އިންޑިއާގައި ގާޑިޔަލެއް ހިންގަމުންދިޔައީ ބަޔޯޓެކްނޮލޮޖީން ޕީއެޗްޑީ ހަދާ ދަރިވަރެއް!

ދާދި ފަހުން މީހުންގެ ސަމާލުކަން އަތުލައިގަތީ އިންޑިއާގެ އެމެރިކާގެ ވްލޮގަރަކު ސޯޝަލް މީޑިއާއަށް ދޫކޮށްލި ވީޑިއޯއަކަށެވެ.

މި ވީޑިއޯއިން ފެންނަނީ މަގުމަތީގައި ކާބޯތަކެތީގެ ގާޑިއާއެއް ހިންގާ މީހެއްގެ ވާހަކައެވެ. ބަލާބެލުމުގައި ހާއްސަ ނުވިއަސް މިއީ ބަޔޯޓެކްނޮލޮޖީގެ ދާއިރާއިން ޕީއެޗްޑީ ހަދަމުންދާ ދަރިވަރެކެވެ. ނަމަކީ ތާރުލް ރަޔާންއެވެ.

އިންޑިއާގެ މަޝްހޫރު 'ސްޓްރީޓް ފުޑް' ރަހަ ބަލައިލުމަށް ބްލޮގަރ ކްރިސްޓޯފަރ ލުއިސް ކުރި މި ޒިޔާރަތުގައި އޭނާ އަށް ވަނީ  ރަޔާންފަދަ ޒުވާނުން ކިޔެވުމާއި މަސައްކަތް އެކުގައި ކުރިއަށް ގެންދާ އުންމީދީ ދަތުރުގެ ކުޑަ ތަސައްވުރެއް ފެނިގެން ގޮސްފައެވެ.

ގޫގުލް މެޕްސް މެދުވެރިކޮށް ލުއިސް އަށް އެ ކާބޯތަކެތީގެ ގާޑިއާ ފެނުމުން އޭނާ ނިންމީ އެތަނުގެ ކާނާ ރަހަ ބަލައިލުމަށެވެ.

ކާތަކެއްޗަށް އޯޑަރު ދިނުމަށްފަހު އޯޑަރަށް އިންތިޒާރުކުރަމުން ދަނިކޮށް، ލުއިސް ރަޔާންއާއެކު ވާހަކަ ދައްކަން ފެށިއެވެ. ފަހުން، ރަޔާންއަކީ ބަޔޯޓެކްނޮލޮޖީގެ ދާއިރާއިން ޕީއެޗްޑީ ކުރަމުންދާ ދަރިވަރެއްކަން އެނގުމުން ލުއިސް ވަރަށް ބޮޑަށް ހައިރާންވިއެވެ.

މި ވީޑިއޯގައި ރަޔާން، ލުއިސްއަށް އޭނާގެ ބަޔޯޓެކްނޮލޮޖީގެ ޕީއެޗްޑީއާ ބެހޭ ގޮތުން ކިޔައިދޭ އަޑު އިވެއެވެ. ރަޔާން ބުނި ގޮތުގައި އޭނާ ޕީއެޗްޑީ ހަދަމުން ދަނީ އެސްއާރްއެމް ޔުނިވަރސިޓީންނެވެ. އަދި އޭނާގެ ރިސާރޗް މަޒުމޫނުތައް ގޫގުލްގައި ހޯދުމަށް ލުއިސްއަށް ބުންޏެވެ. އޭގެ މަދު ސިކުންތުތަކެއް ލުއިސް ރަޔާން ގެ ނަމާއި ކޮލެޖް ގޫގުލް ކޮށްލި އިރު ރަޔާން ލިޔެފައިވާ ގިނަ ރިސާރޗް މަޒުމޫނުތަކެއް ފެނުނެވެ.

ރަޔާންގެ ތަޢުލީމީ ފެންވަރާއި އިތުރަށް މަސައްކަތް ކުރުމުގެ ޢަޒުމާއި އަދި ފައިސާ ހޯދުމަށް ކުރާ ވިޔަފާރި ލުއިސްއަށް ވަރަށް ކަމުދިޔައެވެ.

މި ވީޑިއޯ އިންޓަރނެޓްގައި ވަރަށް ބޮޑަށް ވައިރަލް ވެގެންދިޔައިރު،  ގިނަ ބަޔަކު ވަނީ ރަޔާންގެ ހިތްވަރަށް ތައުރީފްކޮށް، އޭނާއަކީ އެ ސިޓީގެ ގިނަ ޒުވާނުންނަށް ހިތްވަރެއް ކަމުގައި ބުނެފައިއެވެ.