ނޭޕާލްގެ ރައްޔިތުންނަށް ދިވެހީންގެ ފަރާތުން އެއް މިލިއަން ރުފިޔާގެ އެހީއެއް ދެނީ

ނޭޕާލްގެ ބޯޓޭ ކޯޝީ ސަރަހައްދަށް އޮގަސްޓް 26 ގައި ކުރިމަތިވި ނުރައްކާތެރި ފެންބޮޑުވުމުގެ ކާރިސާއާ ގުޅިގެން، ދިވެހިރައްޔިތުންގެ ފަރާތުން އެ ގައުމުގެ ރައްޔިތުންނަށް އެހީތެރިކަން ފޯރުކޮށް ދިނުމަށް ނިންމައިފި އެވެ.

އެ ނިންމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އިއުލާނު ކުރައްވާފަ އެވެ. ދިވެހީންގެ ފަރާތުން އެއް މިލިއަން ރުފިޔާ، އެހީގެ ގޮތުގަައި ދިނުމަށް ވަނީ ނިންމާފަ އެވެ.

މިއީ ނޭޕާލްގައި އިންސާނީ އެހީތެރިކަން ފޯރުކޮށްދިނުމަށް ކުރެވެމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ދޭން ނިންމި އެހީ އެކެވެ. ސަރުކާރުން ބުނީ ދިވެހިރައްޔިތުންގެ ފަރާތުން ފޯރުކޮށްދޭ މި އެހީތެރިކަން  ނޭޕާލުގެ ޑިޒާސްޓާ ރިލީފް ފަންޑަށް ޖަމާކުރާނެ ކަމަށެވެ.

މިއީ ސަރަހައްދީ އެއްބައިވަންތަކަން ދެމެހެއްޓުމަށާއި، މިފަދަ ދަތި އުނދަގޫ ދަނޑިވަޅުތަކުގައި ގައުމުތަކުން އެކަކު އަނެކަކަށް އެހީތެރިކަމާއި އޯގާތެރިކަން އިސްކުރަންޖެހޭނެ ކަމަށް ދިވެހިރާއްޖެއިން އަބަދުވެސް ގަބޫލުކުރާ ކުރުން ރަމްޒުކޮށްދޭ ކަމެއް ކަމަށް ވެސް ސަރުކާރުން ބުންޏެވެ.

ނޭޕާލަށް ކުރިމަތިވި މި ކާރިސާގައި ގިނަ ބައެއްގެ ފުރާނަ ގެއްލި، ބޮޑެތި ގެއްލުންތަކެއް ލިބުމާ ގުޅިގެން ރައީސުލްޖުމްހޫރިއްޔާ ވަނީ ނޭޕާލްގެ ސަރުކާރަށާއި ރައްޔިތުންނަށް އިޚްލާޞްތެރި ތަޢުޒިޔާ ފޮނުއްވައި، މި އުނދަގޫ ދަނޑިވަޅުގައި، ނޭޕާލްގެ ރައްޔިތުންނާއެކު ދިވެހިރާއްޖެ ސާބިތުވެ އޮތްކަން ހާމަކުރައްވާފައެވެ.

ދެކުނު އޭޝިއާގެ ދެ ޤައުމު ކަމަށްވާ ދިވެހިރާއްޖެއާއި ނޭޕާލާ ދެމެދު 1980 ވަނަ އަހަރު ސިޔާސީ ގުޅުން ގާއިމުކުރީއްސުރެ، ދެ ގައުމުގެ މެދުގައި އޮންނަނީ ވަރަށް ގާތް، އެކުވެރި ގުޅުމެއްކަން އެމަނިކުފާނު ފާހަގަ ކުރެެއްވި އެވެ.

ނޭޕާލާއި ޗައިނާގެ ޓިބެޓް ގުޅޭ ބޯޑަރު ސަރަހައްދުގައި އޮންނަ ކޯރަކަށް ގަނޑުފެނާއި ކިސަޑު ފައިބައިގެން ދިމާވި ނުރައްކާތެރި ފްލޭޝް ފްލަޑް ކާރިސާއާ ގުޅިގެން ގިނަ ބައެއްގެ ފުރާނަ ގެއްލި، ގިނަ ބަޔަކު ވަނީ ވީނުވީއެއް ނޭންގި ގެއްލިފަ އެވެ. އަދި މުޅި ސަރަހައްދު ވަނީ ހިނދުކޮޅެއްގެ ތެރޭގައި ސުންނާފަތިވެފަ އެވެ.

ނުރައްކާތެރި އަދި ބިރުވެރިކަން ބޮޑު މި ހާދިސާގައި 10 ގައުމެއްގެ 500 ވުރެ ގިނަ މީހުން ވަނީ ގެއްލިފަ އެވެ.