މެންޗެސްޓާ ސިޓީން އިންޑިއާގައި ފުޓްބޯޅަ ސްކޫލެއް ތަރައްޤީކުރުމަށް ނިންމައިފި

އިނގިރޭސި ޕްރިމިއާލީގް ކްލަބް، މެންޗެސްޓަރ ސިޓީން އިންޑިއާގައި ފުޓްބޯޅަ ސްކޫލެއް ތަރައްޤީކުރުމަށް ނިންމައިފިއެވެ.

މިކަމާ ގުޅޭގޮތުން މެންޗެސްޓަރ ސިޓީގެ ވެބްސައިޓުގައި އެ ކްލަބުން ބުނެފައިވަނީ އިންޑިއާގެ ޖެއިން ސްޕޯޓްސް އާ ގުޅިގެން އެޤައުމުގައި ފުޓްބޯޅަ ސްކޫލެއް ތަރައްޤީކުރުމަށް ނިންމާފައިވާކަމަށެވެ. މެންސިޓީން ބުނީ މި ސްކޫލުން ދުނިޔޭގެ ފެންވަރުގައި ފުޓްބޯޅައިގެ ތައުލީމް ފޯރުކޮށްދެވިގެން ދާނޭކަމަށެވެ. މި ސްކޫލްގައި ކުރިއަށްގެންދާ ޕްރޮގްރާމްތައް ހިންގާނީ އެ ކްލަބްގެ ފަލްސަފާ އާއި އިންޑިއާގެ އަރަމުން އަންނަ ޒުވާން ކުޅުންތެރިންނަށް އެންމެ އެކަށޭނެގޮތަށްކަމަށް ސިޓީން ވަނީ ބުނެފައެވެ.

މީގެ އިތުރުން ޕްރޮގްރާމްތައް ކުރިއަށްގެންދާނީ އެންމެފަހުގެ ވަސީލަތްތަކާއި އެކުގައިކަންވެސް ސިތީން ވަނީ ފާހަގަކޮށްފައެވެ. މި ސްކޫލުން ފުޓްބޯޅަ ކުޅުންތެރިން ތަމްރީނުކުރުމުގެ އިތުރުން ކޯޗުން ތަމްރީނުކުރުމަށްވެސް ޕްރޮގްރާމްތައް ކުރިއަށްގެންދާނެއެވެ. އިންޑިއާގައި ތަރައްޤީކުރުމަށް ނިންމާފައިވާ މި ސްކޫލްގެ ޕްރޮގްރާމްތައް ފަރުމާކުރުމުގައި ބޮޑަށް އިސްކަންދޭނީ ސިޓީއަށް އިނގިރޭސި، ޔޫރަޕް އަދި ދުނިޔޭގެ މުބާރާތްތަކުގައި ކާމިޔާބީ ހޯދުމަށް އެހީތެރިވެދީފައިވާ އުސޫލްތަކަށް ކަމަށްވެސް ސިޓީން ވަނީ ބުނެފައެވެ.

ޖެއިން ސްޕޯޓްސްއަކީ އިންޑިއާގައި ކުޅިވަރުކުޅުންތެރިްނ އުފެއްދުމުގައި ފާހަގަކޮށްލެވޭ އެކަޑަމީއެކެވެ.

މެންޗެސްޓަރ ސިޓީގެ ފުޓްބޯޅަ ސްކޫލެއް އިންޑިއާގައި ތަރައްޤީކުރުމަށް ނިންމާފައިވާކަން ސިޓީން ހާމަކުރިނަމަވެސް އެ ސްކޫލް ހުޅުވާނޭ ތާރީހެއް އަދި ނުބުނެއެވެ.