5 އަހަރަށް ފަހު އިންޑިއާއާއި ޗައިނާ އާއި ދެމެދު ސީދާ ވައިގެ ދަތުރުތައް ފަށަނީ

5 އަހަރުގެ މެދުކެނޑުމަކަށް ފަހު އިންޑިއާއާއި ޗައިނާ އާއި ދެމެދު ސީދާ ވައިގެ ދަތުރުތައް ފެށުމަށް ނިންމާފައިވާކަމަށް އިންޑިއާއިން ބުނެފިއެވެ.

ޗައިނާގެ ބެއިޖިންގައި އިންޑިއާގެ ޑިޕްލޮމެޓެއްކަމަށްވާ ވިކްރާމް މިސްރީ އާއި ޗައިނާގެ ފޮރިން މިނިސްޓަރު ވަންގް ޔި އާއި ދެމެދު ކުރިއަށްދިޔަ ބައްދަލުވުމުގައި ދެބޭފުޅުންވެސް ވަނީ މި ދަތުރުފަތުރާއި ގުޅޭ އޮނިގަނޑާއި މެދު ދެފަރާތުންވެސް މަޝްވަރާކޮށް ވީހާވެސް އަވަސް ތާރީހެއްގައި ދެގައުމުގެ ދެމެދުގައި ދަތުރުތައް ފެށުމަށް ނިންމާފައެވެ.

ތަޖުރިބާކާރުން ބުނާ ގޮތުގައި، އިގްތިޞާދީ ގޮތުން އެމެރިކާގެ ރައީސް، ޑޮނަލްޑް ޓްރަމްޕް އަޅަމުންދާ ފިޔަވަޅުތަކުގެ ސަބަބުން އިންޑިއާ އާއި ޗައިނާއަށް ވަނީ އެކގައި މަސައްކަތް ކުރަން ޖެހިފައެވެ. ޗައިނާގެ ތަކެއްޗަށް ޓެކްސް ތައާރަފް ކުރާނެކަމަށް ޓްރަމްޕް އިންޒާރުދީފައިވާއިރު، އިންޑިއާ އަކީ ޗައިނާގެ އެންމެ ބޮޑު އެއް މާކެޓެވެ.

މިކަމާއި ގުޅިގެން ދެގައުމުން ވެސް ވަނީ ދެފަރާތަށް ވެސް ފައިދާވަނިވި ގޮތަކަށް އިގްތިޞާދީ ދާއިރާއިން ގުޅުން ބަދަހި ކުރުމަށް ނިންމާފައެވެ.

ދެގައުމުގެ ދެމެދުގައި ސީދާ ވައިގެ ދަތުރުފަތުރު ހުއްޓާލާފައިވަނީ 2020 ވަނަ އަހަރު ޗައިނާގެ ސިފައިންނާއި އިންޑިއާގެ ސިފައިންނާއި ދެމެދު އެގައުމުގެ ބޯޑަރުގައި ހިންގާދިޔަ ނުރައްކާތެރި ކްލޭޝްއަށްފަހުއެވެ. މި ކްލޭޝްގައި ޗައިނާގެ 4 ސިފައިންނާއި އިންޑިއާގެ 20 ސިފައިން ވަނީ މަރުވެފައެވެ.

މިއާއިއެކު، އިންޑިއާގައި ޗައިނާގެ ކުންފުނިތައް އިންވެސްޓް ކުރުމަށް ދަތިކޮށްފައިވާއިރު، ޗައިނާގެ އެޕްތައް ބޭން ކުރުމާއި ކާގޯ ފްލައިޓް ތައް ފިޔަވާ ހުރިހާ ފްލައިޓްތަކެއް ވަނީ ހުއްޓާލާފައެވެ.