ހަނގުރާމަވެރިންގެ ހަމަލާއެއްގައި ޕާކިސްތާނު ސިފައިންގެ 13 މީހުން މަރުވެއްޖެ

ގޮވާތަކެތި ބަރުކޮށްފައިވާ ވެހިކަލެއް ބޭނުންކޮށްގެން ޕާކިސްތާނުގެ އަސްކަރީ ގާފިލާއަކަށް ދިން ހަމަލާއެއްގައި، ޕާކިސްތާނު ސިފައިންގެ 13 މީހަކު މަރުވެއްޖެއެވެ.

މި ހަމަލާދީފައިވަނީ ޕާކިސްތާނާއި އަފްޣާނިސްތާނު ގުޅޭ ސަރަހައްދީ ރޮނގުގެ ކައިރިން، އުތުރު ވަޒީރިސްތާން ޑިސްޓްރިކްޓްގެ މީރް އަލީ ސަރަހައްދުގައެވެ. ޕާކިސްތާނުގެ އަސްކަރިއްޔާއިން ބުނީ މި އަނިޔާވެރި ހަމަލާގެ ސަބަބުން އާއްމުންގެ އަންހެނަކާއި ކުޑަ ދެ ކުދިންނަށްވެސް ބޮޑެތި އަނިޔާތަކެއް ލިބިފައި ވާކަމަށެވެ.

ހަނގުރާމަވެރިން ދިން މިހަމަލާގެ ރައްދުގައި ޕާކިސްތާނު އަސްކަރިއްޔާއިން އެސަރަހައްދުގައި ދިން ހަމަލާގައި ހަނގުރާމަވެރިންގެ 14 މީހަކު މަރާލިއެވެ.

މިހަމަލާ ކުށްވެރިކޮށް ޕާކިސްތާނުގެ ބޮޑުވަޒީރު ޝެހެބާޒް ޝަރީފް ބަޔާނެއް ނެރުއްވިއެވެ. އަދި ޕާކިސްތާނުގެ އަސްކަރިއްޔާގެ ވެރިޔާ ފީލްޑް މާޝަލް އާސިމް މުނީރު ވިދާޅުވީ ޕާކިސްތާނުގެ ދާޚިލީ ހަމަޖެހުން ނަގާލުމަށް މަސައްކަތްކުރަ ފަރާތްތަކާއި ދެކޮޅަށް ވަރުގަދަ ރައްދެއް ދެއްވާނެ ކަމަށެވެ.

ހަމަލާގެ ޒިންމާ، ހަނގުރާމަވެރި އެއްވެސް ޖަމާޢަތަކުން އުފުލާފައި ނުވާއިރު، ޕާކިސްތާނު އަސްކަރިއްޔާއިން ތުހުމަތުގެ އިނގިލި ދިއްކުރީ އިންޑިއާއަށެވެ. އަދި ހަމަލާ ދީފައިވަނީ އިންޑިއާއިން ވާގިވެރިވާ ހަނގުރާމަވެރިންކަމަށް ސިފަކޮށްފައިވެއެވެ. އެހެންނަމަވެސް އިންޑިއާއިން ވަނީ މި ތުހުމަތުތައް ދޮގުކޮށް، ހަނގުރާމަވެރިންގެ މައްސަލައަކީ ޕާކިސްތާނުން އަމިއްލައަށް ހައްލުކުރަން ޖެހޭ މައްސަލައެއްކަމަށް ބުނެފައެވެ.

މިހަމަލާ ދިން އުތުރު ވަޒީރިސްތާނަކީ ސަރުކާރުގެ ގާނޫނުތައް ތަންފީޒުކުރެވޭ ސަރަހައްދެއް ނޫނެވެ. އަދި ހަނގުރާމަވެރިން ބޯޑަރުގެ ދެ ފަޅީގައިވެސް މިނިވަންކަމާއެކު އުޅެއެވެ. ޕާކިސްތާނުގެ ސިފައިންނަށް ހަމަލާދިނުމަށް ހަނގުރާމަވެރިން ތަމްރީނު ހަދަނީ ބޯޑަރުގެ އަފްޣާން ފަޅީގައިކަމަށް ޕާކިސްތާނުން ކުރާ ތުހުމަތުތަކާއި ގުޅިގެން އަފްޣާނިސްތާނުން ވަނީ އެކަންވެސް ދޮގުކޮށްފައެވެ. އަދި ހަނގުރާމަވެރިންގެ މައްސަލައަކީ ޕާކިސްތާނަށް ހައްލުނުވެ އޮތް އެމީހުންގެ އަމިއްލަ މައްސަލައެއްކަމަށް އަފްޣާނިސްތާނުންވެސް ވަނީ ބުނެފައެވެ.