ގޯއްްޗާއި ފުލެޓް ލިބުނު މީހުންނަށް ރަޖިސްޓަރީ މިހަފްތާތެރޭ ދޭން ފަށާނަން: ރައީސް މުޢިއްޒު

ކުރީ ސަރުކާރުގެ ގެދޮރުވެރިޔާ އަދި ބިންވެރިޔާ ސްކީމްގެ ދަށުން މާލެ ސަރަހައްދުން ގޯއްޗާއި ފުލެޓް ލިބުނު މީހުންނަށް، ރެޖިސްޓްރީ ހައްދައި މި ހަފްތާ ތެރޭގައި ހަވާލު ކުރަން ފައްޓަވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު އިއުލާން ކުރައްވައިފިއެވެ.

މިކަން އިއުލާން ކުރައްވައި ރައީސުލްޖުމްހޫރިއްޔާ ކުރެއްވި ޓްވީޓެއްގައި ވިދާޅުވީ، ގޯތި އަދި ފުލެޓް ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓް ކޮށްފައިވާ ފަރާތަކަށް ރެޖިސްޓްރީ ހަދައިދީ ގޯއްްޗާއި ފުލެޓް ހަވާލު ކުރުމަކީ އެމަނިކުފާނުގެ ވަޢުދާއި އެއްގޮތަށް ކުރިއަށް ދާނެ ކަމެއް ކަމަށެވެ.

މިހަފްތާ އާއި މިއަންނަ ހަފްތާވތެރޭގައި ރެޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގ މިނިސްޓްރީން ކުރިއަށް ގެންދާނެ

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސުލްޖުމްހޫރިއްޔާ ވިދާޅުވީ، ކުރީ ސަރުކާރުން ގޯތި ދީފައިވާ ބައެއް ތަންތަނަކީ ނުވެސް ހިއްކައި ހުރި ތަންތަން ކަމުން، އެ ތަންތަން ހިއްކުމުގެ މަސައްކަތް ބާރަށް ކުރިއަށް ގެންދަވާ ކަމަށެވެ.

އަދި ގޯތި ދޫކުރަން ހަމަޖެހިފައިވާ ގުޅި ފަޅާއި، ގިރާވަރު ފަޅުން އިތުރު ބިން ހިއްކުމުގެ މަސައްކަތް ކުރައްވަމުންދާ ކަމަށްވެސް އެމަނިކުފާނު ވިދާޅުވި އެވެ.

ރައީސުލްޖުމްހޫރިއްޔާ މިފަދައިން އިޢުލާން ކުރައްވާފައި މިވަނީ، ކުރީ ސަރުކާރުން ދޭނެ ކަމަށް ބުނި، ގޯއްްޗާއި ފުލެޓު ލިބުނު މީހުންނަށް ރެޖިސްޓްރީ ހަވާލުނުކޮށް ލަސްވާތީ އެ ފަރާތްތަކާއި ރައްޔިތުންގެ މަޖިލީހުގެ އެމްޑީޕީ މެންބަރުން ވެސް ނުރުހުން ފާޅުކޮށްފައިވަނިކޮށެވެ.

ގޯއްޗާއި ފުލެޓްގެ ރެޖިސްޓްރީ ދޫކުރުން މަޑު ޖައްސާލީ ކުރީ ސަރުކާރުންނެވެ. އެ ސަރުކާރުން އެފަދައިން ކަން ކުރީ، ގޯއްްޗާއި ފުލެޓް ދިނުމުގައި ކޮރަޕްޝަންގެ ޢަމަލުތަކެއް ހިންގާފައިވާ ކަމަށް ބުނެ ރެޖިސްޓްރީ ދޫކުރުން މަޑު ޖައްސާލަން އޭސީސީން އެންގުމުންނެވެ.