ތަފާތުބޮޑު ނަތީޖާއަކުން ނިއުކާސަލް ބާލިކޮށް ބާސެލޯނާ ކުއާޓާ ފައިނަލަށް

ޔުއެފާ ޗެމްޕިއަންސްލީގް ކުއާޓާ ފައިނަލުގެ ޖާގައެއް ސުޕެއިންގެ ބާސެލޯނާ ހޯދައިފިއެވެ.

މުބާރާތުގެ ކުއާޓާ ފައިނަލުގެ ޖާގައެއް ބާސެލޯނާ ހޯދާފައިވަނީ ރޭ އިނގިރޭސިވިލާތުގެ ނިއުކާސަލް ޔުނައިޓެޑާ ދެކޮޅަށް ކުޅުނުމެޗް ތަފާތުބޮޑު ނަތީޖާއަކުން ކާމިޔާބުކޮށްގެންނެވެ. ބާސެލޯނާގެ ދަނޑުގައި ކުޅުނު މިމެޗް ނިއުކާސަލްގެ މައްޗަށް އެޓީމް ކުރިހޯދީ، 2-7 ގެ ނަތީޖާއަކުންނެވެ. މި ލެގްގެ ފުރަތަމަ މެޗް ނިއުކާސަލްގެ ދަނޑުގައި ކުޅުނު މެޗް ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ. އެހެންކަމުން މިރޭގެ މެޗް ފެށިގެން ދިޔައީ ވަރަށް ވާދަވެރިކޮށެވެ.

މުޅި މެޗްގައިވެސް ބާސެލޯނާގެ ފަރާތުން މޮޅު ކުޅުމެއް ފެނިގެންދިޔައިރު، އެޓީމުން ވަނީ 6 ވަނަ މިނެޓް ތެރޭގައި ލީޑް ނަގާފައެވެ. މި ލަނޑު ކާމިޔާބުކޮށްދިނީ، ލޮޕޭޒް ތަނަވަސްކޮށްދިން ފުރުސަތެއްގައި ރަފީނިއާ އެވެ. ބާސެލޯނާއިން ލީޑް ނަގާފައިވަނިކޮށް ނިއުކާސަލްގެ އެލަންގާ ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މެޗުން ދެވަނަ ފަހަރަށް ބާސާއަށް ލީޑް ނަގައިދިނީ، 18 ވަނަ މިނެޓް ތެރޭގައި ބެނަލް އެވެ.

ބާސާއިން ދެވަނަ ފަހަރަށް ލީޑް ނަގާފައިވަނިކޮށް، 28 ވަނަ މިނެޓް ތެރޭގައި އަނެއްކާވެސް އެލަންގާ ވަނީ ލަނޑެއް ޖަހައި މެޗް އެއްވަރުކޮށްފައެވެ. އެހެން ނަމަވެސް މެޗްގެ ފުރަތަމަ ހާފް ނިމުމުގެ ކުރިން މެޗްގެ އިތުރު ވަގުތު ކުޅުމުގެ ތެރޭގައި ލިބުނު ޕެނަލްޓީއަކުން ލަނޑެއް ޖަހައި ޔަމާލް ވަނީ ބާސާއަށް ލީޑް ނަގައިދީފައެވެ.

ފަހު ހާފްގައި ބާސާއަށް ލަނޑުތައް ޖަހައިދިނީ، ލޮޕޭޒް، ލެވަނޑޮސްކީ، އަދި ރަފީނިއާ އެވެ. މެޗުން ލިބުނު މޮޅާއެކު ބާސެލޯނާ ކުއާޓާ ފައިނަލަށް ދަތުރުކުރީ ކުޅުނު ދެމެޗްގެ ޖުމްލަ ނަތީޖާއަށް ބަލައި 8-3 ގެ ނަތީޖާއިންނެވެ. ކުއާޓާ ފައިނަލުގައި ބާސެލޯނާ ނިކުންނާނީ، ވާދަވެރި އެތްލެޓިކޯ މެޑްރިޑާ ދެކޮޅަށެވެ.