އިނގިރޭސި ލީގްކަޕުން އެންމެ ބޮޑު ކްލަބް، މެންޗެސްޓަރ ޔުނައިޓެޑް ކަޓައިފި

ބްރައިޓަން އާ ދެކޮޅަށް ކުޅުނުމެޗުން ބަލިވެ، އިނގިރޭސި ލީގްކަޕުން މެންޗެސްޓަރ ޔުނައިޓެޑް ކަޓައިފިއެވެ.

ލީގްކަޕްގައި ބްރައިޓަން އާއި މެންޗެސްޓަރ ޔުނައިޓެޑް ބައްދަލުކުރިމެޗުން ޔުނައިޓެޑް ބަލިވީ 2-3 ގެ ނަތީޖާއިންނެވެ. މި މެޗް ކުޅުނީވެސް މެންޗެސްޓަރ ޔުނައިޓެޑްގެ އަމިއްލަ ދަނޑުކަމަށްވާ އޯލްޑް ޓްރަފަޑްގައެވެ. މިއީ ޖެހިޖެހިގެން ދެވަނަ އަހަރު މި މުބާރާތުގެ ފުރަތަމަ މެޗުން ޔުނައިޓެޑް ބަލިވި ފަހަރެވެ.

މެޗުގެ ކުރީކޮޅު ޝީ ލޭސީ އާއި މޭސަން މައުންޓް ޖެހި ލަނޑުތަކާއެކު ޔުނައިޓެޑުން ބޮޑު ލީޑެއް ހޯދި ނަމަވެސް، މިއީ ފާއިތުވި 50 އަހަރުގެ ތެރޭގައި އޯލްޑް ޓްރަފޯޑްގައި 2-0 އިން ކުރީގައި އޮއްވައި ޔުނައިޓެޑް މެޗަކުން ބަލިވި ފުރަތަމަ ފަހަރެވެ.

މެންޗެސްޓަރ ޑާބީގައި ލިބުނު ނާކާމިޔާބީއަށް ފަހު ކެރިކްގެ އިރުޝާދުގެ ދަށުން ނުކުތް ޔުނައިޓެޑަށް މެޗުގެ ބޮޑު ބައެއްގައި ރަނގަޅު ކުޅުމެއް ނުދެއްކުނެވެ. ފުރަތަމަ ހާފު ނިމެން ދަނިކޮށް ބްރައިޓަންގެ ކޮސްޓޫލަސް ލަނޑެއް ޖަހައި ފަރަގު ކުޑަކުރިއިރު، ދެވަނަ ހާފުގައި ޕާސްކަލް ގްރޮސް އާއި މެކްސިމް ޑި ކުއިޕާ ވަނީ އިތުރު ދެ ލަނޑު ޖަހައި ޔުނައިޓެޑް ސިއްސުވާލާފައެވެ.

ޔުނައިޓެޑަށް ކާމިޔާބު ކުރެވެން އޮތް މުބާރާތަކުން މިހާ އަވަހަށް ވަކިވާން ޖެހުމުން، ކޯޗު މައިކަލް ކެރިކްގެ ނިންމުންތަކާ މެދު މިހާރު ވަނީ ގިނަ ފާޑުކިޔުންތަކެއް އަމާޒުވާން ފަށާފައެވެ.