ސައޫދީގެ ނަން ހުތުރުވާ ގޮތަށް ކުޅެފައިވާ ހިންދީ ފިލުމެއްގެ މައްސަލަ ހޫނުވެއްޖެ
ސައޫދީގެ ނަން ހުތުރުވާ ގޮތަށް ކުޅެފައިވާ ހިންދީ ފިލުމެއްގެ މައްސަލަ ހޫނުވެއްޖެއެވެ.
ސަޢޫދީ ޢަރަބިއްޔާގައި ބިދޭސީ މަސައްކަތްތެރިއަކަށް ދިމާވި ހިތާމަވެރި ހާދިސާއެއް އިންޑިއާގެ ފިލްމެއްގައި ދައްކުވައިދީފައިވާ އެފިލްމުގެ މައްސަލަ ގަލްފު ޢަރަބި ޤައުމުތަކުގައި މިހާރު މިވަނީ ބޮޑު މައްސަލައަކަށް ވެފައެވެ.
"ދަ ގޯޓް ލައިފް" ގެ ނަމުގައި ނެރެފައިވާ މި ފިލްމަކީ 1990 ގެ އަހަރުތަކުގައި ސަޢޫދީ ޢަރަބިއްޔާގައި މަސައްކަތްކުރުމަށް ދިޔަ ކޭރަލާގެ ނަޖީބު މުޙައްމަދުގެ ހަޤީޤީ ވާހަކައެއް ކަމަށް ބުނެއެވެ.
މި ފިލްމުގައި ދައްކުވައިދެނީ ނަޖީބު މުޙައްމަދު ސަޢޫދީ ޢަރަބިއްޔާއަށް ދިޔުމަށްފަހު، އޭނާގެ ވިސާ ސްޕޮންސަރ ނޫން މީހަކު އޭނާ ގަދަކަމުން ގެންގޮސް، ބަކަރި ބެލެހެއްޓުމުގެ މަސައްކަތް ކުރުވައި، އަނިޔާކޮށް އަދި އޭނާގެ ލިޔެކިޔުންތައް ނައްތާލި ކަމަށެވެ. މި ފިލްމު ނެރުނު ފުރަތަމަ ހަފްތާގައި 10 މިލިއަން އެމެރިކާ ޑޮލަރުގެ އާމްދަނީ ލިބުނު ކަމަށް ވެއެވެ.
ނަމަވެސް މި ފިލްމުގެ ސަބަބުން ސަޢޫދީ ޢަރަބިއްޔާގެ އިމޭޖަށް އަސަރުކުރާ ކަމަށް ބުނެ ގިނަ ފާޑުކިޔުންތަކެއް އަމާޒުވެފައިވެއެވެ. އަދި ސަޢޫދީ ޢަރަބިއްޔާ އާއި އެހެން ބައެއް ގަލްފު ޤައުމުތަކުގައި މި ފިލްމު ދެއްކުން މަނާކޮށްފައިވާ ކަމަށް ބުނެވެއެވެ. އެހެންނަމަވެސް ޔުނައިޓެޑް އަރަބް އެމިރޭޓްސްގައި މި ފިލްމު ވަނީ ޢާއްމު ގޮތެއްގައި ދައްކާފައެވެ.
މި ފިލްމު ނެޓްފްލިކްސްގައި ދައްކަން ފެށުމާއެކު، ސަޢޫދީ ޢަރަބިއްޔާގެ ސޯޝަލް މީޑިއާގައި މި ފިލްމާ ގުޅޭ ގޮތުން ހޫނު ބަހުސްތަކެއް ކުރިއަށްދާ ކަމަށް ވެސް ވަނީ ރިޕޯޓުކޮށްފައެވެ. މި މައްސަލަ މިހާ ބޮޑަށް ސަމާލުކަން ލިބެމުންދަނީ ސަޢޫދީ ޢަރަބިއްޔާއިން "ވިޝަން 2030" ގެ ދަށުން ޤައުމުގެ އިމޭޖު ރަނގަޅުކުރުމަށް މަސައްކަތްކުރަމުންދާ ދަނޑިވަޅެއްގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
