މެރީނޯގެ ހެޓްރިކާއެކު ތުރުކީ އަތުން ސްޕެއިންއަށް ފަސޭހަ މޮޅެއް

ވޯލްޑްކަޕް ކޮލިފައިންގް ގުރޫޕް އީގައި ރޭ ރަށުން ބޭރުގައި ތުރުކީ އާއި ދެކޮޅަށް ކުޅުނު މެޗު ފަސޭހަކަމާއެކު 6-0 ގެ ތަފާތުބޮޑު ނަތީޖާއަކުން ކާމިޔާބުކޮށް، ސްޕެއިން ގުރޫޕްގެ އެއްވަނައަށް ކުރިއަށް ޖެހިލައިފިއެވެ.

ކޮލިފައިންގައި ސްޕެއިން އެންމެ ފަހުން ކުޅުނު މެޗުގައި 3-0 ގެ ނަތީޖާއަކުން ބަލްގޭރިއާ އަތުން މޮޅުވެފައިވާއިރު، ތުރުކީ އެންމެ ފަހުން ކުޅުނު މެޗުގައި ޖޯޖިއާ އަތުން އެޓީމު މޮޅުވީ 3-2 ގެ ނަތީޖާއަކުންނެވެ. އަދި މިދެޓީމު އެންމެ ފަހުން ކުޅުނު މެޗު 3-0 ގެ ނަތީޖާއަކުން ކާމިޔާބުކުރީ ސްޕެއިން އެވެ.

މެޗުގެ ފުރަތަމަ ހާފުގައި މޮޅަށް ކުޅެ ސްޕެއިނުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސްޕެއިން ކުރީގައި އިވެގެންނެވެ. އަދި ދެވަނަ ހާފުގައި ތުރުކީ އިން ކުޅުން ރަނގަޅުކުރި ނަމަވެސް މިހާފުގައި ވެސް ސްޕެއިނުން ވަނީ އިތުރު ތިންލަނޑު ކާމިޔާބުކޮށްފައެވެ.

އެގޮތުން މިމެޗުގައި ސްޕެއިންގެ މިޑްފީލްޑަރު މިކެއިލް މެރީނޯ ތިންލަނޑު ކާމިޔާބުކޮށް ހެޓްރިކް ހެދިއިރު، ޒުވާން މިޑްފީލްޑަރު ޕެޑްރީ ވަނީ ދެލަނޑު ކާމިޔާބުކޮށްފައެވެ. އަދި އެޓީމު އަނެއް ލަނޑު ކާމިޔާބުކޮށްދިނީ ފޯވާޑް ފެރާން ޓޮރޭސް އެވެ. އަދި މީގެ އިތުރުން މިމެޗުގައި ލަނޑެއް ކާމިޔާބު ނުކުރި ނަމަވެސް ޒުވާން ފޯވާޑް ލަމީން ޔަމާލް ވަނީ މޮޅަށް ކުޅެ، ދެލަނޑު ޖެހުމަށް ފުރުސަތު ތަނަވަސްކޮށްދީފައެވެ.

މިނަތީޖާއެކު ގްރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕްގެ އެއްވަނައިގައި ސްޕެއިން އޮތްއިރު، މިދެމެޗުގައި އެޓީމުން ނުވަ ލަނޑު ކާމިޔާބުކުރިއިރު، ބައިކޮޅަށް އެންމެ ލަނޑެއް ވެސް ވަދެފައެއް ނުވެއެވެ. އަދި މިމެޗުން ބަލިވި ތުރުކީ ކުޅުނު ދެމެޗުން ހޯދި ތިން ޕޮއިންޓާއެކު ލަނޑުގެ ތަފާތުން މިވަގުތު އޮތީ ގުރޫޕްގެ ތިންވަނައިގައެވެ.

މިގުރޫޕްގެ ދެވަނައިގައި މިވަގުތު އޮތީ ރޭ އަމިއްލަ ދަނޑުގައި 3-0 ގެ ނަތީޖާއަކުން ބަލްގޭރިއާ އަތުން މޮޅުވި ޖޯޖިއާ އެވެ. އަދި ކުޅުނު ދެމެޗުން ވެސް ބަލިވެ ޕޮއިންޓެއް ނުލިބި ގުރޫޕްގެ ފުލުގައި މިވަގުތު އޮތީ ބަލްގޭރިއާ އެވެ.