އިންޑިއާ-ޔޫއޭއީ ގުޅުން އިތުރު ހަރުފަތަކަށް ހިނގައްޖެ: ޖައިޝަންކަރު
ލިޔުންތެރިޔާ
އަބްދުﷲ ހުސައިން
އިންޑިއާއާއި ޔުނައިޓެޑް އަރަބް އެމިރޭޓްސްގެ ގުޅުން ވަރަށް ބޮޑަށް ރަނގަޅުވެފައިވާކަމަށް އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. ޖައިޝަންކަރު ވިދާޅުވެއްޖެއެވެ.
ޑުބާއީގައި އިންޑިއާގެ ސިމްބިއޯސިސް އިންޓަނޭޝަނަލް ޔުނިވަރސިޓީގެ ކެމްޕަސްއެއް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ޖައިޝަންކަރު ވިދާޅުވީ 2015 ވަނަ އަހަރު އިންޑިއާގެ ބޮޑުވަޒީރު ނަރެންދްރަ މޯދީ ޔޫއޭއީއަށް ކުރެއްވި ރަސްމީ ދަތުރުފުޅަށްފަހު ދެޤައުމުގެ ގުޅުން އެހެން ހަރުފަތަކަށް ގޮސްފައިވާކަމަށެވެ. މޯދީގެ އެދަތުރުފުޅަކީ އިންޑިއާގެ އެފެންވަރުގެ ވެރިއަކު ޔޫއޭއީއަށް ގަރުނެއްގެ ތެރޭގައި ކުރެއްވި އެފަދަ ފުރަތަމަ ދަތުރުފުޅެވެ. އަދި ދެގައުމުގެ މެދުގައި އިގްތިސާދީ ގުޅުން ބަދަހިކުރުމަށް ގާއިމްކުރެވިފައިވާ އެއްބަސްވުންތަކަކީ ނެގޯސިއޭޝަންސް އެންމެ އަވަހަށް ނިންމާލެވުނު އެއްބަސްވުންތައްކަން އޭނާ ފާހަގަކުރެއްވިއެވެ.
ސިމްބިއޯސިސްގެ ކެމްޕަހެއް ޑުބާއީގައި ހުޅުވުމަކީ ދެގައުމުގެ މެދުގައި ތައުލީމީ ދާއިރާއިން ގުޅުން ބަދަހިވަމުންދާކަމުގެ ހެއްކެއްކަމަށްވެސް ޑރ ޖައިޝަންކަރު ވިދާޅުވިއެވެ. "އިންޑިއާ އޮންނަން ޖެހޭނީ ބައިނަލްއަގްވާމީ މަސައްކަތުގެ ބާޒާރަށް ތައްޔާރުވެ. އަދި ހަމައެއާއެކު ޗިޕްތަކާއި، އިލެކްޓްރިކް މޮބިލިޓީ އަދި ސާފު ފެހި ހަކަތައާއި އިއާދަކުރަނިވި ހަކަތައިގެ އިތުރުން ޖައްވީ ދިރާސާތަކުގެ ޒަމާނަށްވެސް ތައްޔާރުވެގެން" ޖައިޝަންކަރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
