅުނު ހަތަރު މެޗާއި ސެމީން އެ ޕެއާ އިން މި ވަނީ ކާމިޔާބު ހޯދައިފަ އެވެ.

މީގެ ކުއެރިން، އެޑަމް އާއި ކުޑަކާއްޓެގެ ޕެއާ އިން، ކާވާގެ ފުރަތަމަ ބީޗް މުބާރާތް ކާމިޔާބުކުރީ 2022 ވަނަ އަހަރު ޑިސެމްބަރު މަހުގަ އެވެ. ހަ ގައުމުން އަށް ޕެއާ ވާދަކުރި، އެ މުބާރާތުގެ ފައިނަލުގައި އެޑަމް އާއި ކުޑަކާއްޓެގެ ޕެއާ ނުކުތީ މި ފަހަރު ވެސް ފައިނަލުގައި ކުޅުނު، މަން އާއި ދިލްގެ ޕެއާއާ ދެކޮޅަށެވެ. އެޑަމް އާއި ކުޑަކާއްޓެގެ ޕެއާ އިން އެ ފަހަރު މޮޅުވީ، 21-13، 21-19 ސެޓުތައް ގެންގޮސްގެންނެވެ.

ރާއްޖޭގެ ދެ ވަނަ ޕެއާ، މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ) ގެ ޕެއާ ސެމީގައި ބަލިވީ މަން އާއި ދިލްގެ ޕެއާ އަތުން، 21-10، 21-16 އިންނެވެ.