ފީފާގެ މުބާރާތްތަކުގައި އިންވެސްޓަރުން ބައިވެރިކުރުމުގެ ޕްލޭން އިންފަންޓީނޯ ދޫކޮށްލައިފި

ވޯލްޑް ކަޕްގެ ހިއްސާ ވިއްކާލުމަށް ފީފާއިން ކުރަމުންދާ މަސައްކަތްތައް ހުއްޓާނުލައިފިނަމަ، މުބާރާތްތައް ބޮއިކޮޓް ކުރާނެ ކަމުގެ އިންޒާރު ޔޫއެފާއިން ދީފައި ވަނިކޮށް، "ފުޓްބޯޅަ ވިއްކާލަން އެއްވެސް ފަރާތަކުން އުޅޭކަށް ނޫޅޭ" ކަމަށް ބުނެ ފީފާއިން އެކަން ދިފާއުކޮށްފިއެވެ.

ޖޭޕީ މޯގަން ބޭންކުން ތައްޔާރުކުރި 25 ޞަފުޙާގެ ލިޔުމެއްގައި ފީފާގެ މުބާރާތްތައް ފުޅާކުރުމަށް ނިންމައި ހާމަވި ލިޔުންތަކެއްގައި ވަނީ  އެ ޕްލޭން ތަންފީޒުކުރަން ފެށުމުން ކޮންމެ މެންބަރު އެސޯސިއޭޝަނަކަށް 24 މިލިއަން ޔޫރޯ ދެވޭނެ ކަމަށެވެ. ވޯލްޑް ކަޕް ހިމެނޭހެން ފީފާގެ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ހުށަހެޅި ހުށަހެޅުމާ ގުޅޭގޮތުން އެންމެ ފުރަތަމަ ޚަބަރު ފެތުރުނުއިރުވެސް ގިނަ ފަރާތްތަކަކުން ވަނީ އެކަމާ ދެކޮޅަށް ވާހަކަދައްކާފައެވެ.

ޔޫއެފާ އާއި ކޮންކާކަފްގެ އިތުރުން އޭޝިއަން ފުޓްބޯޅަ ކޮންފެޑަރޭޝަން (އޭއެފްސީ) އިން ވެސް މި ހުށަހެޅުމާ ދެކޮޅު ހަދައި، ފީފާގެ ހިންގުމުގެ ނިޒާމު އަވަސް ފުރުސަތެއްގައި މުރާޖައާ ކުރުމަށް ގޮވާލާފައިވާ ދަނޑިވަޅެއްގައެވެ.

މީގެ އިތުރުން، އިންފަންޓީނޯގެ ސީނިއާ އެޑްވައިޒަރު ކާލޯސް ކޮރްޑޭރޯ ވެސް ވަނީ ފީފާގެ މި މަޝްރޫއާ ދެކޮޅަށް އިސްތިއުފާ ދެއްވާފައެވެ. އޭނާ ވިދާޅުވީ މިއީ ފުޓްބޯޅައަށާއި، މި ކުޅިވަރުގެ މުސްތަގުބަލަށް ބަލާއިރު ވަރަށް "ގޯސް ނިންމުމެއް" ކަމަށެވެ.

ކުރިމަތިވި ފިއްތުންތަކަށްފަހު ފީފާގެ ރައީސް އިންފަންޓީނީ ނެރުއްވި ބަޔާނެއްގައި ބުނެފައިވަނީ އެކަން ކުރުމަށް ނިންމެވީ މުސްތަގްބަލަށް ބަލާފައި ރަނގަޅު ނަތީޖާތަކެއް ހާސިލްކުރުމަށް ކަމަށެވެ. ނަމަވެސް ގިނަ ފަރާތްތަކެއްގެ ކަންބޮޑުވުން ހުރީތީވެ އެ ޕްލޭން މިހާރު ކުރިއަށް ނުގެންދިއުމަށް ނިންމާފައިވާކަން ވަނީ ފާހަގަކުރައްވާފައެވެ.

ފީފާއިން ކުރިއަށްގެންދަން ނިންމި ޑީލްގައި އެޖަމިއްޔާއިން ހުށަހެޅި އިންވެސްޓާ ގްރޫޕް ލީޑުކުރަން ބެލެވުނީ 7   އެމެރިކާގެ ވެންޗާ ކެޕިޓަލް ކުންފުންޏެއް ކަމަށްވާ ތްރައިވް އެޓާނަލް އިންނެވެ. ތްރައިވް ގެ ފައުންޑަރު ޖޮޝުއާ ކުޝްނާ އަކީ އެމެރިކާގެ ރައީސް ޑޮނަލްޑް ޓްރަމްޕުގެ ޅީދަރި ޖެރެޑް ކުޝްނާގެ ކޮއްކޮއެވެ. މި ޕްލޭނާ ގުޅޭ ގޮތުން ހުކުރު ދުވަހު ފުރަތަމަ ފަހަރަށް ވާހަކަ ދައްކަމުން ޓްރަމްޕު ބުނީ އިންފަންޓީނޯ އާ އެ ކަމާ ގުޅޭ ގޮތުން ވާހަކަ ނުދައްކާ ކަމަށެވެ. އިންފަންޓީނޯ 2016 ވަނަ އަހަރު ފީފާގެ ރައީސް ކަމަށް ހޮވުނީ 115 ވޯޓާ 88 ވޯޓުން ޝައިޚް ސަލްމާން ބަލިކޮށްގެންނެވެ. ފީފާގެ އައު ރައީސް ކަށަވަރުކުރާ 77 ވަނަ ކޮންގްރެސް އޮންނާނީ އަންނަ މާރިޗު މަހު މޮރޮކޯގައެވެ.