މޮސްކް ޗެންޕިއަންސް ލީގު ޗެންޕިއަންކަން މަސްޖިދު ނޫރު އަދި މަސްޖިދު ހިދާޔާ އިން ހޯދައިފި

ޖަމްއިއްޔަތުލް އިމާމް ޝާފީގެ ފަރާތުން އިންތިޒާމުކޮށް ފުވައްމުލައް ސިޓީގެ މިސްކިތްތަކުގެ މެދުގައި ބޭއްވި ފުރަތަމަ މޮސްކް ޗެންޕިއަންސް ލީގު ފުޓްބޯޅަ މުބާރާތުގެ ޗެންޕިއަންކަން މަސްޖިދުއް ނޫރު އަދި މަސްޖިދުލް ހިދާޔާ އިން ހޯދައިފިއެވެ.

23 މެއި 2025 އިން 20 ޖޭން 2025 ގެ ނިޔަލަށް، ދެ އުމުރު ފުރައަކަށް ބަހާލައިންގެ ކުރިއަށް ގެންދިޔަ މިމުބާރާތުގެ 15 އަަހަރުން ދަށުގެ އުމުރުފުރާގެ ޗެންޕިއަންކަން މަސްޖިދުލް ނޫރުން ހޯދީ ފައިނަލުގައި 5-1 ގެ ނަތީޖާއަކުން މަސްޖިދުލް އައިޝާ ބަލިކުރުމަށްފަހުއެވެ. އަދި 13 އަހަރުން ދަށުގެ ޗެންޕިއަންކަން މަސްޖިދުލް ހިދާޔާ ހޯދީ ފައިނަލުގައި 3-0 ގެ ނަތީޖާއަކުން ސީދީ މިސްކިތް ބަލިކުރުމަށްފަހުއެވެ.

މިމުބާރާތުގައި ދެ އުމުރުފުރާގައި ހަތަރު މިސްކިތަކުން އަށް ޓީމު ވާދަކުރިއިރު، އޭގެ ތެރޭގައި ހިމެނެނީ މަސްޖިދުލް ނޫރު، މަސްޖިދުލް ހިދާޔާ، ސީދީ މިސްކިތް އަދި މަސްޖިދުލް އައިޝާ އެވެ. މުބާރާތް ކުރިއަށް ގެންގޮސްފައި ވަނީ ދެ އުމުރުފުރާގައި ވެސް ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދި ދެޓީމު ފައިނަލަށް ހޮވޭގޮތަށެވެ.

ޖަމްއިއްޔަތުލް އިމާމް ޝާފީގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތު ދެއްވިގޮތުގައި އެ ޖަމްއިއްޔާ އިން މިފަދަ މުބާރާތެއް ބޭއްވުމުގެ މަޤުޞަދަކީ ކުޑަކުދިންގެ ހިތްތަކުގައި މިސްކިތަށް ލޯބި ޖައްސައި ނަމާދަށް އަހުލުވެރި ކުރުވުމުގެ އިތުރުން ޖިސްމާނީ ގޮތުންނާއި ނަފްސާނީގޮތުން އަދި އިޖުތިމާޢީ ގޮތުން ދުޅަހެޔޮ ކުދިންތަކެއް ބިނާކުރުމެވެ. އަދި މިސްކިތަކީ ކުދިންގެ ހިތްތަކާއި ގުޅިފައިވާ އެކުދިންނަށް ދީނީ އަދި އިޖުތިމާޢީ މަރުކަޒަކަށް ހެދުމެވެ.

ޖަމުޢިއްޔަތުލް އިމާމު ޝާފިޢީ އަކީ ސަލަފުއްޞާލިޙުންގެ ފަހުމާއި އެއްގޮތަށް، ޝާފިޢީ މަޒުހަބުގެ ތެރެއިން، ޤުރުއާނާއި ސުންނަތުގެ ޢީލްމު ފަތުރައި ދީނީ ހޭލުންތެރިކަން އިތުރުކުރުމަށްޓަކައި އުފައްދާފައިވާ ޖަމްއިއްޔާއެކެވެ.

މީގެ އިތުރުން އެ ޖަމުޢިއްޔާގެ މައިގަނޑު މަސައްކަތަކީ ފުވައްމުލަކު މިސްކިތްތަކުގައި ކުޑަކުދިންގެ ޤުރުއަން ކުލާސްތަށް ހިންގައި، މިސްކިތްތަކަށް ކުޑަކުދިން ގެނެސް، ކުޅިވަރު ޙަރަކާތްތަކާއި ލައިފް ސްކިލްސް ތަކުގެ ތެރެއިން ކުޑަކުދިން ދީނަށް އަހުލުވެރި ކުރުވައި ޤައުމަށް ފައިދާހުރި ބަޔަކަށް ހެދުމަށް މަސައްކަތް ކުރުމެވެ.