އިންތިހާބުގެ މަސައްކަތް މަޑުޖައްސާލަން އެންގުމުންވެސް ބީއޭއެމުން އިންތިހާބައިގެން ކުރިއަށް

ބެޑްމިންޓަން އެސޯސިއޭޝަން (ބީއޭއެމް) ގެ އިންތިހާބުގެ މަސައްކަތް މަޑުޖައްސާލަން ސްޕޯޓްސް ކޮމިޝަނާ މުހައްމަދު ތޮލާލް އެންގުމުންވެސް އެ އެސޯސިއޭޝަނުން އިންތިހާބާއި ގުޅޭ މަސައްކަތްތައް ކުރަމުންދާތީ ފާޑުކިޔުންތައް އަމާޒުވެއްޖެއެވެ.

މިގޮތުން މިދިޔަ ބުދަ ދުވަހު ތޮލާލް ވަނީ ބީއޭއެމްގެ ވޯޓިން ސިސްޓަމް އެކުލަވާލަފައި އޮންނަ ގޮތާ ގުޅޭ ގޮތުން ފެންމަތިވެފައިވާ މައްސަލަތައް ހައްލު ކުރުމަށް ފަހު ނޫނީ އިންތިހާބު ނުބޭއްވުމަށް އެ އެސޯސިއޭޝަނަށް އަންގާފައެވެ. އަދި އަތޮޅުތަކުގެ ފޯކަލް ޕޮއިންޓަކެއްގެ ގޮތުގައި، އެ އެސޯސިއޭޝަންގެ އެކުލަވާލާފައިވާ ބެޑްމިންޓަން ޑިވެލޮޕްމެންޓް ސެންޓަރު (ބީޑީސީ) ތަކުގައި އެންމެ ފަރުދަކު އައިސް 100 އަށް ވުރެ މެންބަރުންގެ ނަމުގައި 100 އަށް ވުރެ ވޯޓް ދޭއިރު، މި ބީޑީސީ ތަކަކީ ސްޕޯޓްސް ކޮމިޝަނާގެ އޮފީހުގައި ރަޖިސްޓަރީ ކޮށްފައިވާ ކޮމިޓީތަކެއް ނޫން ކަން ވެސް ތޮލާލް ފާހަގަކުރެއްވިއެވެ.

މީގެ އިތުރުންވެސް ތޮލާލް ވިދާޅުވީ، ސްޕޯޓްސް ކޮމިޝަނާގެ އޮފީހަށް ބެޑްމިންޓަން ކުޅުންތެރިންނާއި ކްލަބްތަކުގެ ފަރާތުން ވެސް ޝަކުވާ ލިބެމުންދާތީ، އެކަމާއި ގުޅިގެން ވެސް އިންތިހާބު އިއުލާން ކުރުމުގެ ކުރިން ވެސް، އިންތިހާބުގެ މަސައްކަތް ކުރިއަށް ނުގެންދަން އެންގެވި ކަމަށެވެ.

"އިންތިހާބަށް އިއުލާން ކުރުމުގެ ކުރިން ވެސް އޮންނާނީ ސިޓީއަކުން ދަންނަވާފަ، އެސޯސިއޭޝަންގެ ހިންގާ ގަވާއިދުގައި އިސްޅާޙު ކުރަން ހުރި ބައެއް ކަންކަން ހުރުމާއި، އަދި ބައެއް އިތުރު ކަންކަމުގައި ކުލަބުތަކާއި ކުޅުންތެރިންގެ ޝަކުވާ ލިބެމުންދާތީ، އެ ޝަކުވާތައް ބެލުމަށާއި، އަދި އިންތިހާބަށް އިޢުލާނުކުރުމުގެ ކުރިން ގަވާއިދުގައި އިސްލާޙު ކުރަން ހުރި ކަންކަން އިސްލާހު ކުރުމަށް. އެހެން އޮއްވައި އިއްޔެ އިންތިހާބަށް އިއުލާން ކުރުމުން އަނެއްކާ މިއަދު އެންގުމެއްގެ ގޮތުގައި މި އެންގީ،"

ތޮލާލް ވިދާޅުވިއެވެ.

ސްޕޯޓްސް ކޮމިޝަނާ މިފަދައިން ވިދާޅުވެ، އިންތިހާބުގެ މަސައްކަތް މަޑުޖައްސާލަން އަންގާފައިވަނިކޮށް، އިއްޔެ އެ އެސޯސިއޭޝަނުން ވަނީ އެންމެ ބޮޑަށް މައްސަލަ ޖެހިފައިވާ ވޯޓާސް ލިސްޓަށް ޝަކުވާ ހުށަހަޅަން ވެސް ހުޅުވާލާފައެވެ.

އިންތިހާބުގެ މަސައްކަތް ކުރިއަށް ނުގެންދަން، ދެ ފަހަރު މަތިން ސްޕޯޓްސް ކޮމިޝަނާ އަންގަވާފައިވާއިރު ވެސް ބީއޭއެމުން އެ މަސައްކަތް ހުއްޓާނުލާ ކުރިއަށްގެންދާތީ، އެސޯސިއޭޝަންގެ ރައީސް މޫސާ ނާޝިދަށް ބޮޑެތި ފާޑުކިޔުންތަކެއް ދަނީ އަމާޒުވަމުންނެވެ.

މިގޮތުން ކުރިން މޫސަގެ ޖެނަރަލް ސެކްރެޓަރީކަން އަދާކުރެއްވި އިޝްފާން މުހައްމަދު (އިއްޕަ) ވިދާޅުވީ ބެޑްމިންޓަން އެސޯސިއޭޝަން ބަދަލު ކުރަންވީ "މޫސަގެ ރަސްކަމަކަށް" ކަމަށެވެ.

އިއްޕަ މިފަދައިން ވިދާޅުވި އިރު، އޭދަފުށީގައި ކުރިން ބީއޭއެމްގެ ސެންޓަރެއް ހިންގުމުގައި އިސްކޮށް އުޅުނު މުހައްމަދު އިކްރާމް ވިދާޅުވީ، ބީއޭއެމްގެ އިންތިހާބުގެ ކަންކަން ކުރިއަށް ނުގެންދަން ސްޕޯޓްސް ކޮމިޝަނާ އަންގާފައި ވަނިކޮށް ވެސް އިންތިހާބު ކުރިއަށް ގެންދިއުމަކީ ހުދުމުހުތާރު އަމަލެއް ކަމަށާއި، ބީއޭއެމްގެ އިންތިހާބީ ކޮންގްރެސް އައްޑޫގައި ބޭއްވުމަށް ނިންމާފައިވާއިރު، މި މަސައްކަތަށް އައްޑޫ ކައުންސިލުން އެއްބާރުލުން ދިނުމަކީ ބަލައި ގަނެވޭނެ ކަމެއް ނޫން ކަމަށެވެ.