ސީދާ ތިން ސެޓުން ފެނަކަ ބަލިކޮށް ޓީމު ހިޔާ ސެމީ ފައިނަލަށް

ހޯރަފުށީގައި މިހާރު ކުރިއަށްދާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ ހަވަނަ މެޗުގައި އަންގާރަދުވަހުގެ ރޭ ޓީމު ހިޔާ ބޮޓްލިން އާއި ފެނަކަ ވާދަކުރި މެޗު ސީދާ ތިން ސެޓުން ކާމިޔާބުކޮށް ޓީމު ހިޔާ އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގައި ޓީމު ހިޔާ އިން ކުޅުނު ފުރަތަމަ މެޗުގައި ތިން ސެޓު އެއް ސެޓުން އެފްސީ ފްރިގޭޓާ އަތުން ބަލިވި ނަމަވެސް ދެވަނަ މެޗުގައި އެޓީމުން ވަނީ ހޯރަފުށީ ޕޮލިސް ކުލަބު އަތުން ތިން ސެޓު އެއް ސެޓުން މޮޅުވެފައެވެ. އަދި ފެނަކަ ޓީމުން އެފްސީ ފްރިގޭޓާ އާއި ހޯރަފުށީ ޕޮލިސް ކުލަބާއި ދެކޮޅަށް ކުޅުނު ދެމެޗުން ވެސް އެޓީމު ބަލިވީ ސީދާ ތިން ސެޓުންނެވެ.

ރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ސެޓް ޓީމު ހިޔާ އިން ކާމިޔާބުކުރީ 25-23 އިންނެވެ. ނަމަވެސް ދެވަނަ ސެޓް ހިޔާ އިން ކާމިޔާބުކުރީ ފަސޭހަކަމާއި އެކު 25-09 ގެ ތަފާތުބޮޑު ނަތީޖާއަކުންނެވެ. އަދި މެޗުގެ ތިންވަނަ ސެޓް ހިޔާ ޓީމުން ކާމިޔާބުކުރީ 17-25 އިންނެވެ.

މިމެޗުގެ ކުއީން އޮފްދަ މެޗަކަށް ހޮވުނީ ހިޔާ ޓީމުގެ ޖާޒީ ނަމްބަރ 10 މާޖިދާއެވެ.

މިމުބާރާތަކީ ކުލަބު ޖީއެސްގެ ފަރާތުން އިންތިޒާމްކޮށްގެން ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ.

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ އިރު މުބާރަތުގެ މެޗުތައް ކުރިއަށް ގެންގޮސްފައިވަނީ ލީގު އުސޫލުންނެވެ.

ލީގު ބުރުގައި ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާން ޓީމަކަށެވެ.

މިނަތީޖާއާއެކު ކުޅުނު ތިން މެޗުން ވެސް ބަލިވެ ފެނަކަ މުބާރާތުން ކެޓިއިރު، ލީގު ބުރުގެ އެއްވަަނަ ޓީމުގެ ގޮތުގައި ފައިނަލުން ޖާގަ ހޯދީ އެފްސީ ފްރިގޭޓާ އެވެ. އަދި ލީގު ބުރުގެ ދެވަނަ ޓީމު ހިޔާ އިން ހޯދި އިރު، ތިންވަނަ ލިބުނީ ހޯރަފުށީ ޕޮލިސް ކުލަބަށެވެ.

މިއަހަރުގެ މުބާރާތުގެ މެއިން ސްޕޮންސަރ އަކަށް އުރިދޫ މޯލްޑިވްސް އިތުރުން ވިއޭނާ ސްޕޯޓްސް ކުލަބު ހަމަޖައްސާފައިވާ އިރު، މުބާރާތްގެ އޮފިޝަލް މީޑިއާ ޕާޓްނަރަކީ ވޮއިސް އެވެ.