ފޭވަރިޓެއްގެ ގޮތުގައި ބެލެވުނު ފްރާންސް ބަލިކޮށް، ސްޕެއިން ވަރލްޑްކަޕް ފައިނަލަށް

ފްރާންސް ބަލިކޮށް ވަރލްޑްކަޕް ފުޓްބޯޅަ މުބާރާތުގެ ފައިނަލުގެ ޖާގައެއް ޔޫރަޕްހގެ ޗެމްޕިއަން ސްޕެއިން ހޯދައިފިއެވެ.

ސެމީފައިނަލުގައި ރޭ ފްރާންސް އާ ދެކޮޅަށް ކުޅުނު މިމެޗް ސްޕެއިނުން ކާމިޔާބުކުރީ 2-0 ގެ ނަތީޖާއަކުންނެވެ. މި ދެޓީމަކީ މިފަހަރުގެ މުބާރާތުގެ މިހާހިސާބަށް އާއިރު އެންމެ ވަރުގަދަކޮށް ފެނުނު ދެޓީމެވެ. ނަމަވެސް ރޭގެ މެޗްގައި ފަރަންސޭސިންގެ ފަރާތުން އުއްމީދުކުރިވަރުގެ ކުޅުމެއް ނުފެނުނެވެ.

ހާއްސަގޮތެއްގައި ރޭގެ މެޗްގައި ފްރާންސްގެ އެންމެ ވަރުގަދަ ޑިޕާޓްމެންޓްގެ ކުޅުން ފެނިގެންދިޔައީ ވަރަށް ދަށްކޮށެވެ. މެޗްގައި ސްޕެއިންގެ އެންމެ ފުރަތަމަ ލަނޑު ފެނިގެންގޮސްފައިވަނީ، ފުރަތަމަ ހާފްގެ 22 ވަނަ މިނެޓް ތެރޭގައެވެ. މި ލަނޑަކީ ލަމީން ޔަމާލަށް ފްރާންސްގެ ލޫކަސް ޑީނޭ ކުރި ފައުލަކަށް ލިބުނު ޕެނަލްޓީއަކުން މިކޭލް އޮޔަރްޒަބަލް ކާމިޔާބުކުރި ލަނޑެކެވެ. މި ލަނޑާއެކު ފުރަތަމަ ހާފް ނިމުނީ މި ނަތީޖާގައޮ އޮވެގެންނެވެ.

މެޗްގައި ފްރާންސްއަށް އެކަށީގެންވާ ހަމަލާއެއް ނުއުފެއްދުނުއިރު، މި މެޗްގައި ތަފާތު ފެނިެގންދާނޭކަމަށް ބެލެވުނު އޮލިސޭއަށްވެސް މާބޮޑުކަމެއް ނުކުރެވުނެވެ. ނަތީޖާއެއްގެ ގޮތުން އޭނާ ވަނީ 72 ވަނަ މިނެޓް ތެރޭގައި ބަދަލުކޮށްފައެވެ. ސްޕެއިންގެ ދެވަނަ ލަނޑަކީ ޑެނީ އޮލްމޯ ދިން ބޯޅައަކުން ޕެޑްރޯ ޕޯރޯ ކާމިޔާބުކުރި ލަނޑެކެވެ. މި މެޗާއެކު ސްޕެއިން މިހާރު ވަނީ ބަލިނުވެ ޖެހިޖެހިގެން 37 މެޗު ހަމަކޮށް، ޔޫރަޕްގެ ގައުމަކުން އެންމެ ގިނަ މެޗުން ބަލިނުވުމުގެ ރެކޯޑާ އަރާ ހަމަކޮށްފައެވެ.

ވަރލްޑްކަޕް ފައިނަލުގައި ސްޕެއިން ބައްދަލުކުރާނޭ ޓީމެއް ކަނޑައެޅިގެންދާނީ މިރޭ އާޖެންޓީނާ އާއި އިންގްލެންޑް ކުޅޭ ސެމީފައިނަލްމެޗަށް ފަހުއެވެ. ފްރާންސްއަށް ދެން އޮތީ ހޮނިހިރު ދުވަހު ކުޅޭ ތިންވަނަ ހޮވާ މެޗެވެ. މިއީ ޑިޑިއޭ ޑެޝޭމްޕްސްގެ 14 އަހަރުވީކެރިއަރުގެ އެންމެ ހިތްދަތި އެއް މެޗެވެ.