ޕޯޗުގަލްއަށް ޔޫރޯ ކާމިޔާބުކޮށްދިނިން؛ އެއީ ވޯލްޑްކަޕް ކާމިޔާބުކުރުން ފަދަ ކަމެއް: ރޮނާލްޑޯ

އެމެރިކާގެ ޑަލަަސްގައި ރޭ ކުޅުނު ވޯލްޑްކަޕްގެ ފޯރިގަދަ މެޗުން ސްޕެއިން އަތުން 1-0 އިން ބަލިވެ، މުބާރާތުން ކެޓުމާއެކު، މިއީ އޭނާގެ ފަހު ވޯލްޑްކަޕްކަން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ކަށަވަރުކޮށްދީފިއެވެ.

އުމުރުން 41 އަހަރުގެ ރޮނާލްޑޯ ބުނީ، ވޯލްޑްކަޕުން ވަކިވާން ޖެހުމުން ހިތާމަކުރި ނަމަވެސް، އޭނާ ހުރީ ވަރަށް ހިތްހަމަޖެހިގެން ކަމަށެވެ.

ޕޯޗުގަލްގެ ގައުމީ ޓީމަށް ކުޅެދިން 233 ވަނަ މެޗަށްފަހު ވާހަކަދައްކަމުން ރޮނާލްޑޯ ބުނީ، 2016 ވަނަ އަހަރު ޕޯޗުގަލްއަށް ޔޫރަޕްގެ ތަށި (ޔޫރޯ) ހޯދައިދިނުމަކީ އޭނާއަށް ވޯލްޑްކަޕެއް ކާމިޔާބުކުރުމާ އެއްވަރުގެ ކަމެއް ކަމަށެވެ.

"އަހަރެން މިދަނީ ސާފު ހިތަކާއެކު. އަހަރެންގެ ކުރިން ޕޯޗުގަލްއިން ބޮޑު މުބާރާތެއް ކާމިޔާބުކޮށްފައެއް ނުވޭ. އަހަރެން މިވަނީ ގައުމީ ޓީމާއެކު ތިން ތަށި ކާމިޔާބުކޮށްދީފައި،" ހަ ވޯލްޑްކަޕެއްގައި ލަނޑުޖެހި ހަމައެކަނި ކުޅުންތެރިޔާގެ ޝަރަފު ހޯދާފައިވާ ރޮނާލްޑޯ ބުންޏެވެ.

މި މެޗުގެ ފަހު މިނެޓުގައި ސްޕެއިންގެ މިކޭލް މެރީނޯ ޖެހި ލަނޑާއެކު ޕޯޗުގަލް މުބާރާތުން ވަކިވާން ޖެހުނު ނަމަވެސް، ޕޯޗުގަލްގެ ކޯޗު ރޮބާޓޯ މާޓިނޭޒް ވަނީ ރޮނާލްޑޯއަށް ވަރަށް ބޮޑަށް ތައުރީފުކޮށްފައެވެ. މާޓިނޭޒް ބުނީ ރޮނާލްޑޯއަކީ ނަމޫނާ ކެޕްޓަނެއް ކަމަށާއި، އޭނާއަކީ ފުޓްބޯޅައިގެ އައިކަންއެއް ކަމަށެވެ. އަދި މިއީ ކޯޗެއްގެ ގޮތުގައި މާޓިނޭޒް ޕޯޗުގަލްއަށް އިރުޝާދުދިން ފަހު މެޗުކަންވެސް އޭނާ ވަނީ ފާހަގަކޮށްފައެވެ.

ސްޕެއިންގެ ކޯޗު ލުއިސް ޑެލަ ފުއެންޓޭ ވަނީ މެޗުން މޮޅުވި ލަނޑު ޖަހައިދިން މެރީނޯގެ ކުޅުމަށް ތައުރީފުކޮށް، އޭނާއަކީ ދުނިޔޭގެ އެންމެ މޮޅު އެއް ކުޅުންތެރިޔާ ކަމަށް ބުނެފައެވެ.

ރޮނާލްޑޯގެ ކެރިއަރުގައި އޭނާ ވަނީ ޕޯޗުގަލްއަށް 2016 ގެ ޔޫރޯގެ އިތުރުން 2019 އަދި 2025 ވަނަ އަހަރުގެ ނޭޝަންސް ލީގު ކާމިޔާބުކޮށްދީ، އެ ގައުމުގެ ފުޓްބޯޅަ ތާރީޚު ބަދަލުކޮށްލާފައެވެ. ކުރިމަގާ މެދު އަދި ވަކި ގޮތެއް ނުނިންމާ ކަމަށާއި، އާއިލާއާއެކު ވަގުތު ހޭދަކުރުމަށްފަހު އެކަމާ މެދު ވިސްނާނެ ކަމަށް ރޮނާލްޑޯ ބުންޏެވެ.