ނޭޕާލަށް ނިސްބަތްވާ ދެ މީހަކު ހަށިގަނޑުގައި ފޮރުވައިގެން މަސްތުވާތަކެތި އެތެރެކުރި މައްސަލައެއް

ދިރުވާލައިގެން ގިނަ އަދަދެއްގެ މަސްތުވާތަކެތި ރާއްޖެއަށް އެތެރެކުރި ކަމުގެ ތުހުމަތުގައި ނޭޕާލުގެ ދެ ރައްޔިތަކު ހައްޔަރުކޮށް ކްރިމިނަލް ކޯޓުން އެ ދެ މީހުންގެ ބަންދަށް ތިން ދުވަސް ޖަހައިފިއެވެ.

މި މައްސަލާގައި ހައްޔަރުކޮށްފައި ވަނީ ޢުމުރުން 40 އަހަރުގެ އީތްރާނީ ގަލެ އާއި 47 އަހަރުގެ ނިއްކަ ތަމަންގާ ކިޔާ ދެ މީހެކެވެ.

ދެ މީހުންގެ މައްޗަށް ކޮށްފައި ވަނީ މަސްތުވާތަކެތި އެތެރެކުރުމާއި ސްމަގްލްކުރުމާއި ޓްރެފިކްކުރުމުގެ ތުހުމަތެވެ. އެމީހުން މިހާރު ތިބީ ހޮސްޕިޓަލުގައި އެޑްމިޓްކޮށްފައި ކަމުން ބަންދު އަމުރުގެ އަޑުއެހުން ކޯޓުން ކުރިއަށް ގެންގޮސްފައި ވަނީ އެ ދެ މީހުން ޣައިރު ހާޒިރުގައެވެ.

ދިރުވާލައިގެން އެތެރެކުރި މަސްތުވާތަކެތީގެ ސީދާ ޢަދަދު ކޯޓު އަމުރުން ސާފެއް ނުވެއެވެ. އެހެން ނަމަވެސް އެއީ ގިނަ ޢަދަދެއްގެ ތަކެތި ކަމަށް ބަޔާންކޮށްފައިވެއެވެ. ބަންދުގެ ތިން ދުވަހުގެ މުއްދަތު ހަމަވުމުގެ ކުރިން މި ދެ މީހުންގެ ބަންދާ މެދު އަލުން ގޮތެއް ކަނޑައެޅުމަށް ކޯޓަށް ހުށަހަޅަން ޖެހޭނެއެވެ.