ބިލިއަން ރުފިޔާގެ މަސްތުވާތަކެތި ބަރުކޮށްގެން ރާއްޖެ ސަރަހައްދުން ދިޔަ ބޯޓެއް އަތުލައިގަނެފި
ލިޔުންތެރިޔާ
އަބްދުﷲ ހުސައިން
ދިވެހި ކަނޑުގެ ސަރަަހއްދުން ބިލިއަން ރުފިޔާގެ އަގުހުރި މަސްތުވާތަކެތި ބަރުކޮށްގެން ދަތުރުކުރަމުންދިޔަ ބޯޓެއް އަވައްޓެރި ސްރީލަންކާގެ ސިފައިން އަތުލައިގަނެފިއެވެ.
ސްރީލަންކާގެ ނޫސްތަނުން ރިޕޯޓްކޮށްފައިވާގޮތުން ސްރީ ދޭވީ ނަމަކަށްކިޔާ ބޯޓް ލަންކާ ނޭވީގެ ބެލުމުގެ ދަށަށް ގެންގޮސްފައިވަނީ އާދިއްތަދުވަހުން ފެށި އޮޕަރޭޝަނެއްގެ ތެރެއިންނެވެ. އެ ބޯޓު އަތުލައިގަތުމަށްފަހު ވަނީ ލަންކާގެ އައްސޭރިފަށުގެ ބަނދަރެއްކަމަށްވާ ޑިކޮވިޓާއަށް ވައްދާފައެވެ.
މި ބޯޓުގައި 251 ކިލޯ 18 ގްރާމް ކްރިސްޓަލް މެތާއި 85 ކިލޯ ހެރޮއިން ހުރިކަމަށް ލަންކާގެ ނޫސްތަކުން ވަނީ ބުނެފައެވެ. މި މައްސަލާގައި ބޯޓުގައި ތިބި މީހުންގެ މުއްދަތު ޖަހާފައިވާއިރު، އޭގައި ތިބީ ކޮން ޤައުމުތަކަކަށް ނިސްބަތްވާ ބައެއްކަމެއް އަދި ހާމައެއް ނުކުރެއެވެ. މަސްވެރިކަމަށް ބޭނުންކުރި އުޅަނދެއް ނަމަވެސް ބޯޓު އަތުލައިގަތްއިރު މަސްވެރިކަމަށް ބޭނުންކުރާ އެއްވެސް ބާވަތެއް ނެތްކަމަށް މައުލޫމާތު ލިބެއެވެ.
ބިލިއަން ރުފިޔާގެ އަގުހުރި މަސްތުވާތަކެތި ބަރުކޮށްގެން ދަތުރުކުރި ބޯޓެއް ލަންކާ ސިފައިން އަތުލައިގަތްއިރު ދިވެހި ސިފައިން ވަނީ މިދިޔަ އަހަރުގެ ނޮވެމްބަރުމަހުގެ ތެރޭގައި ހަމަ މިހާ ގިނަ އަދަދަކަށް މަސްތުވާތަކެތި ބަރުކޮށްގެން ރާއްޖެ ސަރަހައްދުގައި އުޅުނު ލަންކާ މަސްބޯޓެއް އަތުލައިގަނެފައެވެ. އޭގައި ހުރި މަސްތުވާތަކެތީގެ އަގު ބިލިއަން ރުފިޔާއަށްވުރެ އިތުރުވާނޭކަަމަށް ފުލުހުން ވަނީ އޭރު ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
