އަޅުގަނޑާ ޒާތީ ވީވަރަކަށް ވާނީ ބޯ ހަރު، ޢަޒުމް ވާނީ ވަރުގަދަ: ޢާޒިމާ

ޕީޕީއެމް ޕީއެންސީގެ ޓިކެޓްގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރަށް އަމާޒު ކުރައްވައި ޒާތީ ގޮތުން ހަމަލާ ދެއްވަމުންދާ ކަމަށް ވިދާޅުވެ އެފަރާތްތަކަށް ވަރުގަދަ ރައްދެއް ދެއްވައިފި އެވެ.

ޕްރޮގްރެސިވް ކޮންގްރެސް ކޯލިޝަނުން ބޭއްވި ކެމްޕެއިން ޖަލްސާގައި ވާހަކަދައްކަވަމުން ޢާޒިމާ ވިދާޅުވީ، އޭނާ އާ ދިމާވާ އެންމެ ބޮޑު މައްސަލަ އަކީ އަބަދުވެސް އެއް ގޮތެއްގައި ހުރުން ކަމަށެވެ. އެގޮތުން، އޭނާ ހުންނެވީ ރައީސް މުޢިއްޒާއިއެކު ވަރަށް ސާބިތު ކަމާއިއެކު ކަމަށާ، އެކަން ބަދަލު ކުރުމަށް މަސައްކަތް ކުރި ނަމަވެސް ނުކުރެއްވޭނެ ކަމަށެވެ.

އޭގެ ސަބަބުން އަޅުގަނޑަށް، އަޅުގަނޑުގެ ދަރިފުޅަށް، އަޅުގަނޑުގެ ޢާއިލާއަށް ކިތަންމެ ހަމަލާއެއް ދިނަސް އަޅުގަނޑު ގުޑުވައެއް ނުލެވޭނެ. އަޅުގަނޑަކީ އަޅުގަނޑުގެ އިޚްލާޞްތެރި ކަމާއިއެކު، ސާބިތު ކަމާއެކުގައި މި ގައުމަށް ދެއްކި މީހެއް. އެއެއް ބަދަލު ކުރައްވަން ނޫޅުއްވާތި.

ޢާއިޝަތު ޢާޒިމާ ޝަކޫރު

ޢާޒިމާ އިތުރަށް ވިދާޅުވީ، އިއްޔެ އެކަނިވެސް، ޒާތީ ދެ ހަމަލާއެއް އަމާޒުވެގެން ދިޔަ ކަމަށެވެ. އަދި އެފަދައިން ހަމަލާތައް އަމާޒުކުރި ނަމަވެސް ޢަޒުމަށް ބަދަލެއް ނާންނާނެ ކަމަށް ޢާޒިމާ ވިދާޅުވި އެވެ.

އަޅުގަނޑާ ޒާތީގޮތުން ބެހުނު ވަރަކަށް އަޅުގަނޑުގެ ވާނީ ބޯ ހަރު. އަޅުގަނޑުގެ އަޑު ވާނީ ގަދަ. އަޅުގަނޑުގެ އަޒުމް ވާނީ ވަރުގަދަ. މިއަދު އަޅުގަނޑު މިއައީ ޒާތީ ދެ ހަމަލާ ތަހައްމަލް ކޮށްފައި. އޭރުވެސް އަޅުގަނޑު ހުރީ ޑޯޓުޑޯގައި ދެ ވަޒީރުންނާއި އެކު. އަޅުގަނޑަކާ ނުކުޅެވޭނެ. ކުޅުއްވަން ނޫޅުއްވާތި. އަޅުގަނޑަކީ ހަމަލާ ތެރޭގައި ސަވައިވް ވާނޭ މީހެއް. އަޅުގަނޑަކީ އަންހެނެއް. ދިވެހި އަންހެނެއް.

ޢާއިޝަތު ޢާޒިމާ ޝަކޫރު

މިއާއެކު ޢާޒިމާ ވިދާޅުވީ، އޭނާ އާއި ވާދަވެރި ބައެއް ބޭފުޅުންނާއި ގުޅޭ 22 ވަރަކަށް މައްސަލަ މިހާރުވެސް އޭސީސީ ގައި އޮތް ކަމަށެވެ. ނަމަވެސް އޭނާގެ ޚިޔާނާތުގެ އެންމެ މައްސަލައެއްވެސް ނޯންނާނެ ކަމަށް ވިދާޅުވި އެވެ.

އަދި އޭނާގެ މައްޗަށް އެއްވެސް ޚިޔާނާތުގެ މައްސަލައެއް ނެތީ، މިވީހާތަނަށް އަދާ ކުރެއްވި ސަރުކާރުގެ މަގާމުތަކުގެ ނާޖާއިޒު ފައިދާ ނަންގަވާފައި ނުވާތީ ކަމަށާ، ސިވިލް ކޯޓުން ދަރަނީގެ މައްސަލާގައި ހުކުމް ކުރީވެސް އެ ސަބަބަށްޓަކައި ކަމަށް ޢާޒިމާ ވިދާޅުވި އެވެ.