އަމީނީމަގު ސެގްމަންޓް އެކެއްގައި ތާރުއެޅުމުގެ މަސައްކަތައް ފެށުމަށް ތައްޔާރުވެއްޖެ
އަމީނީމަގު ސެގްމަންޓް އެކެއްގައި ތާރުއެޅުމުގެ މަސައްކަތައް ފެށުމަށް ތައްޔާރުވެފައިވާކަމަށް އެ މަގު ހެދުމުގެ މަސައްކަތް ކުރަމުންދާ އެމްޓީސީސީން ބުނެފިއެވެ.
އެމްޓީސީސީން އެކްސްގައި ކުރި ޕޯސްޓެއްގައި ބުނެފައިވަނީ، އަމީނީމަގު މިހާރު ހަދަމުންދާ ސަރަހައްދުގައި ތާޅުއެޅުމަށް ކުރަންޖެހޭ މަސައްކަތް ނިމިފައިވާކަމަށެވެ. އެގޮތުން ސެގްމަންޓް 1 ގައި އޭބީސީ ފަށަލަ އެޅުމުގެ މަސައްކަތާއި، އެމްސީ-30 ޕްރައިމް ކޯޓް ޖެހުމުގެ މަސައްކަތް ނިންމާލެވިފައިވާކަމަށް އެމްޓީސީސީން ބުންޏެވެ.
އެމްޓީސީސީން ބުނީ ވިއްސާރަ ނުވެ މޫސުން ތަންދޭނަމަ، މި ހިނގާ ހަފުތާގެ ތެރޭގައި އެ ސެގްމަންޓުގައި ޢަމަލީ ގޮތުން ތާރުއެޅުމުގެ މަސައްކަތް ރަސްމީކޮށް ފެށުމަށް ތާވަލްކޮށްފައިވާކަމަށެވެ.
އަމީނީމަގަކީ ވެރިރަށް މާލޭގައި އެންމެ ބާރުބޮޑު އަދި ޢާންމު ޚިދުމަތްތައް ދޭ ގިނަ މުއައްސަސާތަކާއި ސްކޫލްތައް ހުންނަ މައި އެއް މަގަށް ވުމާއެކު، ވާރޭވެހި ފެންބޮޑުވުމުގެ މައްސަލައަށް ދާއިމީ ޙައްލެއް ހޯދައިދީ، މަގު ބޭނުންކުރާ ފަރާތްތަކަށް ލުއިފަސޭހަ ކޮށްދިނުމަކީ ސަރުކާރުން މި މަޝްރޫޢު އަވަސްކުރުމަށް އިސްކަންދޭ މައިގަނޑު ސަބަބެވެ.
މި މަޝްރޫޢުގެ ދަށުން މަގުގައި ފެންބޮޑުވުން ހުއްޓުވުމަށް ޒަމާނީ ފެންހިންދާ ނިޒާމެއް ޤާއިމުކުރުމާއި، ކޭބަލްތައް ވަޅުލުމަށް ޔުޓިލިޓީ ލައިންތައް އެޅުމުގެ އިތުރުން މަގުބައްތި ޖެހުމާއި ދުވާރު ހެދުމުގެ މަސައްކަތްތައް ވެސް ދަނީ ތަރުތީބުން ކުރިއަށެވެ. އެމްޓީސީސީން އަމާޒު ހިފާފައިވަނީ މަގުގެ ދަތުރުފަތުރަށް ވީހާވެސް ބުރޫނާރާނެހެން، ކަނޑައެޅިފައިވާ މުއްދަތުގެ ތެރޭގައި މަސައްކަތް އެއްކޮށް ނިންމައި ޢާންމުންނަށް މަގު ހުޅުވާލުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
