ބޭޒޯސް ހިމެނޭ އިންވެސްޓަރުންގެ ގްރޫޕަކުން ލިވަޕޫލްގެ ހިއްސާ ގަންނަނީ

އެމެޒޯންގެ ބާނީ ޖެފް ބޭޒޯސް ވެސް ހިމެނޭ އިންވެސްޓަރުންގެ ކޮންސޯޓިއަމަކުން އިނގިރޭސިވިލާތުގެ ލިވަޕޫލް ފުޓްބޯޅަ ކްލަބުގެ ގާތްގަނޑަކަށް ތިންބައިކުޅަ އެއްބައި ހިއްސާ ގަތުމުގެ އެއްބަސްވުމަކާ ގާތްވެފައިވާ ކަމަށް ސްކައި ނިއުސް އިން ރިޕޯޓުކޮށްފިއެވެ.

މި ކޮންސޯޓިއަމްގައި ބޭޒޯސްގެ އިތުރުން ފޭސްބުކްގެ އެއް ބާނީ އެޑުއާޑޯ ސަވެރިން ބައިވެރިވެއެވެ. އެ ގްރޫޕު އިސްކޮށް ހިންގަނީ ދަގަނޑުގެ ވިޔަފާރީގެ ބިލިއަނަރު ލަކްޝްމީ މިއްތަލްގެ ދަނބިދަރިފުޅު އަދި ކިއު.ޕީ.އާރުގެ ކުރީގެ ހިއްސާދާރު އަމިތު ބާޓިއާ ކަމަށް ސްކައި ނިއުސް އިން ބުނެފައިވެއެވެ.

2010 ވަނަ އަހަރުން ފެށިގެން ލިވަޕޫލް ކޮންޓްރޯލް ކުރާ ފެންވޭ ސްޕޯޓްސް ގްރޫޕް (އެފް.އެސް.ޖީ) އިން މި މުއާމަލާތާ ބެހޭ ރަސްމީ އިއުލާނެއް މި ހަފުތާ ތެރޭގައި ކުރާނެ ކަމަށް ބެލެވެއެވެ. ނަމަވެސް ބައެއް މަސްދަރުތަކާ ހަވާލާދީ ސްކައި ނިއުސް އިން ބުނީ އެ އިއުލާން އަންނަ ހަފުތާއަށް ލަސްވެދާނެ ކަމަށެވެ.

ފޯބްސްގެ ތަފާސް ހިސާބުތަކަށް ބަލާއިރު ބޭޒޯސްގެ މިލްކިއްޔާތުގެ އަގު 207 ބިލިއަން ޕައުންޑް (280 ބިލިއަން ޑޮލަރު) އަށް އަރާއިރު ސަވެރިންގެ މިލްކިއްޔާތު 23.7 ބިލިއަން ޕައުންޑް (32 ބިލިއަން ޑޮލަރު) ކަމަށް އަންދާޒާ ކުރެވެއެވެ. މި ޑީލް ފުރިހަމަ ވެއްޖެ ނަމަ އިނގިރޭސި ފުޓްބޯޅައިގެ ތާރީޚުގައި އެންމެ ކާމިޔާބު އެއް ކްލަބުގެ ހިއްސާދާރުންގެ ތެރޭގައި ދުނިޔޭގެ އެންމެ މުއްސަނދި ތިން ފަރާތެއް ހިމެނޭނެއެވެ.

މި އިންވެސްޓްމަންޓާ އެކު ލިވަޕޫލް ކްލަބުގެ ޖުމްލަ އަގު 4.4 ބިލިއަން ޕައުންޑް (ހަ ބިލިއަން ޑޮލަރު) އަށް އެރުން އެކަށީގެންވާ ކަމަށް ރިޕޯޓުތައް ބުނާއިރު މިއީ ކުޅިވަރުގެ ތާރީޚުގައި ހިނގާ އެންމެ އަގުބޮޑު އެއް މުއާމަލާތަށް ވެގެންދާނެއެވެ.