ސްވިޑަން ބަލިކޮށް ނެދަލޭންޑުން ނޮކްއައުޓްގެ ފުރުސަތު ބޮޑުކޮށްފި

ސްވިޑަން ބަލިކޮށް ނެދަލޭންޑުން ވަރލްޑްކަޕް ނޮކްއައުޓް ބުރުގެ ޖާގައެއް ހޯދުމުގެ ފުރުސަތު ބޮޑުކޮށްފިއެވެ.

ގްރޫޕް އެފްގައި ރޭ ސްވިޑަން އާއި ނެދަލޭންޑްސް ބައްދަލުކުރިމެޗް، ނެދަލޭންޑުން ކާމިޔާބުކުރީ 5-1 ގެ ނަތީޖާއަކުންނެވެ. މި މެޗުގައި ނެދަލޭންޑްސްގެ ބްރަޔަން ބްރޮބީ އަދި ކޯޑީ ގަކްޕޯ ވަނީ މޮޅު ކުޅުމެއް ދައްކާފައެވެ. އަދި މިއިން ކޮންމެ ކުޅުންތެރިއަކު ވަނީ ދެ ލަނޑު ޖަހާފައެވެ.

މުބާރާތުގެ ފުރަތަމަ މެޗުގައި ޖަޕާނާ ދެކޮޅަށް ކުޅެ އެއްވަރުވި ނަމަވެސް، ރޮނާލްޑް ކޫމަންގެ އިރުޝާދުގެ ދަށުން ކުޅޭ ނެދަލޭންޑްސް ޓީމުން މި މެޗުގައި ވަނީ ވަރުގަދަ ހަމަލާތަކެއް އުފައްދާފައެވެ. ސްވިޑަން އަތުން ލިބުނު ތިން ޕޮއިންޓާއެކު ނެދަލޭންޑަށް ވަނީ ޖުމްލަ ހަތަރު ޕޮއިންޓް ލިބި، ދެވަނަ ބުރަށް ދިއުމުގެ ފުރުސަތު ބޮޑުވެފައެވެ. ފުރަތަމަ މެޗުގައި ޓިއުނީޝިއާ އަތުން ބޮޑު މޮޅެއް ހޯދި ސްވިޑަންއަށް މި މެޗުގައި ނެދަލޭންޑްސްގެ ހަމަލާތައް ހުއްޓުވުމުގައި ވަނީ ނުކުޅެދިފައެވެ. ސްވިޑަންގެ ހަމައެކަނި ލަނޑު މެޗުގެ ފަހުކޮޅު ކާމިޔާބުކޮށްދިނީ އެންތަނީ އެލަންގާއެވެ.

މި މެޗުގައި ބްރޮބީ ވަނީ ލިބުނު ފުރުސަތުތަކުގެ ބޭނުން ހިފައި، ގޯލާ ކައިރިން ދެ ލަނޑު ކާމިޔާބުކޮށް ނެދަލޭންޑްސްއަށް މެޗުގެ ކޮންޓްރޯލް ހޯދައިދީފައެވެ. ސަންޑަލޭންޑަށް ކުޅެމުން އަންނަ ބްރޯބީ ފަރށތުން ސްވިޑަންގެ ޑިފެންޑަރުންނަށް ވަނީ އެތައް އުނދަގޫތަކެއް ކުރިމަތިކުރުވާފައެވެ. މިމެޗްގައި ބްރޯބީގެ އިތުރުން ލިވަޕޫލަށް ކުޅެމުން އަންނަ ގަކްޕޯވެސް ވަނީ މޮޅު ކުޅުމެއް ދައްކާފައެވެ.

ރޭ ގަކްޕޯ ޖެހި ލަނޑުތަކާއެކު އޭނާ ވަނީ ވޯލްޑް ކަޕްގެ ގްރޫޕް ސްޓޭޖުގައި ނެދަލޭންޑްސްއަށް ޖުމްލަ ފަސް ލަނޑު ހަމަކޮށް، ނެދަލޭންޑްގެ ލެޖެންޑް ރޮބިން ފަން ޕާސީއާއެކު އެ ގައުމަށް ވޯލްޑް ކަޕްގެ ގްރޫޕް މަރުހަލާގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ކުރިން ޖާގަ ހޯދާފައެވެ. މެޗްގައި ނެދަލޭންޑުގެ ފަހުލަނޑު އެޓީމަށް ޖަހައިދިނީ ބަދަލުކުޅުންތެރިއެއްގެ ގޮތުގައި ކުޅެންއެރި  ކްރިސެންސިއޯ ސަމަވިލް އެވެ.