ބެކަމްގެ މަންމަ މެސީއާ ފުރަތަމަ ފަހަރަށް ދިމާވެއްޖެ، ހުރީ އުފަލުން ފޮޅިފައި

އިނގިރޭސިވިލާތުގެ ލެޖެންޑު އަދި ވިޔަފާރިވެރިޔާ ޑޭވިޑް ބެކަމްގެ މަންމަ، ސަންޑްރާ ބެކަމް ފުރަތަމަ ފަހަރަށް ލިއޮނެލް މެސީއާއި ދިމާވެއްޖެއެވެ.

ދުނިޔޭގައި މިހާތަނަށް އުފެދުނު އެންމެ މޮޅު ކުޅުންތެރިޔާ ކަމަށް ގިނަ ބަޔަކު ގަބޫލުކުރާ މެސީ އާއި ސަންޑްރާ ދިމާވީ، މިހާރު މެސީ ކުޅެމުންދާ އަދި ބެކަމްގެ ހިއްސާ އޮންނަ އިންޓަ މިއާމީގެ ފަރިތަކުރުންތަކެއްގެ ތެރެއިންނެވެ. އެ ޚާއްސަ ވަގުތުކޮޅުގެ ފޮޓޯއެއް ނަގައި ބެކަމް ވަނީ އެ ވަގުތުކޮޅު ސޯޝަލް މީޑިޔާގައި ހިއްސާކޮށްފައެވެ.

އެ ފޮޓޯތަކުން ފެނަން ގޮތުން މެސީއާއި ދިމާވުމުން ބެކަމްގެ މަންމަ، ސަންޑްރާ ހުރީ ވަރަށް އުފަލުންނެވެ. އެ ޕޯސްޓަށް ކޮމެންޓުކުރި ފަރާތްތަކުން ވެސް ވަނީ ވަރަށް ބޮޑަށް އެކަން ފާހަގަކޮށްފައެވެ.

މެސީ އާއި ބެކަމް އަކީ 2004 ވަނަ އަހަރު މެސީ، ބާސެލޯނާގެ ސީނިއާ ޓީމަށް ކުޅެން ފެށިއިރު އެންމެ ވާދަވެރި ދެ ޓީމަށް ކުޅުނު ދެ ކުޅުންތެރިންނެވެ. އެގޮތުން އޭރު ބާސެލޯނާގެ އެންމެ ވާދަވެރި ރެއަލް މެޑްރިޑަށް ކުޅުނު ބެކަމް އާއި ދެކޮޅަށް އެންމެ ފޯރިގަދަ އެލްކްލެސިކޯގެ މެޗުތަކުގައި ދެ ކުޅުންތެރިން ވަނީ ކުޅެފައެވެ.

އޭގެ ތެރެއިން ވެސް އެންމެ ޚާއްސަވަނީ 07-2006 ސީޒަނުގައި ބާސެލޯނާއި މެޑްރިޑް ކުޅުނު މެޗު 3-3 އިން އެއްވަރުވި މެޗެވެ. އެއީ އެ ދެކުޅުންތެރިން އެންމެ ފަހުން އެއް މެޗަކުން ފެނުނު މެޗަށްވާއިރު، އެ މެޗުގައި މެސީ ވަނީ އޭނާގެ ފުރަތަމަ އެލްކްލެސިކޯގެ ހެޓްރިކް ހަދާފައެވެ. އޭރު މެސީގެ އުމުރުން 19 އަހަރެވެ.

އެއަށް ފަހު އޭރުގެ 31 އަހަރުގެ ބެކަމް، ރެއަލް މެޑްރިޑް ދޫކޮށް ބަދަލުވީ އެމެރިކާގެ އެލްއޭ ގެލެކްސީއަށެވެ.

އޭގެ 16 އަހަރު ފަހުން 2023 ވަނަ އަހަރު މެސީ އިންޓަމިއާމީ އަށް ބަދަލުވިއިރު، އެ ޓްރާންސްފާގައި ވެސް ބެކަމްގެ ހިއްސާ ވަރަށް ބޮޑެވެ. މިހާރު މެސީ އަކީ އިންޓަމިއާމީ ކުޅޭ މޭޖާ ލީގު ސޮކާާ (އެމްއެލްއެސް)ގެ މި ސީޒަނުގައި އެންމެ ގިނަ ލަނޑާއި އެސިސްޓު ހެދި ކުޅުންތެރިޔާއެވެ. އަދި މިހާތަނަށް އޭނާ ވަނީ އިންޓަމިއާމީއަށް 71 ލަނޑާއި، 36 އެސިސްޓު ދީފައެވެ.