އިންޑިއާ އާއި ބްރެޒިލް ބައްދަލުކުރިމެޗް ބްރެޒިލްއަށް

ބައިނަލްއަޤްވާމީ ރަހުމަތްތެރިކަމުގެ މެޗެއްގައި އަވައްޓެރި އިންޑިއާ އާއި ބްރެޒިލް ބައްދަލުކުރި މެޗް ބްރެޒިލް ކާމިޔާބުކޮށްފިއެވެ.

ކަލްކަތާގެ ވިވެކާނަންދާ ޔުބާ ބާރަތީ ކްރިރަންގަންގައި ކުޅުނު މިމެޗް ބްރެޒިލް ކާމިޔާބުކުރީ، 4-0 ގެ ނަތީޖާއިންނެވެ. މި މެޗުގެ ފުރަތަމަ ހާފުގައި ބްރެޒިލުން މޮޅަށް ކުޅުނު ނަމަވެސް އިންޑިއާއިން ވަނީ އެޓީމް ހުއްޓުވަން މަސައްކަތްކޮށްފައެވެ.

މެޗްގައި ބްރެޒިލަށް ގޯލް ހުޅުވާލަދިނީ 28 ވަނަ މިނެޓުގައި އެސްޓެވާއޯ ވިލިއަން އެވެ. މެޗްގެ ފުރަތަމަ ހާފް ނިމުމުގެ ކުރިން ޕެޑްރޯ ވަނީ ބްރެޒިލްގެ ދެވަނަ ލަނޑު ޖަހައިދީފައެވެ.

ދުނިޔޭގެ ރޭންކިންގްގެ 133 ވަނައިގައި އޮތް އިންޑިއާއިން ދެވަނަ ހާފުގައި ކުޅުން ރަނގަޅުކޮށް ލަނޑެއް ޖެހޭތޯ މަސައްކަތް ކުރި ނަމަވެސް، ބްރެޒިލްގެ ޑިފެންސް ފޫއަޅުވާލެވޭ ގޮތެއް ނުވިއެވެ. މެޗުގެ 58 ވަނަ މިނެޓާއި، އިތުރު ވަގުތުގެ ފަހު ސިކުންތުކޮޅުގެ ތެރޭގައި ސެމިއުލް ލީނޯ ޖެހި ދެ ލަނޑާއެކު ބްރެޒިލްއިން ވަނީ މެޗުގެ ނަތީޖާ 4-0 އަށް ބަދަލުކޮށްލާފައެވެ.

މި މެޗުގައި އިންޑިއާގެ ގޯލްކީޕަރު ގުރްޕްރީތު ސިންގް ސަންދޫ ވަނީ ބްރެޒިލްގެ ވިނީޝިއަސް ޖޫނިއާ ފޮނުވާލި ނުރައްކާތެރި ހަމަލާތަކެއް ދިފާއުކޮށްފައެވެ.

މިއީ އިންޑިއާގެ ސީނިއާ ފިރިހެން ޓީމު ބްރެޒިލްއާ ދެކޮޅަށް ކުޅުނު ފުރަތަމަ ރަސްމީ މެޗެވެ. މި މެޗަށްފަހު، އިންޑިއާގެ ޓީމުން ދެން ނިކުންނާނީ އަންނަ އަންގާރަ ދުވަހު އުރުގުއާއީ އާ ދެކޮޅަށެވެ.