ރޮބާޓޯ ކާލޯސް އިސްލާމްވި ކަމަށް ދެކެވޭ ވާހަކަތަކަށް އޭނާ ޖަވާބު ދީފި

ބްރެޒިލްގެ ފުޓުބޯޅައިގެ ލެޖެންޑް ރޮބާޓޯ ކާލޮސް މޮރޮކޯގެ ފުޓުބޯޅަ އެޖެންޓް ސޫހައިލާ އެލް ޠާހިރީ އާ ކައިވެނިކުރުމަށް ފަހު އިސްލާމް ދީނަށް ވަން ކަމަށް ފެތުރެމުންދާ ވާހަކަތަކަށް އޭނާ ޖަވާބު ދީފިއެވެ.

އެގޮތުން ސައުދީ ނޫހެއް ކަމަށްވާ ޢުކާޒަށް ދިން ޚާއްޞަ ބަސްދީގަތުމެއްގައި އޭނާ ވަނީ އެކަން ދޮގުކޮށްފައެވެ.

ކުރީގެ ރެއާލް މެޑްރިޑާއި ބްރެޒިލް ޤައުމީ ޓީމުގެ ތަރި ބުނީ އިސްލާމް ދީނަށް އޭނާ ނިހާޔަތަށް އިޙްތިރާމް ކުރާ ކަމަށާއި ނަމަވެސް ދީން ބަދަލުކުރި ކަމުގެ އަޑުތަކުގައި ހަޤީޤަތެއް ނެތް ކަމަށެވެ.

"އިސްލާމް ދީނަށް އަޅުގަނޑު ނިހާޔަތަށް އިޙްތިރާމް ކުރަން އަދި އަޅުގަނޑުގެ އަނބިމީހާ ނަމާދުކުރާ ތަން ފެނުމަކީ ވަރަށް ރީތި މަންޒަރެއް ނަމަވެސް އަޅުގަނޑު އިސްލާމް ވީ ކަމަށް ދައުރުވަމުންދާ ވާހަކަތަކަކީ ތެދެއް ނޫން" ކާލޯސް ޢުކާޒަށް ބުންޏެވެ.

މީގެ ގާތްގަނޑަކަށް ހަތަރު ހަފުތާ ކުރިން ބްރެޒިލްގެ މުސްލިމް މުޖުތަމަޢުގެ އިސް ޝަޚްޞިއްޔަތެއް ކަމަށްވާ ޝެއިޚް ޖިހާދު ޙަމާދާއާ ބައްދަލުކޮށް ޝަހާދަތް ކީ ކަމަށް ބައެއް މީޑިއާތަކުން ރިޕޯޓުކޮށްފައިވެއެވެ. ތުރުކީގެ ވެރިކަން ކުރާ ޖަސްޓިސް އެންޑް ޑިވެލޮޕްމެންޓް ޕާޓީ (އޭކޭ ޕާޓީ) ގެ ޤާނޫނު ހަދާ މަޖިލީހުގެ މެންބަރު ޢަލީ ޝާހިން ބުނީ ބްރެޒިލްގެ މުސްލިމް މުޖުތަމަޢުގެ ބަޔަކާ ބައްދަލުކުރުމުގެ ތެރޭގައި ކާލޯސް ދީން ބަދަލުކުރި ވާހަކަ އޭނާއަށް އެނގުނު ކަމަށެވެ.

ޝާހިންއަށް ޙަމާދާ ބުނި ގޮތުގައި ކާލޯސް ދުވަސްކޮޅެއް ވަންދެން ޙަމާދާއާ މުޢާމަލާތް ކުރުމަށް ފަހު ގާތްގަނޑަކަށް ހަތަރު ހަފުތާ ކުރިން ޒިޔާރަތްކޮށް ޝަހާދަތް ކިޔައި އިސްލާމް ދީން ޚިޔާރުކުރީ ކަމަށެވެ.

ސޯޝަލް މީޑިއާގައި ކާލޯސް އިސްލާމީ ކައިވެނީގެ ރަސްމިއްޔާތެއްގައި ބައިވެރިވާ ކަމަށް ފެންނަ ފޮޓޯތަކެއް ދައުރުވެ މި އަޑުތައް އިތުރަށް ގަދަވެގެން ދިޔައެވެ. ނަމަވެސް ކާލޯސް ޢުކާޒަށް ބުނީ ދެ ފަރާތުގެ ޢާއިލާގެ ދީނީ ޢަޤީދާއަށް އިޙްތިރާމް ކުރުމުގެ ގޮތުން ތަފާތު ސިފަސިފައިގައި ކައިވެނީގެ ރަސްމިއްޔާތުތައް ބޭއްވި ކަމަށެވެ.

އޭނާގެ ޢާއިލާއަކީ ކެތޮލިކް ޢާއިލާއެއް ކަމުން އެ ބައި މީހުންނަށް ޤަދަރުކުރާ ރަސްމިއްޔާތެއް ބޭއްވުމާ އެކު އަނބިމީހާ އާއި މުސްލިމް ރައްޓެހީންނަށް އެކަށީގެންވާ ރަސްމިއްޔާތެއް ވެސް ބޭއްވީ ކަމަށް ބުންޏެވެ.

ކާލޯސް ބުނީ ސޫހައިލާ އެލް ޠާހިރީ އާ ފުރަތަމަ ދިމާވީ ފުޓުބޯޅައިގެ ވިޔަފާރި ބައްދަލުވުމެއްގެ ތެރެއިން ކަމަށާއި އޭނާ ސިފަކުރީ ކާމިޔާބު ވިޔަފާރިވެރިއެއްގެ ގޮތުގައި ކަމަށެވެ. ދެ މީހުން ޒާތީ ގޮތުންނާއި މަސައްކަތުގެ ގޮތުން ގުޅުން ބާއްވާތާ ދެ އަހަރު ވެފައިވާ ކަމަށް ކާލޯސް ބުންޏެވެ. ފީފާ ލައިސެންސް އޮންނަ ފުޓުބޯޅަ އެޖެންޓެއް ކަމަށްވާ އެލް ޠާހިރީ ކުޅުންތެރީންގެ ކެރިއާ ބެލެހެއްޓުމާއި ފުޓުބޯޅައާ ގުޅޭ ޕްރޮޖެކްޓްތަކުގައި ޙަރަކާތްތެރިވެއެވެ.

ޢުމުރުން 53 އަހަރުގެ ކާލޮސް އަކީ ފުޓުބޯޅައިގެ ތާރީޚުގައި އެންމެ މޮޅު ވާތް ފަޅީގެ ޑިފެންޑަރުންގެ ތެރޭގައި ގުނާ ކުޅުންތެރިއެކެވެ. ރެއާލް މެޑްރިޑާ އެކު ކެރިއާގެ އެންމެ ކާމިޔާބު ދުވަސްތައް ހޭދަކުރި ކާލޯސް ވަނީ 2002 ގެ ފީފާ ވޯލްޑް ކަޕް ކާމިޔާބުކުރި ބްރެޒިލް ޓީމުގެ މުހިންމު ކުޅުންތެރިއެއްގެ ގޮތުގައި ދައުރު އަދާކޮށްފައެވެ. މީގެ އިތުރުން 2007 އިން 2009 އަށް ތުރުކީގެ ފެނަބަހެޗޭގައި ކުޅެ ތުރުކީގެ ފުޓުބޯޅައާ ވެސް ގާތް ގުޅުމެއް އޮވެއެވެ.