ގްރޫޕްގެ އެންމެ ފަހު މެޗުންވެސް އާޖެންޓީނާއަށް މޮޅެއް، މެސީ ރަންބޫޓާ ދިމާލަށް

ވަރލްޑްކަޕް ގްރޫޕް ސްޓޭޖްގެ އެންމެ ފަހުމެޗް ކާމިޔާބުކޮށް އެންމެ ކާމިޔާބު ޓީމްގެ ގޮތުގައި އާޖެންޓީނާއިން ގްރޫޕް ސްޓޭޖް ނިންމާލައިފިއެވެ.'

ގްރޫޕް ސްޓޭޖްގެ އެންމެ ފަހުމެޗްގައި އާޖެންޓީނާ މިއަދު ނިކުތީ ޖޯޑަން އާ ދެކޮޅަށެވެ. މިމެޗް އާޖެންޓީނާ ކާމިޔާބުކުރީ 3-1 ގެ ނަތީޖާއިންނެވެ. މިމެޗަށް އާޖެންޓީނާ ނިކުތީ އެޓީމްގެ އެންމެ މުހިންމު ކުޅުންތެރިޔާ އަދި ކެޕްޓަން މެސީ ނުލައެވެ. މެސީ ކުޅެން ނިކުމެފައިވަނީ ފަހްހާފްގައެވެ.

މެޗްގައި އާޖެންޓީނާއަށް ގޯލް ހުޅުވާލަދިނީ 19 ވަނަ މިނެޓް ތެރޭގައި ޖިއޮވާނީ ސެލްސޯ އެވެ. ދެވަނަ ލަނޑު 31 ވަނަ މިނެޓް ތެރޭގައި ކާމިޔާބުކޮށްދިނީ މާޓީނޭޒް އެވެ. އާޖެންޓީނާއިން ދެ ލަނޑުގެ ލީޑެއް ނަގާފައިވަނިކޮށް ޖޯޑަންގެ މޫސާ އަލްތަމާރީ ވަނީ ލަނޑެއް ޖަހައި އުއްމީދު އާކޮށްދީފައެވެ.

ނަމަވެސް އާޖެންޓީނާއިން ވަނީ 80 ވަނަ މިނެޓްގައި އިތުރު ލަނޑެއް ޖަހައި މެޗްގެ ނަތީޖާ 3-1 ކަށް ބަދަލުކޮށްފައެވެ. މި ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މެސީ އެވެ. މި ލަނޑާއެކު މި މުބާރާތުގައި މެސީ ޖެހި ލަނޑުގެ އަދަދު ވަނީ 6 ކަށް އަރާފައެވެ. ވަރލްޑްކަޕް ގްރޫޕް ސްޓޭޖް މެޗުތައް ނިމުނުއިރު ރަން ބޫޓަށް ވާދަކުރާ ލިސްޓްގެ ކުރީގައި ދެ ލަނޑުގެ ތަފާތަކުން މެސީ ކުރީގައި އުޅޭއިރު، ދެވަނާގައި އުޅެނީ 4 ލަނޑާއެކު ފްރާންސްގެ އެމްބާޕޭ، ޑެމްބެލޭ، ބްރެޒިލްގެ ވިނީސިއަސް އަދި ނޯވޭގެ ހާލާންޑެވެ.

އާޖެންޓީނާ ހިމެނޭ ގްރޫޕްގެ ނޮކްއައުޓްބުރަށް ދަތުރުކުރި އަނެއް ދެ ޓީމަކީ އޮސްޓްރިއާ އަދި އަލްޖީރިއާއެވެ.