ވާރޭވެހި ފެންބޮޑުވުމުގެ ސަބަބުން އިންޑިއާއިން 56 އަދި ނޭޕާލުން 14 މީހުން މަރުވެއްޖެ

ބޯކޮށް ވާރޭވެހި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން އަވަށްޓެރި އިންޑިއާއިން 56 މީހުން އަދި ނޭޕާލުން 14 މީހުން މަރުވެއްޖެއެވެ.

މީގެ އިތުރުން ނޭޕާލުން 11 މީހަކު ގެއްލިފައިވާއިރު، އިތުރަށް ފެންބޮޑުވެދާނެ ކަމުގެ އިންޒާރު އެ ގައުމުގެ ކަމާބެހޭ އިދާރާތަކުން ވަނީ ދީފައެވެ.

އިންޑިއާގެ އުތުރުގެ ސްޓޭޓެއް ކަމަށްވާ އުއްތަރު ޕްރަދޭޝްއަށް މިމަހު 25 އިން 27 އަށް 66.5 މިލިމީޓަރުގެ ވާރޭ ވެހިފައިވެއެވެ. މިއީ އާންމުކޮށް މި ދުވަސްވަރު ވެހޭ 7.6 މިލިމީޓަރާ އަޅާބަލާއިރު ވަރަށް ބޮޑު އިތުރުވުމެކެވެ.

އިންޑިއާގައި މަރުވި މީހުންގެ އިތުރުން 46 މީހަކަށް އެކިވަރުގެ އަނިޔާތައް ލިބި، 1،000 އަށް ވުރެ ގިނަ ގެދޮރަށް ވަނީ ބޮޑެތި ގެއްލުންތައް ލިބިފައެވެ. ސަރުކާރުން މިހާރު ދަނީ ފެންބޮޑުވެފައިވާ ސަރަހައްދުތަކުގައި ސަލާމަތީ މަސައްކަތްތައް ކޮށް، ދަނޑުބިންތަކަށް ލިބުނު ގެއްލުންތައް ބަލައި ބަދަލު ދިނުމުގެ މަސައްކަތް ކުރަމުންނެވެ.

މީގެ އިތުރުން ވާރޭ ވެހުމުގެ ސަބަބުން އިންޑިއާގެ މައި ކޯރުތައް ކަމަށްވާ ގަންގާ، ކޯސީ އަދި ނަރްމަދާ ފަދަ ކޯރުތަކުގެ ފެންގަނޑު ވަނީ ނުރައްކާތެރި މިންވަރަކަށް އުފުލިފައެވެ.

ނޭޕާލުގެ 77 ޑިސްޓްރިކްޓްގެ ތެރެއިން 49 ޑިސްޓްރިކްޓަކަށް ކުއްލި ފެންބޮޑުވުމުގެ ނުރައްކާ އޮތް ކަމަށް އެ ގައުމުގެ ކަމާބެހޭ ފަރާތްތަކުން ވަނީ ބުނެފައެވެ. ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން މަނަންގް، މުސްތަންގް، މިޔަގްދީ އަދި ބަގްލުންގް ޑިސްޓްރިކްޓްތަކުން ކަރަންޓުގެ ޚިދުމަތް ވަނީ މެދުކެނޑިފައެވެ. އަދި 40 މެގަވޮޓްގެ ހައިޑްރޯޕަވާ މަޝްރޫއަކަށާއި މުވާސަލާތީ ވިއުގައަށް ވެސް ވަނީ ބޮޑެތި ގެއްލުންތައް ވެފައެވެ.

މީގެ އިތުރުން، ނޭޕާލުގެ އުތުރުގެ މަނަންގް ޑިސްޓްރިކްޓްގައި އޮންނަ ހިމްލުންގް ހިމާލް ފަރުބަދައިގެ ބޭސް ކޭމްޕަށް ސްނޯގަނޑެއް ވެއްޓި، އެ ވަގުތު ޓެންޓު ޖެހުމުގެ މަސައްކަތުގައި އުޅުނު 10 މަސައްކަތްތެރިން ގެއްލިގެން ހޯދުމުގެ މަސައްކަތް ވެސް ދަނީ ކުރަމުންނެވެ.