ކަތަމަންޑޫގައި ލޫޓުވުން އިތުރުވަނީ
ލިޔުންތެރިޔާ
އަބްދުﷲ ހުސައިން
ނޭޕާލްގެ ވެރިރަށް ކަތަމަންޑޫގައި ހަމަނުޖެހުންބޮޑުވި މުޒާހަރާތަަށްފަހު ލޫޓުވުން އިންތިހާ ދަރަޖައަކަށް ގޮސްފައިވާކަމަށް އެޤައުމުގެ ކަމާބެހޭ ފަރާތްތަކުން ހާމަކޮށްފިއެވެ.
ކަތަމަންޑޫގައި ޖެންޒީ ގްރޫޕްތަކުން ކުރި މުޒާހަރާގައި، ސަރުކާރުގެ ވެރިން ހިންގާ ވިޔަފާރިތަކުގެ އިތުރުން އެމީހުންނަށް މަދަދުވެރިވާ ވިޔަފާރިތަކަށް އަމާޒުކޮށް މުޒާހަރާގެ ތެރެއިން ބަޔަކު ވަނީ ހަމަލާދީ ގެއްލުންތައް ދީފައެވެ. އެގޮތުން ބައެއް ސުޕަމާކެޓްތަކަށް ހަމަލާދީ އެތަންތަނުގައި އަލިފާންޖެހުމުން އާއްމުން ވަނީ އެތަންތަނަށްވަދެ މުދާތައް ގެންގޮސްފައެވެ. އެގޮތުން ރެއާ ހަމަޔަށް ލޫޓުވުން ވަރަށްބޮޑަށް އާއްމުވެގެންދިޔަކަަށް ނޭޕާލްގެ ބައެއް މީޑިއާތަކުން ވަނީ ފާހަގަކޮށްފައެވެ.
ކަތަމަންޑޫގައި ލޫޓުވުން އާއްމުވުމާ ގުޅިގެން މަގުތައް ބެލެހެއްޓުމަށް ވަނީ ސިފައިން ނިކުމެފައެވެ. ކަތަމަންޑޫގެ ހާލަތު ގޮސްވެފައިވާއިރު، ކާފިއު އިއުލާނުކޮށް ސިފައިން ދަނި މަގުތަކުގައި މިހާރުވެސް ފޯރި މަރަމުންނެވެ. ސިފައިން ވަނީ ހުރިހާ ރައްޔިތުންވެސް އެމީހުންނަށް އެއްބާރުލުންދީ ހަމަނުޖެހުން އިތުރަށް ނުހިންގުމަށް އެދިފައެވެ.
އިއްޔެ ކުރިއަށްދިޔަ ހަމަނުޖެހުންތަކަށްފަހު ކަތަމަންޑޫގެ ބައެއް ސަރަހައްދުތައް ހަމަޔަކަށް އެޅިފައިވާއިރު، ޒުވާނުން ދަނީ ސިފައިންނާ ގުޅިގެން މަގުތައް ސާފްކުރުމުގެ މަސައްކަތް ކުރަމުންނެވެ
ޖެންޒީން ނޭޕާލްގެ ކަތަމަންޑޫގައި މުޒާހަރާތައް ފެށީ ސަރުކާރުން ސޯޝަލް މީޑިއާގެ ޕްލެޓްފޯމްތައް ބޭނުންނުކުރެވޭގޮތް ހެދުމާއި، ސަރުކާރުގެ ވެރިންގެ ކޮރަޕްޝަން އިންތިހާއަށް އިތުރުވުމާ ގުޅިގެންނެވެ. މުޒާހަރާއާ ގުޅިގެން ސަރުކާރުގެ ބޮޑުން އިސްތިއފާދީފައިވާއިރު، މުޒާހަރާގެ ބައިވެރިންވަނީ މިނިސްޓަރުންގެ ގެކޮޅުގައި ހުޅުޖަހައި، ބައެއް މިނިސްޓަރުން ގަންހިންގުވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
