51 އަހަރަށް ފަހު ބޮލޯނިއާ ކޮޕާ އިޓާލިއާ ޗެންޕިއަންކަން ހޯދައިފި

ކޮޕާ އިޓާލިއާ ފައިނަލުގައި ބުދަ ދުވަހުގެ ރޭ ވާދަވެރި ކުޅުމަކަށްފަހު އޭސީ މިލާން 1-0 ގެ ނަތީޖާއަކުން ބަލިކޮށް ބޮލޯނިއާ އިން 51 އަހަރަށްފަހު ފުރަތަމަ ފަހަރަށް މިމުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ބޮލޯނިއާ ޖާގަހޯދީ ސެމީފައިނަލުގެ ފުރަތަމަ މެޗުގައި 5- ގެ އެގްރިގޭޓް ނަތީޖާއަކުން އެމްޕޯލީ ބަލިކުރުމަށްފަހު އެވެ. އަދި އޭސީ މިލާން ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 4-1 ގެ އެގްރިގޭޓް ނަތީޖާއަކުން އިންޓަ މިލާން ބަލިކުރުމަށްފަހު އެވެ.

މިދެޓީމު މީގެ ފަސް ދުވަސްކުރިން ލީގުގައި ވާދަކުރި މެޗު 3-1 ގެ ނަތީޖާއަކުން ކާމިޔާބުކުރީ އޭސީ މިލާން އެވެ. އަދި 1974 ވަނަ އަހަރު ކޮޕާ އިޓާލިއާގެ ޗެންޕިއަންކަން ބޮލޯނިއާ ހޯދިފަހުން މިއަހަރު ފުރަތަމަ ފަހަރަށް އެޓީމު މުބާރާތުގެ ފައިނަލުން ޖާގަހޯދިއިރު، 2003 ވަނަ އަހަރުގެ ފަހުން އޭސީ މިލާނަށް ވެސް މިމުބާރާތް ކާމިޔާބުކުރެވިފައެއް ނުވެއެވެ.

އިޓަލީގެ ވެރިރަށް ރޯމުގެ ސްޓޭޑިއޯ އޮލިމްޕިކޯގައި ކުޅުނު މިމެޗުގެ ފުރަތަމަ ހާފުގައި މޮޅަކުޅެ ބޮލޯނިއާ އިން މެޗު ޑޮމިނޭޓްކުރިއިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފު ވެސް ވަރުގަދަކޮށް ފެށީ ބޮލޯނިއާ އިންނެވެ. ނަތީޖާއެއްގެ ގޮތުން ދެވަނަ ހާފުގެ 53 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހީދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ސްވިޒަލޭންޑް ފޯވާޑް ޑެން އެމްޑޯއީ އެވެ.

ބޮލޯނިއާގެ ލަނޑަށްފަހު އޭސީ މިލާނުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ބޮލޯނިއާ ކުރީގައި އޮވެގެންނެވެ.