ވޯލްޑް ކަޕްގައި ޖެހިޖެހިގެން 7 މެޗުގައި ލަނޑުޖެހި ފުރަތަމަ ކުޅުންތެރިޔާގެ ރެކޯޑް މެސީއަށް

ފީފާ ވޯލްޑް ކަޕް 2026 ގެ ގްރޫޕް ސްޓޭޖުގައި އާޖެންޓީނާގެ ކެޕްޓަން ލިއޮނެލް މެސީ ފްރީ ކިކަކުން މިއަދު ޖެހި ގޯލާއެކު ވޯލްޑް ކަޕްގައި އޭނާ ޖެހި ގޯލްގެ އަދަދު 19 އަށް ވަނީ އަރާފައެވެ.

މި ގޯލާ އެކު މެސީ ވެފައިވަނީ ވޯލްޑް ކަޕްގައި ޖެހިޖެހިގެން އެންމެ ގިނަ މެޗުގައި ގޯލް ޖެހި ކުޅުންތެރިޔާގެ ޝަރަފުވެސް ހޯދާފައެވެ. އެއީ ޖެހިޖެހިގެން ހަތް މެޗެވެ. މީގެ ކުރިން މި ރެކޯޑު ހިފެހެއްޓީ ފްރާންސްގެ ޖަސްޓް ފޮންޓެއިން އާއި ބްރެޒިލްގެ ޖައިރްޒީނިއޯ އެވެ. އެއީ ޖެހިޖެހިގެން 6 މެޗުގައި ގޯލުޖަހައިގެންނެވެ.

މި ފަހަރުގެ މުބާރާތުގައި މެސީ ވަނީ އެލްޖީރިއާ ކޮޅަށް ތިން ގޯލް އަދި އޮސްޓްރިއާ ކޮޅަށް ދެ ގޯލް ޖަހައިފައެވެ. ވޯލްޑް ކަޕް ފެށުމުގެ ކުރިން މެސީ އާއި ޕެލޭ ހަމަހަމަވެފައި އޮތީ 21 ގޯލް އިންވޯލްވްމެންޓުންނެވެ. ޕެލޭގެ ރެކޯޑަކީ 26 މެޗުން 12 ގޯލާއި 9 އެސިސްޓެވެ. މެސީ ވަނީ 2006 ވަނަ އަހަރުން ފެށިގެން 26 މެޗުގައި 13 ގޯލާއި 8 އެސިސްޓް ހަދައިފައެވެ.

މެސީ ވަނީ ވޯލްޑް ކަޕް ތާރީޚުގައި އެންމެ ގިނަ މެޗު ކުޅުނު ކުޅުންތެރިޔާގެ ރެކޯޑުވެސް ހަދައިފައެވެ. އެއީ 29 މެޗެވެ. އެންމެ ގިނަ މެޗުން މޮޅުވި ކުޅުންތެރިޔާގެ ރެކޯޑުވެސް އޮތީ މެސީ އަތުގައެވެ. އެއީ 19 މޮޅެވެ. ހަ ވޯލްޑް ކަޕެއްގައި ދަނޑުމަތީ ކުޅުނު ކުޅުންތެރިންގެ ރެކޯޑު ކްރިސްޓިއާނޯ ރޮނާލްޑޯއާ އެކު މެސީ ހިއްސާކުރެއެވެ. ރައުންޑް އޮފް 16 ހިމެނޭ ފޯމެޓް ފެށި ފަހުން ވޯލްޑް ކަޕްގެ ކޮންމެ ސްޓޭޖެއްގައި ގޯލް ޖެހި ހަމައެކަނި ކުޅުންތެރިޔާއަކީ ވެސް މެސީއެވެ. ފޮންޓެއިން އާއި ޖައިރްޒީނިއޯ ކޮންމެ ސްޓޭޖެއްގައި ގޯލް ޖެހި ނަމަވެސް އެ ދެ މުބާރާތް ކުއާޓާ ފައިނަލުން ސީދާ ފެށީއެވެ.

ގްރޫޕް ސްޓޭޖް ނިމުނު އިރު 2026 ވޯލްޑް ކަޕްގެ ޓޮޕް ސްކޯރާ އަކީ މެސީއެވެ. ވޯލްޑް ކަޕް ގޯލްޑެން ބޫޓަކީ މެސީ މިހާތަނަށް ހާސިލުނުކުރެވި އޮތް ކާމިޔާބީއެކެވެ. ޤަޠަރު ވޯލްޑް ކަޕްގައި ހަތް ގޯލާ އެކު ގާތްވި ނަމަވެސް އެމްބާޕޭ އެއް ގޯލް އިތުރަށް ޖެހިއެވެ. އާޖެންޓީނާ ކުޅުންތެރިންގެ ތެރެއިން ގޯލްޑެން ބޫޓް ހޯދީ 1930 ގައި ގިޔެމޯ ސްޓާބީލޭ (8 ގޯލް) އާއި 1978 ގައި މާރިއޯ ކެމްޕެސް (6 ގޯލް) އެވެ. މެސީގެ ވޯލްޑް ކަޕް ގޯލްތައް ޖަހާފައިވާ ގޮތަށް ބަލާއިރޔ 2006 ގައި އެއް ގޯލު، 2014ގައި 4 ގޯލު 2018ގައި އެކެއް 2022 ހަތެއް އަދި 2026 ގައި މިހާތަނަށް 6 ގޯލުވަނީ ޖަހާފައެވެ.