ސެނެގާލް އަތުން ޗެމްޕިއަންކަން ނަގައި އެފްރިކާ ތަށި އެންމެފަހުން މޮރޮކޯއަށް

އެފްރިކަން ކަޕް އޮފް ނޭޝަންސް (އެފްކޮން) ގެ ތަށި ޗެމްޕިއަން ސެނެގާލް އަތުން ނެގުމަށްފަހު ރަނަރަޕް މޮރޮކޯއަށް ދީފިއެވެ.

މިއަހަރުގެ ޖެނުއަރީމަހުގެ 18 ވަނަ ދުވަހު ކުޅުނު އެފްކޮން މުބާރާތުގެ ފައިނަލް މެޗް ކާމިޔާބުކުރީ 1-0 ގެ ނަތީޖާއަކުން ސެނެގާލްގެ ޓީމެވެ. ނަމަވެސް މެޗްގެ އިތުރުވަގުތުގެ ކުޅުމުގެ ތެރޭގައި މޮރޮކޯއަށް ޕެނަލްޓީއެއް ދިން މައްސަލާގައި ސެނެގާލްގެ ކުޅުންތެރިން ވަނީ މެޗް ފުރިހަމަ ނުކޮށް ދަނޑުން ފައިބާފައެވެ.

މި މައްސަލަ ބެލުމަށްފަހު އެފްރިކާގެ ފުޓްބޯޅަ އާ ބެހޭ އިދާރާގެ އެޕީލް ބޯޑުން ވަނީ މައްސަލަ ބެލުމަށްފަހު މެޗްގެ ނަތީޖާ ބާތިލްކޮށް، ސެނެގާލުން މެޗު ދޫކޮށްލި ކަމަށް ބަލައި، 3-0 ގެ ނަތީޖާއަކުން މޮރޮކޯ މޮޅުވި ކަމަށް ކަނޑައަޅާފައެވެ.

މައްސަލަ ބެލި އެޕީލް ބޯޑުން ބުނެފައިވަނީ، ސެނެގާލްގެ ޓީމުން އަމަލުކޮށްފައިވަނީ މުބާރާތުގެ ގަވާއިދުގެ 82 ވަނަ މާއްދާއާ ހިލާފަށް ކަމަށެވެ. އެ މާއްދާގައި ބުނާ ގޮތުން، ރެފްރީގެ ހުއްދަނެތި މެޗުގެ ވަގުތު ހަމަވުމުގެ ކުރިން ޓީމަކުން ކުޅުން ހުއްޓާލައިފިނަމަ، އެ ޓީމެއް ބަލިވީ ކަމަށް ބަލައި މުބާރާތުން ވަކިކުރެވޭނެއެވެ. އަދި 84 ވަނަ މާއްދާގެ ދަށުން، އެފަދަ ހާލަތްތަކުގައި އިދިކޮޅު ޓީމު 3-0 އިން މޮޅުވި ކަމަށް ނިންމަންޖެހެއެވެ.

މި ނިންމުމާ ގުޅިގެން ސެނެގާލްގެ ފުޓްބޯޅަ އާ ބެހޭ އިދާރާއިން ވަނީ އެއީ ވަރަށް ބޭއިންސާފް ނިންމުމެއްކަމަށް ފާހަގަކޮށް، ކޯޓް އޮފް އާބިޓްރޭޝަން ފޯސްޕޯޓް (ސީ.އޭ.އެސް) އަށް ހުށަހަޅާނޭކަމަށް ބުނެފައެވެ.

މި މައްސަލާގައި މޮރޮކޯގެ ފުޓްބޯލައާ ބެހޭ އިދާރާއިން ބުނީ މެޗްގެ މައްސަލަ ހުށަހެޅީ ގަވާއިދުން ބޭރުން ކަންތައްތަކެއް ހިނގާފައިވާތީ އެކަންކަން ޤަބޫލު ނުކުރެވޭތީކަމަށެވެ.