މާލޭގެ މުހިއްމު އާސާރުތަކެއް ބެލެހެއްޓުމާއި ސްޓެލްކޯއިން ހަވާލުވެއްޖެ

ރާއްޖޭގައި އެންމެ އަސާރީ ބިނާތައް ގިނަ މާލޭ ސިޓިގައިވާ މުޙިއްމު އާސާރީތަންތައް ބަލަހައްޓާ އެތަންތަނުގެ އާބާތުރަފިލުވާ ، ޒީނަތްތެރިކުރުމުގެ މަސައްކަތާއި ސްޓޭޓް އިލްކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ހަވާލުވެއްޖެއެވެ

ސްޓެކްކޯއިން މިތަންތަނާއި ރަސްމީކޮށް ހަވާލުވެފައިވަނީ މިއަދު ސްޓެލްކޯގައި ބޭއްވި ހާއްސަ ރަސްމިއްޔާތެއްގައި ސޮއިކުރެވުނު ރަސްމީ ފަހުމުނާމާއެއްގެ ދަށުންނެވެ.

މިއަދު މި ސޮއިކުރެވުނު ފަހުމުނާމާގެ ދަށުން ރާއްޖޭގެ އެންމެ ދުވަސްވީ އެއްބިނާކަމަށްވާ މާލޭ ހުކުރުމިސްކިތުގެ މުންނާރާއި، މިސްކިތުގެ ގޯތިތެރެ ޒީނަތްތެރިކޮށް ބެލެހެއްޓުމުގެ އިތުރުން މާލޭ މެދު ޒިޔާރަތުގެ އާބާތުރަފިލުވާ ބަލަހައްޓަށް ސްޓެލްކޯއިން ވަނީ ހަވާލުވެފައެވެ. މީގެ އިތުރުން ރާއްޖޭގެ އެންމެ ދުވަސްވީ އެންމެ އާސާރީ ކުޑަކުޑަ އެއް މިސްކިތް ކަމަށްވާ ކަޅުވަކަރު މިސްކިތުގެ އާބާތުރަފިލުވާ ގޯތިތެރެ ޒީނަތްތެރިކޮށް ބެލެހެއްޓުމާއި ސްޓެލްކޯއިން ވަނީ ހަވާލުވެފައެވެ.

ފަސްއަހަރުދުވަހަށް މިއަދު މި ސޮއިކުރެވުނު މި ފަހުމުނާމާގައި ސްޓެލްކޯގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީއެވެ. ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން ސޮއިކުރެއްވީ ދިވެހިބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަޞީރު އިބްރާހީމްއެވެ.

މިއަދު މި ބޭއްވުނު ރަސްމިއްޔާތުގައިސްޓެލްކޯގެ އެމްޑީ ހުސެއިން ފަހުމީ ވިދާޅުވީ ވިއްސާރަވުމުގެ ސަބަބުން މިފަހަރު އާސާރުތައް ރައްކާތެރިކުރުމުގެ މަސައްކަތަށް ކުޑަ ލަސްކަމެއް އައި ނަމަވެސް ދެން އެފަދަކަމެއް ނާންނާނެފަދަ ގޮތަކަށް ބަލައިގެން މަސައްކަތް ކުރައްވާނެ ކަމަށެވެ.

"މީ ވަރަށް ބޮޑަށް ޓެކްނިކަލީ ކަންތައްތައް ބެލިގެން ކުރަންޖެހޭ މަސައްކަތަކަށް ވާތީ އަޅުގަނޑުމެން މިނިސްޓްރީއާ ގުޅިގެން ވަރަށް ބޮޑަށް މި ދިޔައީ ބަލަމުން. ވިއްސާރަ މޫސުމަކަށްފަހު ކޮންމެސް ވަގުތުކޮޅެއް ދޭންޖެހޭ ހުކުރު މިސްކިތު މުންނާރު ހިކުމާ އަދި އެހެނިހެން ޓެކްނިކަލް ކަންތައްތަކަށްވެސް. އެހެންވީމަ އަސްލު ލަސްވެގެން ދިޔައީ. ޙަޤީޤަތުގަ އަޅުގަނޑުމެންނަށް މޫސުން ތަން ނުދިނީމަ، އެހެން ނޫންނަމަ މި މަސައްކަތް އަޅުގަނޑުމެންނަށް ވާނީ މީގެ ކުރިންވެސް ފެށިފަ"

ސްޓެލްކޯގެ އެމްޑީ ޙުސައިން ފަހުމީ ވިދާޅުވިއެވެ.

ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވެރިކަމާއި ހާވާލުވެ ވަޑައިގެންނެވުމަށް ފަހު ރާއްޖޭގެ އާސާރުތައް ރަނގަޅުގޮތުގައި ދެމެހެއްޓުމަށްޓަކައި އަންނަނީ ވަރަށް ގިނަގުނަ މަސައްކަތްތަކެއް ކުރައްވަމުންނެވެ.