ފުޓުބޯޅައިން ރިޓަޔާވާން ގާތްވެފައިވާ ކަމުގެ އިޝާރާތެއް ރޮނާލްޑޯ ދީފި

ދުނިޔޭގެ ފުޓުބޯޅައިގެ ތާރީޚުގައި މިހާތަނަށް އެންމެ ގިނަ ލަނޑު ޖަހާފައިވާ އެއް ކުޅުންތެރިޔާ ކަމަށްވާ، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފުޓުބޯޅަ ކުޅުން ހުއްޓާލުމާ ގާތްވެފައިވާ ކަމުގެ އިޝާރާތެއް ދީފިއެވެ.

މަޝްހޫރު 'ވޯގް' މަޖައްލާއަށް ދިން ޚާއްޞަ އިންޓަވިއުއެއްގައި ވާހަކަދައްކަމުން ރޮނާލްޑޯ ބުނީ، މިއީ ފުޓުބޯޅަ ކުޅުންތެރިއެއްގެ ގޮތުގައި އޭނާ ފެނިގެންދާނެ އެންމެ ފަހު އަހަރަށް ވެދާނެ ކަމަށެވެ. އަދި ކުޅިވަރުގެ މައިދާނާ ވަކިވުމަށް ފަހު، އާއިލާއަށް ވަގުތު ދިނުމަށާއި، ދަތުރުފަތުރު ކުރުމާއި ޕެޑެލް ކުޅުން ފަދަ އަމިއްލަ ކަންކަމުގައި ވަގުތު ހޭދަކުރަން ރާވާފައިވާ ކަމަށް ވެސް އޭނާ ހާމަކުރިއެވެ.

ސައޫދީ ޕްރޯ ލީގުގެ އަލް ނަޞްރުގައި މިހާރު ކުޅެމުންދާ ރޮނާލްޑޯގެ އެ ކްލަބާ އެކު އޮތް އެއްބަސްވުމުގައި ބާކީ އޮތީ އެންމެ އަހަރެކެވެ. ރޮނާލްޑޯ ބުނީ އޭނާ ބޭނުންވަނީ ފާހަގަކޮށްލެވޭ ފަދަ ފުރިހަމަ ތާރީޚަކާއި ރީތި ހަނދާންތަކެއް ދޫކޮށްލުމަށްފަހު ފުޓުބޯޅައިން ވަކިވާން ކަމަށެވެ.

"ކުރިއަށްދާނެ ގޮތް މިހާރު މުޅިން ރާވާ ނިންމައިފިން. 25 އަހަރު ވަންދެން ވަރަށް ބޮޑެތި ޤުރުބާނީތަކެއް ވެވިއްޖެ. ފުޓުބޯޅައިން ވަކިވުމުން އަންނާނެ ބޮޑު ހުސްކަން ފުރާލަން ތަފާތު ކަންކަން ކުރަން ޖެހޭ. ބޭނުމީ ދިރިއުޅުމުގައި އިތުރަށް އުފާކޮށް، ދަތުރުކޮށް، މިހާތަނަށް ލިބުނު ކާމިޔާބީތަކުގެ ހިތްހަމަޖެހުން ހޯދަން،" ރޮނަލްޑޯ ބުންޏެވެ.

ދުނިޔޭގެ މޮޅު ކުޅުންތެރިޔާގެ އެވޯޑު (ބެލޮންޑިއޯ) ފަސް ފަހަރު އަދި ޔުއެފާ ޗެމްޕިއަންސް ލީގު ފަސް ފަހަރު ކާމިޔާބުކޮށްފައިވާ ރޮނާލްޑޯ ވަނީ އިންގްލެންޑް، ސްޕެއިން، އިޓަލީ އަދި ސައޫދީ ޢަރަބިއްޔާގެ ލީގު ވެސް ކާމިޔާބުކޮށްފައެވެ. އޭނާގެ ސީނިއާ ކެރިއަރުގައި 1,000 ގޯލު ހަމަކުރުމަށް މިހާރު ބޭނުންވަނީ އެންމެ 24 ގޯލެވެ. ރޮނާލްޑޯގެ އެންމެ ބޮޑު ވާދަވެރިޔާ ލިއޮނެލް މެސީ ވެސް ދާދި ފަހުން ވަނީ، އޭނާ ފުޓުބޯޅައިގައި ދެން ހޭދަކުރާނެ މުއްދަތެއް ޔަޤީން ނޫން ކަމަށް ބުނެފައެވެ.

ފާހަގަކޮށްލެވޭ ގޮތުގައި، ސައޫދީ ޕްރޯ ލީގުގެ އައު ސީޒަން ހޮނިހިރު ދުވަހު ފެށުނު އިރު، އަލް ފާތިޙާ ދެކޮޅަށް އަލް ނަޞްރު ކުޅުނު މެޗުގައި ރޮނާލްޑޯ ކުޅެފައެއް ނުވެއެވެ. ނަމަވެސް، އޭނާ ވަނީ އާއިލާއާ އެކު ސްޓޭޑިއަމްގެ ވީއައިޕީ ސްޓޭންޑުގައި އިނދެ، އޭނާގެ ޓީމު މޮޅުވި މަންޒަރު ބަލާފައެވެ.